فوتو: ۆيدەوكادر (ارحيۆ)
دەپۋتاتتىڭ ايتۋىنشا, ۇسىنىلىپ وتىرعان تۇزەتۋلەردىڭ نەگىزگى ءمانى – مەملەكەتتىك قولداۋدى نەعۇرلىم نىسانالى, تۇسىنىكتى جانە ناتيجەلى ەتۋ.
«ەڭ الدىمەن, بۇل تۋريستىك ينفراقۇرىلىمعا جۇمسالعان شىعىنداردىڭ ءبىر بولىگىن وتەۋگە قاتىستى. مۇنداي نىساندارعا ناقتى تالاپتاردى بەلگىلەۋ وتەماقىنىڭ ماقساتتى ءارى نەگىزدى بولۋىن قامتاماسىز ەتىپ, ساپا مەن قولجەتىمدىلىكتىڭ زاماناۋي ستاندارتتارىنا ساي كەلەتىن ۆيزيت-ورتالىقتار مەن تۋريستەردى ورنالاستىرۋ ورىندارىن قۇرۋعا جانە جاڭعىرتۋعا ىنتالاندىرادى. بۇل, اسىرەسە, باسىم تۋريستىك اۋماقتار ءۇشىن ماڭىزدى. سونىمەن قاتار مۇنداي ءتاسىل قاجەتتى ناتيجە بەرمەيتىن جانە تۋريزم سالاسىنداعى مەملەكەتتىك ساياساتتىڭ ماقساتتارىنا قول جەتكىزۋدى قامتاماسىز ەتپەيتىن نىسانداردى قولداۋ تاۋەكەلدەرىن بارىنشا ازايتادى», دەدى ن. شاتالوۆ.
ونىڭ سوزىنشە, ودان ءارى زاڭ جوباسى ۋاكىلەتتى ورگاننىڭ وزگە دە قولداۋ شارالارىنا قويىلاتىن تالاپتاردى بەلگىلەۋ جونىندەگى وكىلەتتىكتەرىن بەكىتەدى.
«اتاپ ايتقاندا, بىرىنشىدەن – ەل ىشىندە كامەلەتكە تولماعان جولاۋشىلاردى تاسىمالداۋ كەزىندە ءتۋرونىم قۇرامىنا ەنگىزىلگەن اۋە بيلەتتەرىنىڭ قۇنىن سۋبسيديالاۋ كوزدەلەتىن تۋريستىك ونىمگە قويىلاتىن تالاپتار; ەكىنشىدەن – ءاربىر شەتەلدىك تۋريست ءۇشىن كەلۋ تۋريزمىمەن اينالىساتىن تۋروپەراتورلاردىڭ شىعىندارىن سۋبسيديالاۋ. ياعني قولداۋ ناقتى ناتيجە مەن ەكونوميكالىق تيىمدىلىككە باعدارلانادى», دەدى ءماجىلىس دەپۋتاتى.
نيكيتا شاتالوۆتىڭ پىكىرىنشە, جەرگىلىكتى اتقارۋشى ورگانداردىڭ ءرولى دە كۇشەيتىلەدى. ولار باسىم تۋريستىك اۋماقتاردىڭ شەكارالارىن ايقىنداپ, مەملەكەتتىك قولداۋ ەسەبىنەن سالىنعان نەمەسە جاڭعىرتىلعان نىسانداردىڭ ساقتالۋىن جانە ماقساتتى تۇردە پايدالانىلۋىن باقىلاۋعا مۇمكىندىك الادى.
«زاڭ جوباسىنىڭ ەكىنشى بولىگى بالالار جانە بۇقارالىق سپورتقا ارنالعان. دەپۋتاتتاردىڭ تۇزەتۋلەرىن ەسكەرە وتىرىپ, بالالار-جاسوسپىرىمدەر سپورت مەكتەپتەرى ءۇشىن جان باسىنا شاققانداعى نورماتيۆتىك قارجىلاندىرۋ جانە E-Sport تسيفرلىق پلاتفورماسى ەنگىزىلەدى. بۇل ءبىر سپورتشىعا جۇمسالاتىن شىعىندى جىلىنا 415 مىڭ تەڭگەگە دەيىن ارتتىرۋعا (قازىرگى ورتاشا دەڭگەيى شامامەن 233 مىڭ تەڭگە) جانە بىلىكتىلىك ءۇشىن قوسىمشا تولەمدەر ارقىلى جاتتىقتىرۋشىلاردىڭ ەڭبەكاقىسىن كوبەيتۋگە مۇمكىندىك بەرەدى. E-Sport پلاتفورماسى سالاداعى ەسەپكە الۋ, باسقارۋ جانە تالداۋ جۇمىستارىن قامتاماسىز ەتىپ, باسقا اقپاراتتىق جۇيەلەرمەن دەرەكتەر الماسۋدى جولعا قويادى», دەدى ول.
دەپۋتات اتاپ وتكەندەي, زاڭ جوباسى مۇقيات پىسىقتالعان: بارلىعى 110 تۇزەتۋ ۇسىنىلىپ, جالپى 19 وتىرىستا قارالدى. ال قورىتىندى سالىستىرمالى كەستە 75 تارماقتان تۇرادى.
«ۇسىنىلىپ وتىرعان وزگەرىستەر ءتۋريزمدى قولداۋدى ساپالى ءارى باقىلاۋعا بولاتىن دەڭگەيگە كوتەرەدى. ال بالالار سپورتىن قارجىلاندىرۋ مەن باسقارۋ تۇرعىسىنان اناعۇرلىم تۇراقتى ەتەدى. زاڭ جوباسىن ەكىنشى وقىلىمدا قولداپ, ونى سەناتتىڭ قاراۋىنا جىبەرۋدى سۇرايمىن», دەپ تۇيىندەدى بايانداماسىن ن.شاتالوۆ.
