تۋىندى مەملەكەت جۇمساعان قاراجاتتى تولىق قايتارىپ قانا قويماي, ونى بەس ەسە ارتتىردى. بۇل جەتىستىك مەملەكەتتىك قولداۋدىڭ ناتيجەلى بولعانىن ايقىنداپ, كورەرمەننىڭ وتاندىق كينوعا دەگەن سەنىمىن نىعايتا ءتۇستى. مەملەكەت باسشىسىنىڭ تاپسىرماسى بويىنشا مادەنيەت جانە اقپارات مينيسترلىگى «كينەماتوگرافيا تۋرالى» زاڭعا وزگەرىستەر مەن تولىقتىرۋلار ەنگىزۋ جۇمىستارىن جۇرگىزۋ ۇستىندە. بۇلار فيلمدەردى پروكاتقا دەيىنگى ساراپتاۋ ءراسىمىن جەتىلدىرۋگە جانە ۇلتتىق فيلمدەردىڭ ساپاسىن ارتتىرۋعا باعىتتالعان.
جىلدىڭ ماڭىزدى جەتىستىكتەرىنىڭ ءبىرى – «قازاقفيلم» كينوستۋدياسىنا مەملەكەتتىك قولداۋدىڭ قايتا جاندانۋى. ۇجىم قازاق كينوسىنىڭ التىن قورىن قالپىنا كەلتىرىپ جاتىر.
«Qaitadan» ءفيلمىنىڭ رەجيسسەرى دۋمان ەركىمبەك مەملەكەتتىك قولداۋدىڭ ماڭىزىن اتاپ ءوتتى.
«Qaitadan» ءفيلمى اقتاۋدا وتكەن «قورقىت اتا» فەستيۆالىن اشتى. سونىمەن قاتار ريمدە وتكەن قازاقستان كينوسى اپتالىعىنىڭ ءبىرىنشى كۇنى كورسەتىلدى. بۇدان بولەك, جاس رەجيسسەرلەر مەن پروديۋسەرلەرگە ارنالعان شانحاي ىنتىماقتاستىق ۇيىمى باعدارلاماسى اياسىندا قىتايدا تاعىلىمدامادان ءوتۋ مۇمكىندىگىنە يە بولدىم. مەملەكەتتىك قولداۋ قازاق كينوسىنىڭ جاڭا دەڭگەيدە دامۋىنا مۇمكىندىك بەرەدى», دەدى ول.
وتاندىق «باۋىرىنا سالۋ», «شاتىرداعى ەكەۋ», «پريانيكي دليا ەە وتتسا, موەگو پرادەدا, ەە دەدا», «پوبەديتەلەي ۆيدنو نا ستارتە» جانە باسقا دا فيلمدەر اقش, رەسەي, فرانتسيا, يتاليا, قىتاي جانە وزگە ەلدەردە وتكەن حالىقارالىق كينوفەستيۆالدەرگە ۇسىنىلىپ, 30-دان استام بەدەلدى ماراپاتقا يە بولدى.
اكتەر باقىت قاجىباەۆتىڭ جەتىستىگىن دە ەرەكشە اتاپ وتكەن ءجون. ول شىۇ ەلدەرىنىڭ كينوفەستيۆالىندە «ۇزدىك اكتەر» نوميناتسياسىن يەلەندى. فەستيۆال قىتايدىڭ چۋنتسين قالاسىندا ءوتتى, وندا اكتەر «نابات وپەراتسياسى» فيلمىندەگى ءرولى ءۇشىن ماراپاتتالدى.
قازاقستان كينوسىنىڭ كۇندەرى 15-تەن استام ەلدە ءوتتى. اتاپ ايتساق, گرەكيا, قىرعىزستان, البانيا, فرانتسيا, نورۆەگيا, يتاليا, چەحيا, جاپونيا, تۇركيا, سينگاپۋر, ازەربايجان, رەسەي, بەلگيا, وزبەكستان جانە باسقا دا مەملەكەتتەردە وتاندىق كينو كورسەتىلدى.
