قىرعىزستان باسشىسى جاقىندا عانا وتكەن سايلاۋدا داۋىس بەرۋشىلەردىڭ نەبارى 37 پايىزى كەلگەن (وتكەن سايلاۋداعىدان 200 مىڭ ادامعا عانا كوپ) پارلامەنت سايلاۋىنداعى سايلاۋشىلار سانىنىڭ ازدىعى تۋرالى پىكىر ءبىلدىردى. پرەزيدەنتتىڭ سوزىنە قاراعاندا سايلاۋدا قاشىقتان داۋىس بەرۋ مۇمكىندىگى جاسالعان. سونداي-اق داۋىس بەرۋ ۋچاسكەلەرى بازارلار مەن ساۋدا ورتالىقتارىندا جانە شەت مەملەكەتتەردە دە ۇيىمداستىرلعان.
– مەن كورسەتكىش 70 پايىزعا جەتەدى دەپ ۇمىتتەندىم. ءبىز ءوزىمىز وتە بەيقامبىز, ءسويتىپ وتىرىپ, دەپۋتاتتاردى سىناعاندى جاقسى كورەمىز. سايلاۋ ۋچاسكەسىنە كوبىنە داۋسىن «ساتاتىندار» كەلەدى, ال داۋسىن ساتپايتىندار سايلاۋعا كەلمەيدى جانە بۇل ىسكە سەلقوس قارايدى, – دەدى ول.
پرەزيدەنت جوگوركۋ كەنەش دەپۋتاتتارىنا ەلدىڭ ءاربىر ازاماتىن داۋىس بەرۋگە مىندەتتەيتىن قۇجات دايىنداۋدى تاپسىردى. قۇجاتقا سينگاپۋر تاجىريبەسىنىڭ نەگىزىندە سايلاۋعا كەلمەگەنى ءۇشىن ايىپپۇل سالۋ جانە ەندىگى سايلاۋدا داۋىس بەرۋ قۇقىعىنان ايىرۋ جازاسىن ەنگىزۋدى ۇسىندى.
ەسكە سالا كەتەيىك, 25-26 جەلتوقسان كۇندەرى بىشكەكتە مەملەكەت باسشىسىنىڭ, مينيسترلەر كابينەتىنىڭ مۇشەلەرىنىڭ, پارلامەنت دەپۋتاتتارىنىڭ, مەملەكەتتىك ورگاندار مەن جەرگىلىكتى ءوزىن-ءوزى باسقارۋ وكىلدەرىنىڭ, سونداي-اق ەلدىڭ بارلىق وڭىرلەرىنەن كەلگەن 690 دەلەگاتتىڭ قاتىسۋىمەن IV حالىقتىق قۇرىلتاي ءوتتى.
قۇرىلتاي وتىرىسىندا پرەزيدەنت قىرعىزستاننىڭ دامۋىنا تىكەلەي اسەر ەتەتىن قوعامدىق ماڭىزى زور ماسەلەلەر مەن باسىم باعىتتاردى كوتەردى. نەگىزگى نازار مۇعالىم مەن دارىگەر ماماندىقتارىنىڭ بەدەلىن ارتتىرۋعا, ازاماتتاردى الەۋمەتتىك قورعاۋعا, ءبىلىم بەرۋ, دەنساۋلىق ساقتاۋ, مادەنيەت جانە سپورت سالالارى قىزمەتكەرلەرىنىڭ جالاقىسىن وسىرۋگە, سونداي-اق ايەلدەر مەن بالالارعا قاتىستى زورلىق-زومبىلىقتى تۇبەگەيلى جويۋ ماسەلەسىنە اۋدارىلدى.
