فوتو: gov.kz
تەرىس پيعىلدى ادامدار اقشالاي قاراجاتتى جىمقىرۋ ماقساتىندا مەسسەندجەرلەر (WhatsApp نەمەسە Telegram) ارقىلى ازاماتتارعا قوڭىراۋ شالىپ, وزدەرىن ۇلتتىق بانكتىڭ جانە باسقا دا مەملەكەتتىك ورگانداردىڭ قىزمەتكەرلەرى رەتىندە تانىستىرادى. بۇعان قوسا, ءپروفيلىنىڭ شىنايى ەكەنىنە ادامداردى سەندىرۋ ءۇشىن مەسسەندجەردە ۆەدومستۆولاردىڭ رەسمي رەسۋرستارىنداعى سۋرەتتەر مەن ەمبلەمالاردى پايدالانادى, «رەسمي بلانكىلەردەگى» جالعان قۇجاتتاردى, اشىق دەرەك كوزدەرىنەن الىنعان ءبىرىنشى باسشىلاردىڭ مورلەرى مەن قولدارى قويىلعان انىقتامالاردى, قىزمەتتىك كۋالىكتەردى جىبەرەدى.
قاسكويلەر جالعان قۇجاتتاردى, ەموتسيالاردى پايدالانىپ, الداۋ جانە پسيحولوگيالىق قىسىم كورسەتۋ ارقىلى ازاماتتاردىڭ سەنىمىنە كىرىپ, اسىعىس جاعداي تۋدىرادى, سودان كەيىن بەلگىسىز بىرەۋلەردىڭ كرەديت رەسىمدەگەلى جاتقانى نەمەسە قازىرگى ۋاقىتتا رەسىمدەيتىنى تۋرالى حابارلايدى. سونىمەن قاتار, الاياقتىقتىڭ الدىن الۋعا نەمەسە «ەسكى كرەديتتەردى ەسەپتەن شىعارۋعا كومەكتەسۋدى سىلتاۋراتا وتىرىپ, الدانىپ قالعان ازاماتتارعا ميكروكرەديتتەر نەمەسە قارىزدار رەسىمدەيدى. بۇل ماقساتتا تەرىس پيعىلدى ادامدار مەملەكەتتىك پورتالداردان نە ەكىنشى دەڭگەيدەگى بانكتەردەن كەلىپ تۇسكەن سمس-كودتاردى سۇراتادى.
تەرىس پيعىلدى ادامدار وزدەرىن ۇلتتىق بانكتىڭ قىزمەتكەرلەرى رەتىندە تانىستىرىپ, جالعان حاتتار جىبەرەدى, حاتتاردا جىبەرۋشىنىڭ شەت تىلىندەگى قۇجاتتاردى سالۋىنا بايلانىستى ونىڭ اتىنا اقشا اۋدارۋدى توقتاتا تۇراتىنى تۋرالى حابارلايدى جانە ولار وسى «اۋدارىلاتىن اقشانى» الۋ ءۇشىن قۇجاتتاردىڭ رەسمي اۋدارۋ اقىسىن تولەۋدى ۇسىنادى, اقشا اۋدارىلعاننان كەيىن كەرى قايتارىلادى دەپ سەندىرەدى.
وسى ايتىلعانداردى ەسكەرە وتىرىپ, ۇلتتىق بانك ازاماتتاردى قىراعى بولۋعا, بەلگىسىز تۇلعالاردان كەلىپ تۇسكەن قۇجاتتاردى جانە قوڭىراۋلاردى تەكسەرۋگە, سمس-كودتاردى, جەكە جانە دەربەس دەرەكتەردى جىبەرمەۋگە, سونداي-اق ءۇشىنشى تۇلعالارعا اقشا اۋدارماۋعا شاقىرادى.
ۇلتتىق بانك قىزمەتكەرلەرى اۋديو جانە بەينەقوڭىراۋلار شالمايتىنىن, جەكە تۇلعالاردىڭ شوتتارىنا قىزمەت كورسەتپەيتىنىن, ءتۇرلى ينۆەستيتسيالىق پاي قورلارى مەن قارجى ونىمدەرىنە قارجىلىق سالىم سالۋدى ۇسىنبايتىنىن, اقشالاي قاراجاتتى ساقتاندىرۋمەن اينالىسپايتىنىن, سونداي-اق حالىقپەن اقشالاي ەسەپ ايىرىسۋ جۇرگىزبەيتىنىن ەسكە سالدى.
