جۇمىسشى ماماندىقتار جىلىن قورىتىندىلاۋعا ارنالعان وبلىستىق فورۋمعا ايماق باسشىسى نۇرىمبەت ساقتاعانوۆ قاتىستى.
– مەملەكەت باسشىسى قاسىم-جومارت توقاەۆ جاريالاعان جۇمىسشى ماماندىقتار جىلى ەلىمىز ءۇشىن ەرەكشە ماڭىزعا يە بولدى. بۇگىنگى فورۋم جىل قورىتىندىسىن شىعاراتىن, ناتيجەلەردى باعالايتىن جانە ءوڭىر ەكونوميكاسىنىڭ دامۋىنا ۇلەس قوسقان مامانداردىڭ ەڭبەگىن اتاپ وتەتىن الاڭ. جىل بويى وسى باعىتتا ايتارلىقتاي جۇمىس جۇرگىزىلدى. جاڭا ماماندىقتار اشىلىپ, شەبەرحانالار مەن زەرتحانالار كەزەڭ-كەزەڭىمەن جاڭارتىلدى. بيىل كوللەدجدەردە وقۋعا 7 مىڭنان استام ورىن ءبولىندى, – دەدى وبلىس اكىمى ايتۋلى ءىس-شارادا.
ايتا كەتەيىك, جۇمىسشى كادرلاردى ءتيىمدى, ساپالى دايارلاۋ ءۇشىن قاجەتتى جاعدايلار جاسالىپ كەلەدى. وقۋ ورىندارىنا جاڭا جابدىقتار ساتىپ الۋعا وسى جىلى 384 ملن تەڭگە جانە جوندەۋ جۇمىستارىن جۇرگىزۋگە 180 ملن تەڭگەگە جۋىق قاراجات بولىنگەن.
بۇگىندە 5 مىڭنان استام ستۋدەنت دۋالدى وقىتۋ جۇيەسى بويىنشا وندىرىستەگى ناعىز كاسىبي مامانداردىڭ جانىندا ءبىلىم الىپ جاتىر. ءبىر جىل بۇرىن كوللەدجدەرگە قامقورلىق قولداۋ كورسەتەتىن كاسىپورىندار سانى 30 بولسا, قازىرگى تاڭدا ولاردىڭ قاتارى 200-دەن اسىپ وتىر.
شارا شەڭبەرىندە بىلىكتى كادرلاردى دايارلاۋدا, دۋالدى وقىتۋدى دامىتۋدا جانە جۇمىسشى ماماندىقتارىنىڭ وڭ ءيميدجىن قالىپتاستىرۋدا جوعارى ناتيجەلەر كورسەتكەن ءوڭىردىڭ كاسىپورىندارى مەن كوللەدجدەرى ماراپاتتالدى.
ماسەلەن, «جىلدىڭ ۇزدىك مەتسەناتى» نوميناتسياسى «كازتسينك» جشس-عا, «ۇزدىك الەۋمەتتىك سەرىكتەس» نوميناتسياسى وسكەمەن تيتان-ماگني كومبيناتىنا, ءۇلبى مەتاللۋرگيالىق زاۋىتىنا, وسكەمەن جىلۋ ەلەكتر ورتالىعىنا جانە تاعى بىرنەشە كاسىپورىنعا بەرىلدى.
– دۋالدى وقىتۋ بويىنشا كورسەتكىش كوبەيىپ, 30-دان 200-گە دەيىن ءوندىرىس مەكەمەلەرى قولداۋ كورسەتۋگە كىرىستى. ول دەگەنىمىز كوللەدج ءۇشىن وتە ماڭىزدى. ەرتەڭگى كۇنى تۇلەكتەر جۇمىسپەن قامتىلادى. الەمدىك, رەسپۋبليكالىق بايقاۋلاردا وقۋشىلارىمىز كوزگە ءتۇسىپ, جۇلدەگە جەتىپ جاتىر. باستالعان جۇمىستار جالعاسىن تابا بەرەدى, – دەدى وسكەمەن جوعارى پوليتەحنيكالىق كوللەدجدىڭ ديرەكتورى يساتاي يسين.
ال «ۇزدىكسىز ءبىلىم بەرۋ سەرىكتەسى» نوميناتسياسى س.امانجولوۆ اتىنداعى شىعىس قازاقستان ۋنيۆەرسيتەتىنە, د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنە جانە قازاقستان-امەريكان ەركىن ۋنيۆەرسيتەتىنە تابىستالدى. سونداي-اق WorldSkills, AgroSkills جانە Abilympics-2025 رەسپۋبليكالىق چەمپيوناتتارىنىڭ جەڭىمپازدارى مەن جۇلدەگەرلەرىنە شىعىس قازاقستان وبلىسىنىڭ اكىمى اتىنان باعالى سىيلىقتار بەرىلدى.
