«ەڭبەگىم – ەلىمە: ادال ەڭبەك, ايقىن ماقسات» تاقىرىبىندا وتكەن فورۋمدا اتاۋلى جىلدا اتقارىلعان اۋقىمدى جۇمىس جان-جاقتى سارالانىپ, ۇزدىكتەر ماراپاتتالدى.
- جۇمىسشى ماماندىقتار جىلى اياقتالعانىمەن, ەڭبەك ادامىنا دەگەن قۇرمەت تولاستامايدى. بىلىكتى مامان, وتانشىل ازاماتتار قاي كەزدە دە ەلىمىز ءۇشىن كەرەك. سوندىقتان بۇل باعىتتاعى جۇمىس الداعى ۋاقىتتا جالعاسا بەرەدى, دەدى وبلىس باسشىسى ە. قاراشوكەەۆ فورۋمنىڭ اشىلۋ سالتاناتىندا سويلەگەن سوزىندە.
اتاۋلى جىل اياسىندا وڭىردە بىرقاتار ماڭىزدى جۇمىس اتقارىلدى. اتاپ ايتقاندا, جەرگىلىكتى بيۋدجەتتەن 223 ملن تەڭگە ءبولىنىپ, 6 سالالىق حاب اشىلدى. «Knauf» جشس, «الينا» جشس, «مەراگرو» جشس ەسەبىنەن 4 كوللەدجگە جالپى قۇنى 46 ملن تەڭگەنىڭ زاماناۋي قۇرال-جابدىقتارى الىندى. سونداي-اق وڭىردەگى كوللەدجدەر, جوعارى وقۋ ورىندارى مەن كاسىپورىندار اراسىندا 116 ىنتىماقتاستىق تۋرالى مەموراندۋمعا قول قويىلدى. بۇل تۇلەكتەردىڭ جۇمىسپەن قامتىلۋ مۇمكىندىكتەرىن ارتتىرىپ, ماماندىقتار بويىنشا وقۋ باعدارلامالارىن جاڭارتۋعا مۇمكىندىك بەردى.
بۇگىندە وبلىس حالقىنىڭ سانى 1 ملن 200 مىڭنان اسادى. سونىڭ ىشىندە 357 مىڭنان استامى – جاستار. ياعني, جاستار ءوڭىر تۇرعىندارىنىڭ 29,2 پايىزىن قۇرايدى. بيىل 24 مىڭنان استام جاس جۇمىسپەن قامتىلىپ, جاڭا ماماندىقتاردى مەڭگەردى.
جۇمىسشى ماماندىقتار جىلى اياسىندا وڭىردە 4 حالىقارالىق, 2 رەسپۋبليكالىق جانە 11 وبلىستىق دەڭگەيدەگى ءتۇرلى ءىس-شارا ۇيىمداستىرىلدى.
فورۋم سوڭى ماراپاتتاۋ راسىمىنە ۇلاستى. باسقوسۋدا «ەڭ ۇزدىك جۇمىس بەرۋشىلەر» بايقاۋى اياسىندا «يننوۆاتسيا مەن تەحنولوگياداعى ۇزدىك سەرىكتەستىك», «ۇزدىك ستراتەگيالىق سەرىكتەستىك», «ۇزدىك الەۋمەتتىك سەرىكتەستىك», «ستۋدەنتتەردى قولداۋداعى ۇزدىك سەرىكتەستىك» نوميناتسيالارى بويىنشا جەڭىمپازدار ماراپاتتالدى.
تاراز
