ماماندار ەسەبىنشە, ەلىمىزگە كەيىنگى 7 جىلدا سىرتتان قۇنى 55 ملن دوللار بولاتىن 81,9 مىڭ توننا اينا جەتكىزىلىپتى. ودان بولەك جىل سايىن جاقتاۋلى اينالار ءۇشىن 6 ميلليون دوللار جۇمسايمىز. اۆتوكولىكتەگى ارتقى كورىنىس اينالارىن 9 ميلليونعا ساتىپ الاتىنىمىز تاعى بار. سوندىقتان دا ولار «ەلىمىز بويىنشا قىزىلوردادا اشىلعان العاشقى زاۋىت يمپورتقا تاۋەلدىلىكتى ازايتىپ, وسى باعىتتاعى وتاندىق ءوندىرىستى دامىتۋعا جاسالعان ماڭىزدى قادام بولدى» دەسەدى. «AynaGlass» جشس جىلعا دا جەتپەيتىن ۋاقىت ىشىندە جۇزەگە اسىرىلعان جوبا بولىپ وتىر.
كاسىپورىن جىلىنا 720 مىڭ شارشى مەتر اينا شىعارا الادى. بۇل سۇرانىستى 60 پايىزعا دەيىن جاۋىپ, ءىشىنارا ەكسپورتقا شىعۋعا مۇمكىندىك بەرەدى. ۇزىندىعى 186 مەترلىك اۆتوماتتاندىرىلعان جەلى وسى سالاداعى كوشباسشى ەل سانالاتىن قىتاي ەلىنەن جەتكىزىلىپ وتىر. قازىر زاۋىتتا 25 جەرگىلىكتى مامان جۇمىس ىستەيدى, ءوندىرىس تولىق قۋاتىنا جەتكەندە ولاردىڭ قاتارى 60 ادامعا جەتەدى.
سەرىكتەستىك شيكىزاتتى «Orda Glass» شىنى زاۋىتىنان الىپ وتىر. ءوندىرىس ورنىن «ونەركاسىپتى دامىتۋ قورى» قارجىلاندىرىپ وبلىس اكىمدىگى وندىرىستىك ايماقتان دايىن ينفراكۇرىلىممەن 3,6 گەكتار جەر ءبولىپتى. جەرگىلىكتى بيلىك پەن دامۋ ينستيتۋتىنىڭ وسىنداي قولداۋىنىڭ ارقاسىندا قازاقستاندا اينا ءوندىرىسى باستالدى. زاۋىت باسشىسى ايجان ومىرزاقوۆانىڭ ايتۋىنشا, ينۆەستورلار قۇرامى جەرگىلىكتى كاسىپكەرلەردەن تۇرادى.
ءوندىرىس ورنىنداعى جەلى بويىمەن اينەكتەر سىرعىپ كەلەدى. جۋىلىپ, تازالانىپ, كەپتىرىلگەننەن كەيىن ولار ۆاكۋمدىق كامەرالارعا بەرىلەدى. وسى جەردە العاشقى قاباتى بۇركىلىپ, اينەك ايناعا اينالا باستايدى. پەش كامەرالارىندا تاعى ەكى قابات بوياۋ جاعىلادى. ەڭ سوڭىندا مۇلتىكسىز جۇمىس ىستەيتىن روبوتتار قاجەتتى مالىمەتتەردى تاسپالاپ, بەلگىلەر باسادى.
«باستاپقىدا ەۋروپا جانە باسقا دا جەتەكشى ەلدەر ءوندىرىسىن زەرتتەپ كوردىك. اقىرى روبوتتى قۇرىلعىلاردى وندىرۋدە الەمدىك كوشباسشى سانالاتىن قىتاي زاۋىتىنا توقتادىق. بۇل تانىمال برەند ءوز جابدىقتارىن اقش, ەۋروپا مەن تمد ەلدەرىنە جەتكىزىپ وتىر. ءونىمدى وتكىزۋ نارىعى كۇن ساناپ كەڭەيىپ كەلەدى, قازىر ءبىزدىڭ تۇتىنۋشىلارىمىز قاتارىندا الماتى, تۇركىستان وبلىستارى مەن شىمكەنت قالالارىنان ديستريبيۋتورلار بار. ءونىمىمىز ساپاسى تۋرالى جاعىمدى پىكىرلەردى كوپ ەستيمىز. ەندىگى مىندەت – ەلىمىزدىڭ سۇرانىسىن تولىق وتەپ, ەكسپورتقا شىعۋ. ءوڭىر وندىرىسىنە قولداۋ تانىتىپ كەلە جاتقان وبلىس اكىمى نۇرلىبەك نالىباەۆقا العىس بىلدىرگىمىز كەلەدى», دەيدى زاۋىت باسشىسى.
سىر بويى – شىنى كلاستەرىن قۇرۋعا قولايلى ايماق. نەگىزگى شيكىزات – جوعارى ساپالى كۆارتس قۇمىنىڭ قورى بويىنشا قىزىلوردا ەلىمىزدە الدىڭعى قاتاردا تۇر. جاڭادان ىسكە قوسىلاتىن جىلۋ ەلەكتر ورتالىعى ەنەرگيانى كوپ قاجەت ەتەتىن ينۆەستيتسيالىق جوبالاردى جۇزەگە اسىرۋعا مۇمكىندىك بەرەدى. ال كاسىپورىنداردى تۇراقتى گازبەن جابدىقتاۋدى وبلىس اۋماعى ارقىلى وتەتىن بەينەۋ – بوزوي – شىمكەنت ماگيسترالدىق گاز قۇبىرى قامتاماسىز ەتەدى. ءوڭىردىڭ كولىكتىك لوگيستيكالىق الەۋەتى دە ايماقتاعى ينۆەست جوبالاردىڭ كەلەشەگىنە سەنىمدى ۇستەي ءتۇسىپ وتىر.
«Kazakh invest» ۇك» اق وڭىرلىك ديرەكتورى مۇرات بالاباەۆتىڭ پىكىرىنشە, وسى ۋاقىتقا دەيىن اگرارلىق ايماق سانالىپ كەلگەن سىردا جاڭا ونەركاسىپتىك ءداۋىر باستالدى دەپ باتىل ايتۋىمىزعا بولادى.
«شىنى جانە شىنى بۇيىمدارىن ءوندىرۋ – ەلىمىزدەگى يمپورتتى الماستىراتىن, بولاشاعى زور سالالاردىڭ ءبىرى. وڭىردە ىسكە قوسىلاتىن «ارال سودا» زاۋىتى شىنى كلاستەرىنە سەرپىن بەرەتىن جوباعا اينالماق. ويتكەنى سودا ك ۇلى شىنى وندىرىسىنە قاجەتتى بىردەن-ءبىر شيكىزات. وسىلايشا, ءوندىرىس شىعىندارى ايتارلىقتاي تومەندەپ, باسەكەگە قابىلەتى ارتا تۇسپەك.
«كەيىنگى جىلدارى ايماققا وتاندىق جانە شەتەلدىك ينۆەستورلاردى تارتۋ باستاماسى ايتارلىقتاي ناتيجە بەرىپ وتىر. جاڭادان اشىلعان ءوندىرىس ورنى ايماقتا زاماناۋي ونەركاسىپ ورتا قالىپتاسىپ جاتقاندىعىن كورسەتەدى. بۇل تەك باستاماسى عانا. بۇل سالادا ەلىمىز ىشكى سۇرانىستان بولەك باسەكەگە قابىلەتتى ەكسپورتشىعا دا اينالا الادى. مىسالى, ءبىز ۇزاق جىلدار بويى يمپورتتىق ايناعا قاراپ كەلدىك, بۇگىن سونى ءوزىمىز جاساپ وتىرمىز. بۇل شىن مانىندە وندىرىستەگى ۇلكەن وزگەرىستەردىڭ باستاۋى», دەيدى م.بالاباەۆ.
قىزىلوردا
