قاباش اعا سۇراپىل سوعىس جىلدارىنان باستاپ كەڭەس وداعىنىڭ قۋاتتى تىل ورتالىعى قاراعاندى كومىر باسسەينىندە ەڭبەك ەتكەن. نەبارى 16 جاستاعى قاباش اعانىڭ سول كەزدەگى اۋىر جاعدايدا جۇمىس ىستەگەنى تۋرالى ايتقانىن دايىرعا قىدىرىپ بارعاندا ءوز اۋزىنان تالاي مارتە ەستىگەن ەدىم. ول كىسىنىڭ ەكى ۇلى فايزراحمان, ۋاليحانمەن بالا كەزدەن دوس بولدىق. كۇمىس كومەي ءانشى فايزراحمان اۋداننىڭ مادەنيەتى مەن ونەرىن العا سۇيرەۋدە كوپ ەڭبەك ءسىڭىردى. دوسىمىز دا وتكەن جىلى قايتىس بولدى. ال ءۋاليحان قاباش ۇلى ەسەپ-قيساپ سالاسىندا ۇزاق جىلدار جەمىستى ەڭبەك ەتتى. ۋاليحانعا اۋدان جۇرتشىلىعى رازى شىعار, سوناۋ 90-جىلداردىڭ باسىندا زايسان اۋدانىنىڭ سەمەي پوليگونى جونىندەگى ەكولوگيالىق اپات ايماعى بولۋىنا كوپ ەڭبەك ءسىڭىردى. قازىر استانا قالاسىندا تۇرادى.
قاباش اعا مەن جۇبايى فاۋزيا قۇربانقىزى قاراعاندىدا شاحتادا جۇمىس ىستەپ جۇرگەن كەزدە تانىسادى. ءبىر-ءبىرىن ۇناتقان قازاق جىگىتى مەن باشقۇرت قىزىنىڭ ماحابباتى جاراسىپ, 1947 جىلى وتاۋ قۇرادى. شاحتادا 1954 جىلعا دەيىن جۇمىس ىستەگەن ولار زايسان اۋدانى «كەندىرلىك» كەڭشارىنىڭ ورتالىعى دايىر اۋىلىنا كوشىپ كەلەدى دە, العاشقىلاردىڭ ءبىرى بولىپ ەلەكتر جۇيەسىن ءوز قولىمەن ورناتا باستايدى. كەيىن بۇكىل اۋلەت – ءوزى, بالالارى مەن نەمەرەلەرى وسى ەلەكتر سالاسىندا جەمىستى ەڭبەك ەتتى.
1977 جىلى اۋداندا «التايەنەرگو» ەلەكتر تورابى قۇرىلدى. 1997 جىلى قاباش اعا ەڭبەك دەمالىسىنا شىقتى. اكە جولىن بالالارى تولەۋحان مەن زەينەتولدا جالعاستىرىپ, وسى سالادا قىزمەت ەتتى. وزەكتى ورتەيتىن وكىنىش, ەكەۋى دە قازىر ارامىزدا جوق. ەنەرگەتيكا سالاسىندا بۇل كۇندەرى اۋلەتتىڭ راۆيل, جانبولات سىندى ءبىلىمدى دە بىلىكتى ازاماتتارى جۇمىس ىستەپ جاتىر.
اۋداننان تۇڭعىش شىققان ەلەكتر سالاسىنىڭ ارداگەرلەرىن جەرلەستەرى ۇمىتپاعان ەكەن. بيىل دايىر اۋىلىندا ايتۋلى وقيعا بولدى. اۋداننىڭ ءوسىپ-وركەندەۋىنە ەلەۋلى ۇلەس قوسقان قاباش تۇردىبەكوۆ پەن ەكى ۇلى تولەۋحان مەن زەينەتولداعا اۋىل ورتالىعىندا ەسكەرتكىش تاقتا اشىلدى. سالتاناتتى جيىنعا استانا مەن الماتىدان, وسكەمەننەن مەيماندار كەلدى. قۇرمەتتى قوناقتار قاتارىنان كەزىندە باسشىلىق قىزمەتتەر اتقارعان مارات ءىزباستين, تالعات قۇسايىنوۆ, ەربولات الپيەۆ, اۋدان باسشىلارى, باسقا دا ازاماتتار ءسوز الىپ, قاباش اعا مەن ۇرپاقتارىنىڭ وسى سالاعا ەرەكشە ەڭبەك سىڭىرگەنىن جان-جاقتى باياندادى. قاباش اعا ۇلدارى مەن نەمەرەلەرىنە جاۋاپتى دا كۇردەلى ماماندىقتى شەبەر مەڭگەرۋ قاجەتتىگىن ساناسىنا قۇيا بىلگەن. جالپى, زايساندىق ارداگەر ق.تۇردىبەكوۆ اۋلەتىنىڭ ەلەكتر جۇيەسى سالاسىنداعى ەڭبەك ءوتىلى 200 جىلدان اسادى. اتاكاسىپكە, ماماندىققا ادالدىق دەگەن وسى بولسا كەرەك. جيىن بارىسىندا اۋىلداعى ءبىر كوشەنى سوعىس جانە ەڭبەك ارداگەرى ق.تۇردىبەكوۆتىڭ ەسىمىمەن اتاسا, كەيىنگى ۇرپاققا ونەگە بولار ەدى دەگەن دە ويلار ايتىلدى.
وڭداسىن ەلۋباي,
قازاقستاننىڭ قۇرمەتتى ءجۋرناليسى
شىعىس قازاقستان وبلىسى,
زايسان اۋدانى
