فوتو: x.com/ZelenskyyUa
ماڭىزدى كەزدەسۋدەن كەيىن ۆلاديمير زەلەنسكي مەن دونالد ترامپ ءباسپاسوز جيىنىن وتكىزىپ, كەلىسسوز بارىسىندا دونباسس ماسەلەسى شەشىمىن تاپپاعانىن مالىمدەدى. دەسە دە اق ءۇي باسشىسى وڭ ناتيجەگە جەتۋگە جاقىنداي تۇسكەنىن ايتتى.
«بۇل ماسەلە ءالى شەشىلگەن جوق. بىراق ءبىز شەشىمگە كەلۋگە الدەقايدا جاقىنداي تۇستىك. بۇل وتە كۇردەلى ماسەلە. دەگەنمەن مەن ونى شەشەتىنىمىزگە سەنىمدىمىن», دەدى ترامپ.
ترامپتىڭ سوزىنشە, ماسەلەگە نۇكتە قويۋ ءۇشىن 1–2 عانا سۇراقتىڭ شەشىمىن تابۋ كەرەك. سونداي-اق ول رەسەي–ۋكراينا اراسىنداعى سوعىستى توقتاۋعا مۇمكىندىك بەرسە, ۋكرايناعا بارۋعا دا ءازىر ەكەنىن اتاپ ءوتتى.
ال زەلەنسكي اتالعان كەلىسسوز اياسىندا كوتەرىلگەن ماسەلەنىڭ 90%-ى شەشىمىن تاۋىپ, قاۋىپسىزدىك كەپىلدىگى جونىندەگى سۇراق تولىق شەشىمىن تاپقانىن جەتكىزدى. ەۋروپا ءالى دە ۋكراينا قاۋىپسىزدىگىنىڭ باسىم جۇگىن ءوز جاۋاپكەرشىلىگىنە الىپ وتىرعانىن ايتا كەتكەن ءجون.
ۋكراينا پەرزيدەنتى كەلىسىمنىڭ كەي تارماقتارى بويىنشا رەفەرەندۋم وتكىزۋگە قارسى ەمەس ەكەنىنە نازار اۋداردى.
ترامپ بەيبىت كەلىسىمگە كەلۋ پروتسەسى سوزىلعان سايىن ۋكراينا بۇدان دا كوپ اۋماقتان ايىرىلۋى مۇمكىن ەكەنىن دە ەسكەرتتى.
«ۋكراينانىڭ قازىر مامىلە جاساعان دۇرىس, ايتپەسە ولار كوبىرەك اۋماعى مەن ادامدارىنان ايىرىلادى», دەدى ترامپ.
كەلىسسوز بارىسىندا اقش تاراپىنان رۋبيو, حەگسەت, ۆيتكوفف, كۋشنەر جانە گەنەرال كەين ۋكراينا بويىنشا جۇمىس توبىنا قوسىلعان. ولار بەيبىت كەلىسىمگە كەلۋ ماقساتىندا رەسەيمەن جۇمىس ىستەيتىن بولادى.
ءباسپاسوز بارىسىندا ترامپ كەلىسسوزگە دەيىن رەسەي پرەزيدەنتى ۆ.پۋتينمەن ءبىر ساعاتتان استام تەلەفون ارقىلى سويلەسكەنىن حابارلادى. اق ءۇي باسشىسى اڭگىمەلەسۋ بارىسىندا رەسەي باسشىسى ۋكراينانى قالپىنا كەلتىرۋگە كومەكتەسەتىنىن ايتقانىن مالىمدەپ, ءپۋتيننىڭ بۇل قادامىن «جومارت قادام» دەپ باعالادى.
بۇعان دەيىن اقش وكىلدەرى رەسەيگە بارىپ, كرەملدە 5 ساعاتقا جۋىق بەيبىتشىلىك جوسپارىن تالقىلاعان ەدى.
ال زەلەنسكي ەلدە سايلاۋ وتكىزۋگە دايىن ەكەندىگىن مالىمدەگەن بولاتىن.
