مامانداردىڭ پىكىرىنشە, بۇل شەشىم جولدىڭ وتكىزۋ قابىلەتىن, جولداعى قاۋىپسىزدىكتى ەداۋىر ارتتىرىپ, ءجۇرۋ ۋاقىتىن قىسقارتادى. سونداي-اق ەلىمىزدىڭ ەڭ ءىرى اگلومەراتسياسىن ورتالىق وڭىرلەرمەن ءتيىمدى بايلانىستىرۋعا مۇمكىندىك بەرەدى. جوبا ەۋروپالىق قايتا قۇرۋ جانە دامۋ بانكىنىڭ قاراجاتى ەسەبىنەن قارجىلاندىرىلدى.
قايتا جاڭعىرتۋ پارامەترلەرىنە سايكەس, تەحنيكالىق تالاپتاردى ساقتاي وتىرىپ, ءتورت جولاقتى قوزعالىس ۇيىمداستىرىلدى. جوبا شەڭبەرىندە ءتورت كوپىر قۇرىلىسى, ءبىر كولىك ايرىعى, ايرىق قۇرامىنداعى ءبىر جول وتكەلى, بەس بۇرىلىس الاڭى, 61 سۋ وتكىزۋ قۇبىرى سالىندى. نىسان قۇرىلىسىنا 305 مامان, 104 بىرلىك قۇرىلىس تەحنيكاسى جۇمىلدىرىلدى.
جوبا تەك جول جەلىسىن جەرگىلىكتى دەڭگەيدە جاقسارتۋدى عانا ەمەس, ەلدىڭ نەگىزگى كولىك دالىزدەرىن دامىتۋعا باعىتتالعان جۇيەلى جۇمىستىڭ ءبىر بولىگى رەتىندە قاراستىرىلادى. سالالىق وپەراتورلار مەن وڭىرلىك بيلىك ورگاندارىنىڭ ۇيلەستىرىلگەن ءىس-قيمىلى ينفراقۇرىلىمدىق شەشىمدەردى ەكونوميكا, لوگيستيكا ايماق تۇرعىندارىنىڭ قاجەتتىلىكتەرىمەن قاتار ۇشتاستىرۋعا مۇمكىندىك بەردى. كۇرەجولدىڭ اشىلۋ سالتاناتىندا وبلىس اكىمى مارات سۇلتانعازيەۆ باستامانىڭ ماڭىزىن اتاپ ءوتتى.
– ۇزىندىعى 67 شاقىرىمدى قۇرايتىن «كۇرتى – قوناەۆ» اۆتوموبيل جولى – الماتى وبلىسىنىڭ كولىك ينفراقۇرىلىمىن جاڭارتۋ جونىندەگى جۇيەلى جۇمىستىڭ ءبىر بولىگى. تەك بيىلدىڭ وزىندە وڭىردە وبلىستىق ماڭىزى بار 178 كم جول, كوشە-جول جەلىسىنىڭ 473 شاقىرىمى رەتكە كەلتىرىلدى. سونداي-اق «قازاۆتوجول» ۇلتتىق كومپانياسىمەن بىرلەسكەن جۇمىستىڭ ناتيجەسىندە رەسپۋبليكالىق ماڭىزى بار 341 كم اۆتوجول جوندەۋدەن ءوتتى. بۇل جوبالار جول ءجۇرۋ ۋاقىتىن قىسقارتۋعا, قوزعالىس قاۋىپسىزدىگىن ارتتىرۋعا, بيزنەس پەن وبلىس تۇرعىندارىنا بارىنشا قولايلى جاعداي جاساۋعا مۇمكىندىك بەرەدى, – دەدى اكىم.
سونىمەن قاتار ۇلتتىق وپەراتور الماتى وبلىسىنداعى رەسپۋبليكالىق ماڭىزى بار اۆتوجولداردا وسى جىلى اتقارىلعان جوندەۋ جۇمىستارىن قورىتىندىلادى. وڭىردەگى رەسپۋبليكالىق جول جەلىسىنىڭ جالپى ۇزىندىعى 1734 شاقىرىمدى قۇرايدى, ونىڭ ىشىندە ءى ساناتتاعى جولدار – 683 كم. جەلىنىڭ قۇرامىندا (اقىلى ۋچاسكەلەردى قوسا العاندا) تسەمەنت-بەتون جامىلعىسى بار 327 كم اۆتوجول, 134 كوپىر مەن جول وتكەلى, سونداي-اق جەر توسەمىنىڭ تۇراقتىلىعى مەن سۋ بۇرۋدى قامتاماسىز ەتەتىن شامامەن 2 200 سۋ وتكىزۋ قۇبىرى پايدالانىلادى.
– ءبىز «ورتالىق – وڭتۇستىك» ءدالىزىنىڭ نەگىزگى ۋچاسكەلەرىن كەزەڭ-كەزەڭىمەن قازىرگى زامان تالابىنا ساي دەڭگەيگە جەتكىزىپ كەلەمىز. «كۇرتى – قوناەۆ» باعىتىندا ءتورت جولاقتى قوزعالىستىڭ اشىلۋى – كولىك شىعىندارىن تومەندەتىپ, لوگيستيكانىڭ بولجامدىلىعىن ارتتىراتىن, ساپاردى مەيلىنشە قاۋىپسىز ءارى جايلى ەتەتىن ناقتى ناتيجە. الماتى وبلىسىنا بۇل جوبا وتە ماڭىزدى. ويتكەنى بۇل جول جولاۋشى, جۇك تاسىمالى اينالىمىنىڭ وسۋىنە تىكەلەي ىقپال ەتىپ, ءوڭىردىڭ ترانزيتتىك الەۋەتىن كۇشەيتەدى, – دەدى «قازاۆتوجول» ۇلتتىق كومپانياسى» اق باسقارما توراعاسى دارحان يماناشەۆ.
بيىل 341 كم اۆتوجول جوندەلگەن. ونىڭ 109 شاقىرىمىنا قايتا جاڭعىرتۋ جۇمىسى جۇرگىزىلسە, 1 كم جول كۇردەلى جوندەۋدەن, 232 كم جول ورتاشا جوندەۋدەن وتكەن. بۇل باسىم باعىتتاردا ينفراقۇرىلىمدى كەشەندى جاڭارتۋعا, جول جەلىسىنىڭ پايدالانۋ سيپاتتامالارىن جاقسارتۋعا مۇمكىندىك بەرەدى. قايتا جاڭعىرتۋ اياسىندا «ۇزىناعاش – وتار» اۆتوجولىنىڭ 42 شاقىرىمىندا نەگىزگى جۇمىستار اياقتالىپ, كولىك قوزعالىسى اشىلدى. «الماتى – بىشكەك» اۆتوجولىنداعى (25 كم, شىعىس باعىتى) كۇردەلى جوندەۋ جوباسى بويىنشا «تاعا» ۇلگىسىندەگى كولىك ايرىعىنىڭ قۇرىلىسى جالعاسىپ جاتىر. بيىل 54 بۇرعىلاپ-قۇيۋ قاداسىن قوسا العاندا ءتورت تىرەك, ءتورت روستۆەرك, تىرەك قاڭقاسى تۇرعىزىلدى. جوبا 2026 جىلى اياقتالادى.
بىرقاتار ۋچاسكەدە جوبالاۋ-سمەتالىق قۇجاتتامانى ازىرلەۋ جۇمىسى جالعاسىپ جاتىر. اتاپ ايتقاندا, «الماتى – بىشكەك» جولىنىڭ 19-27 شاقىرىم ارالىعىن 4 جولاقتان 8 جولاققا دەيىن كەڭەيتۋ, «الماتى – تالعار – بايدىبەك بي» باعىتىنىڭ 13-21 شاقىرىمدارىن 4 جولاققا دەيىن ۇلعايتۋ, «الماتى – وسكەمەن» اۆتوجولىنىڭ 43 شاقىرىمىندا جەرۇستى جاياۋ جۇرگىنشى وتكەلىن سالۋ, سونداي-اق «اقساي – شونجى – قالجات» (0-7 كم), «كوكپەك – كەگەن – ءتۇپ» (53-68 كم) ۋچاسكەلەرى جونىندەگى جوبالاردى ءتۇرلى دەڭگەيدەگى مەملەكەتتىك ساراپتامادان وتكىزۋ جوسپاردا بار.
ورتاشا جوندەۋدەن وتكەن «الماتى – بايتەرەك – بايدىبەك بي» (14-43 كم), «الماتى – شامالعان – ۇزىناعاش» (20-23 كم), «الماتى – كوكپەك – كوكتال – قورعاس» (187-230 كم), سونداي-اق «جالاڭاش – ساتى» (18-24 كم) ۋچاسكەلەرى پايدالانۋعا بەرىلدى. وتپەلى نىسانداردىڭ بىرقاتارىندا جول نەگىزدەرى مەن جامىلعىنىڭ تومەنگى قاباتتارىنا قاتىستى جۇمىستار ورىندالدى, ۇستىڭگى قاباتتاردى توسەۋ الداعى جىلدىڭ ەنشىسىندە.
سونداي-اق «الماتى – شەلەك – قورعاس» اقىلى اۆتوجولىندا وسى جىلى جولداعى اقاۋلاردى جويۋ جۇمىسى كەشەندى جۇزەگە استى. كوپىر قۇرىلىستارىندا 101 مىڭ شارشى مەتر الاڭدا جابىن اۋىستىرىلىپ, جارىقتاندىرۋ جۇيەسىن قالپىنا كەلتىرۋ جۇمىستارى جۇرگىزىلىپ جاتىر.
«قازاۆتوجول» ۇلتتىق كومپانياسى» اق الداعى جىلى الماتى وبلىسىندا جول جوبالارىن جۇزەگە اسىرۋدى ودان ءارى جالعاستىرادى. ونىڭ ىشىندە وتپەلى ۋچاسكەلەردى اياقتاۋ, قوزعالىس قاۋىپسىزدىگىن, وتكىزۋ قابىلەتىن, جايلىلىقتى ارتتىرۋعا باعىتتالعان ينفراقۇرىلىمدى ودان ءارى دامىتۋ كوزدەلگەن.
الماتى وبلىسى
