ءىس-شارا بارىسىندا ماۋلەن اشىمباەۆ ازاماتتاردىڭ دەنساۋلىعىن ساقتاۋ مەملەكەتتىڭ باسىم باعىتتارىنىڭ ءبىرى سانالاتىنىن جانە وسى سالادا جۇيەلى جۇمىس جۇرگىزىلىپ جاتقانىن اتاپ ءوتتى. ول اتالعان سالانىڭ اسا ماڭىزدى ەكەنىن ايتىپ, بۇل باعىتتىڭ ادام كاپيتالىنا, الەۋمەتتىك تۇراقتىلىققا, ءومىر ساپاسىنا جانە ەلدىڭ جالپى ەكونوميكالىق دامۋىنا تيگىزەتىن اسەرىنە نازار اۋداردى.
كەزدەسۋدە مەملەكەت قابىلداعان كەشەندى شارالارعا قاراماستان, بارلىق مۇددەلى تاراپتىڭ بىرلەسكەن كۇش-جىگەرىن قاجەت ەتەتىن پروبلەمالار بار ەكەنى ءسوز بولدى. ولاردىڭ قاتارىندا سوزىلمالى كۇيزەلىس پەن تاۋەلدىلىكتىڭ سالدارى, سۋيتسيد, اسىرەسە اۋىلدىق جەرلەردەگى مامان تاپشىلىعى, ەمدەۋ مەن كومەك كورسەتۋدىڭ ەسكىرگەن حاتتامالارى سياقتى ماسەلەلەر وتە وزەكتى. مۇنداي جاعداي كەيدە ستيگماتيزاتسيانى كۇشەيتىپ, پاتسيەنتتەردىڭ دەنساۋلىعىنا قاۋىپ ءتوندىرۋى دە مۇمكىن.
«پرەزيدەنت قاسىم-جومارت توقاەۆ ۇلت دەنساۋلىعى ەلدىڭ باستى بايلىعى ەكەنىن ۇنەمى ايتىپ كەلەدى. بۇگىندە دەنساۋلىق ساقتاۋ جۇيەسىن دامىتۋعا جانە دارىگەرلەردى قولداۋعا قاتىستى كەشەندى رەفورمالار جۇزەگە اسىرىلىپ جاتىر. دەگەنمەن قازىر كادر تاپشىلىعىنا بايلانىستى دەنساۋلىق ساقتاۋ جۇيەسى پسيحولوگيالىق جانە پسيحياتريالىق كومەك سالاسىندا ايتارلىقتاي ماسەلەلەر بار. كەيىنگى 20 جىلدا قابىلدانعان شارالارعا جانە ءولىم-ءجىتىم دەڭگەيىنىڭ بىرتىندەپ تومەندەۋىنە قاراماستان, وكىنىشكە قاراي, ەلدەگى سۋيتسيد كورسەتكىشى ازايماي وتىر. دۇنيەجۇزىلىك دەنساۋلىق ساقتاۋ ۇيىمىنىڭ باعالاۋى بويىنشا, قازاقستاندا سۋيتسيدتەن بولاتىن ءولىم-ءجىتىم سانى الەمدىك ورتاشا كورسەتكىشتەردەن اسىپ تۇسەدى. اسىرەسە جاستار اراسىندا ءجيى كەزدەسەدى. ءوز-وزىنە قول جۇمساۋ كوبىنە قۇمار ويىندار مەن ەسىرتكىگە تاۋەلدىلىكتەن زارداپ شەگەتىن ادامداردا بولادى. جاسىراتىنى جوق, لۋدومانيا ۇلكەن الەۋمەتتىك ماسەلەگە اينالدى. وسى ورايدا حالىقتىڭ قولجەتىمدى پسيحولوگيالىق وڭالتۋ شارالارى تۋرالى حاباردار بولۋىن قامتاماسىز ەتۋ جانە قولدانىستاعى پسيحولوگيالىق قولداۋ شارالارىنىڭ تيىمدىلىگىن ارتتىرۋ ىسىندە مەملەكەتتىك ورگاندارعا ەرەكشە جاۋاپكەرشىلىك جۇكتەلەدى», دەدى سەنات توراعاسى.
م.اشىمباەۆ اتاپ وتكەندەي, قاجەتتى كومەك پەن ەمدەۋدى دۇرىس ۇيىمداستىرۋ ءۇشىن دارىگەرلىك جانە كونسۋلتاتسيالىق تاسىلدەردى اجىراتۋ اسا ماڭىزدى. سونداي-اق دياگنوستيكانىڭ ناقتى جۇيەسى بولۋعا ءتيىس. قولداۋعا جۇگىنۋ جاۋاپسىز قالماي, دەر كەزىندە قاجەتتى شارالار قولعا الىنۋى كەرەك.
سونىمەن قاتار پالاتا سپيكەرى ورنىقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيانىڭ دەنساۋلىق ساقتاۋ باعىتىندا جۇرگىزىپ جاتقان جۇمىسىنا توقتالىپ, ورتالىقتىڭ قىزمەتكەرلەرى مەن ەمدەلۋشىلەرىن الداعى مەرەكەلەرمەن قۇتتىقتادى.
ايتا كەتەيىك, «قامقورلىق» ەرتە ارالاسۋ ورتالىعى 2022 جىلى اشىلدى. سودان بەرى اتالعان نىسان 3 ايدان 3 جاسقا دەيىنگى پسيحونەۆرولوگيالىق جانە اقىل-وي كەمىستىگى بار بالالارعا امبۋلاتوريالىق-ەمحانالىق وڭالتۋ كومەگىن كورسەتىپ كەلەدى. وسى ۋاقىت ىشىندە رەابيليتولوگ, نەۆروپاتولوگ, لوگوپەد, دەفەكتولوگ, پسيحولوگ, ەمدىك دەنەشىنىقتىرۋ جانە كاسىپتىك تەراپيا ماماندارى 514 بالاعا كەشەندى وڭالتۋ شارالارى بويىنشا قىزمەت كورسەتتى.
پسيحوالەۋمەتتىك وڭالتۋ ورتالىعىندا پسيحيكالىق جانە مىنەز-ق ۇلىق بۇزىلىستارى بار ادامدار ءۇشىن 7 ەمدەۋ-ەڭبەك شەبەرحاناسى ۇيىمداستىرىلعان. اتاپ ايتقاندا, تىگىن, قولونەر, اعاش ۇستاسى شەبەرحانالارى جانە شاعىن باسپاحانا مەن ونەر ستۋدياسى بار. ورتالىقتا پسيحيكالىق اۋىتقۋلارى بار, سونىڭ ىشىندە اۋتيزم سپەكترىنىڭ بۇزىلۋى, پسيحو-سويلەۋ دامۋىنىڭ كەشىگۋى, گيپەربەلسەندىلىك جانە زەيىن جەتىسپەۋشىلىك بەلگىسى بار بالالار ءۇشىن كۇندىزگى ستاتسيونار جۇمىس ىستەيدى.
