«Qyzyljar» اەا الدىمەن وتاندىق «دامۋ» قورىنىڭ قولداۋىمەن قۇرىلعان. سودان بەرى ءوزىنىڭ وندىرىستىك قۋاتىن ارتتىرىپ, شەتەلدەن ينۆەستيتسيا تارتۋمەن اينالىسىپ كەلەدى. بىلتىرعى جىلدىڭ اياعىندا وبلىس اكىمى ع.نۇرمۇحامبەتوۆ باستاعان دەلەگاتسيانىڭ قۇرامىندا «Qyzyljar» اەا باسشىسى د.شاراپيدەنوۆ تە قىتاي حالىق رەسپۋبليكاسىنىڭ سيان قالاسىنا بارىپ, قىتايدىڭ Xian Ya’ao Agricultural Machinery Co., Ltd جانە چان-با حالىقارالىق پورتىمەن ىنتىماقتاستىق تۋرالى مەموراندۋمعا قول قويىپ كەلگەن.
ال جۋىردا ەلىمىزگە ەستونيا پرەزيدەنتى الار كاريستىڭ رەسمي ساپارى اياسىندا «Qyzyljar» ارنايى ەكونوميكالىق ايماعىنىڭ قاتىسۋشىسى – «Nord Panels» جشس ەستونيادا فانەر زاۋىتىن اشاتىنى تۋرالى كەلىسىمگە قول قويىلدى. ءسويتىپ, وتاندىق كاسىپورىن ەستونيانىڭ سيللامياە پورتىنداعى ونەركاسىپتىك الەۋەتتى دامىتۋ مەن ونىڭ اۋماعىندا فانەر زاۋىتىن سالۋ جونىندە ينۆەستيتسيالىق جوبانى ىسكە اسىرۋ تۋرالى كەلىسىم جاساستى. «Nord Panels» ءۇش جىل ىشىندە كەم دەگەندە 5 ملن ەۋرو ينۆەستيتسيا سالىپ, فانەرا شىعارۋدى جولعا قويۋدى جانە جاڭا جۇمىس ورىندارىن اشۋدى جوسپارلاپ وتىر. بولاشاق كاسىپورىن ەۋروپالىق ساپا جانە ەكولوگيالىق قاۋىپسىزدىك ستاندارتتارىن ساقتاي وتىرىپ, جىلىنا 30 000 م³ ءونىم وندىرەتىن بولادى.
سونىمەن بىرگە سولتۇستىك قازاقستان وبلىسى مەن ەستونيا اراسىنداعى ساۋدا بايلانىستارى جىل سايىن نىعايىپ كەلە جاتقانىن دا ايتا كەتۋ كەرەك. 2025 جىلدىڭ قاڭتار–قىركۇيەك ايلارىندا ءوزارا ساۋدا كولەمى 5,9 ملن دوللارعا جەتىپ, وتكەن جىلدىڭ سايكەس كەزەڭىمەن سالىستىرعاندا 1,5 ەسەگە ارتتى.
«Qyzyljar» اەا جالپى جاعدايىنا توقتالا كەتەتىن بولساق, قازىر ونىڭ اۋماعى وبلىس اۋداندارىنداعى سۋبزونالارىمەن قوسا ەسەپتەگەندە, 762 گەكتارعا دەيىن سوزىلعان. ونىڭ 22 قاتىسۋشىسى بار, سالىنعان ينۆەستيتسيا كولەمى 317,1 ملرد تەڭگەگە جەتكەن. وسى ايماقتىڭ ارقاسىندا وڭىرىمىزدە جاڭادان 4 مىڭ جاڭا جۇمىس ورنى اشىلعان. كەلىپ جاتقان ينۆەستورلاردىڭ ءبىرازى شەتەلدىكتەر.
بۇگىندە اەا قاتىسۋشى 22,4 ملرد تەڭگەگە ىسكە اسىرىلعان 5 جوبا تۇراقتى جۇمىس ىستەپ تۇر. ولاردىڭ قاتارىندا ترانسفورماتور جانە ت.ب. ەلەكتر ونىمدەرىن شىعاراتىن «الاگەۋم ەلەكتريك» ەلەكتروتەحنيكالىق زاۋىتى 300-دەن ارتىق جاڭا جۇمىس ورنىن اشىپ, ءوزىنىڭ جۇمىسكەرلەرىنە جاتاقحانا دا سالىپ بەرگەن.
كومبايندار مەن باسقا دا اۋىل شارۋاشىلىعى تەحنيكالارىن قۇراستىراتىن CLAAS كاسىپورنى 100-دەن اسا جۇمىس ورنىن اشتى, جىل بويى 600 دانا ءونىم شىعارادى. «قازتەحماش» ماشيناجاساۋ زاۋىتى وسى ۋاقىتقا دەيىن SAMPO كومبايندارىن شىعارىپ كەلگەن, بيىلدان باستاپ LiuGong 777A ەكسكاۆاتور-ارتقىشىن شىعارۋدى قولعا الا باستادى. جوبا تولىق ىسكە اسىرىلعاندا جاڭادان 70 جۇمىس ورنى اشىلماق. نەمىس برەندى Reimann كومپانياسى دا «Qyzyljar» اەا قاتىسۋشى بولىپ ەنگەن. قازىر ول جىلىنا 150 دانا اۋىل شارۋاشىلىعى تەحنيكالارىن شىعارادى.
بۇگىندە «Qyzyljar» اەا اۋماعىندا ينۆەستيتسيا كولەمى 275 ملرد تەڭگە بولاتىن 17 ينۆەستيتسيالىق جوبا ىسكە اسىرىلىپ جاتىر. بۇل 3 100-دەن ارتىق جاڭا جۇمىس ورنى اشىلادى دەگەن ءسوز. سونىڭ ىشىندە 380 جاڭا جۇمىس ورنىن قۇرادى دەپ جوسپارلاپ وتىرعان «بەيكەرتون» جشس دا بار. وسى رەسەيلىك فيرما 37,3 ملرد تەڭگەنىڭ جوباسىن ىسكە اسىرۋدا. تولىق قۋاتىنا ەنگەندە زاۋىت جىل سايىن 15 مىڭ توننا ءونىم شىعارماق. سەرىكتەستىكتىڭ باس مەردىگەرى – وتاندىق «BI-ينداستريال» كومپانياسى.
تاعى ءبىر رەسەيلىك «ۋرالكران» كومپانياسى «KazCraneEngineering» كولىكپەن كوتەرۋ كراندارىن شىعاراتىن جوبانى ىسكە اسىردى. ينۆەستيتسيا كولەمى 2 ملرد تەڭگە بولعان بۇل كاسىپورىن جىلىنا 100 دانا ءتۇرلى كراندار شىعارادى. قازىر كومپانيا باسشىلارى جەر قويناۋىن پايدالاناتىن كاسىپورىندارعا ءوز ونىمدەرىن وتكىزۋ تۋرالى كەلىسسوزدەر جۇرگىزۋدە. ال «ECO GLADE» كومپانياسى جەۋگە جارامدى ساڭىراۋقۇلاقتاردىڭ ءارتۇرلى تۇرلەرىن وسىرۋمەن جانە وڭدەۋمەن اينالىساتىن 11,5 ملرد تەڭگەنىڭ جوباسىن ىسكە اسىرۋدا. كاسىپورىن تولىق كۇشىنە ەنگەندە جىلىنا 6 400 توننا ساڭىراۋقۇلاق تۇرلەرىن شىعارىپ, ءوڭىردى تولىق قامتاماسىز ەتەدى دەپ كۇتىلۋدە.
قىتايدىڭ شاندۋندىق كومپانياسى دا قىزىلجار وڭىرىندە اۋىل شارۋاشىلىعى تەحنيكالارى جانە سۋارۋ جۇيەسىن جاسايتىن كاسىپورىن تۇرعىزىپ جاتىر. جوبانىڭ قۇنى – 2 ملرد تەڭگە. كاسىپورىن جىلىنا 1 مىڭ دانا ءونىم شىعارىپ, 50 جۇمىس ورنىن اشادى دەپ جوسپارلانعان.
قىزىلجاردا اراب الەمىنىڭ ەكونوميكاداعى وزىق ەلدەرىنىڭ ءبىرى قاتاردىڭ دا كومپانياسى ءجۇر. قاتارلىق «UltradecorTradingKazakhstan» اتتى بۇل كومپانيا بىزدە ۋلترادەكور اتتى جوعارى ساپالى اعاش ونىمدەرىن جاسايتىن كاسىپورىن سالىپ جاتىر. جوبانىڭ قۇنى – 90 ملرد تەڭگە, جىلدىق قۋاتى 10 ملن شارشى مەتر اعاش ونىمدەرىن شىعارادى. بۇل جوبانى ىسكە اسىرۋعا 75 گەكتار جەر بولىنگەن, تولىق قۋاتىنا جەتكەندە 180 جاڭا جۇمىس ورنىن اشادى.
«Qyzyljar» اەا-نىڭ تايىنشا اۋدانىنداعى سۋبايماعىندا قىتاي كاسىپكەرلەرى اۋىل شارۋاشىلىعى ونىمدەرىن شىعاراتىن كاسىپورىن اشقان. قازىر ونىڭ ونىمدەرى قىتايعا ەكسپورتتالۋدا. سونداي-اق عابيت مۇسىرەپوۆ اۋدانىندا اشىلعان ەكىنشى سۋبايماقتا دا اۋىل شارۋالىعى شيكىزاتتارىن تەرەڭنەن وڭدەيتىن كاسىپورىندار سالۋ قولعا الىنعان.
سولتۇستىك قازاقستان وبلىسى
