پوليتسيا مالىمەتىنشە, وقيعا بارىسىندا قاتىسۋشىلار اراسىندا ءوزارا تۇسىنىسپەۋشىلىك تۋىنداپ, سونىڭ سالدارىنان تاراپتار ءبىر-بىرىنە جەڭىل فيزيكالىق ارەكەت جاساعان. كەيىننەن قاتىسۋشىلار ءبىر-بىرىنەن كەشىرىم سۇراپ, تاتۋلاسقانىن جانە ورىن العان جاعدايعا وكىنىش بىلدىرگەن. سونداي-اق ولار ازاماتتاردى ءبىر-بىرىنە قۇرمەتپەن قاراۋعا جانە كەز كەلگەن كەلىسپەۋشىلىكتى بەيبىت جولمەن شەشۋگە شاقىردى.
تەكسەرۋ ناتيجەسى بويىنشا قاتىسۋشىلاردىڭ ارەكەتتەرىنە قۇقىقتىق باعا بەرىلدى. ەكى ادامعا قاتىستى كامەلەتكە تولماعانداردىڭ قاتىسۋىمەن جاسالعان بۇزاقىلىق ارەكەت فاكتىسى بويىنشا اكىمشىلىك ءىس قوزعالدى. سوت شەشىمىمەن اتالعان تۇلعالار ارقايسىسى 20 ايلىق ەسەپتىك كورسەتكىش (اەك) كولەمىندە ايىپپۇل تۇرىندە اكىمشىلىك جاۋاپكەرشىلىككە تارتىلدى.
الماتى قالاسىنىڭ پوليتسيا دەپارتامەنتى تۇرمىستىق كەلىسپەۋشىلىكتەر, قارىم-قاتىناس ماسەلەلەرى نەمەسە تىلدىك ەرەكشەلىكتەر ەشبىر جاعدايدا قاقتىعىسقا, ارانداتۋعا نەمەسە قوعامدىق ءتارتىپتى بۇزۋعا سەبەپ بولماۋى ءتيىس ەكەنىن ەسكەرتەدى. ۇلتتىق نەمەسە تىلدىك تاقىرىپتاردى پايدالانا وتىرىپ, داۋ-جانجال تۋىنداتۋ ارەكەتتەرى قوعام ءۇشىن قاۋىپتى ءارى جول بەرىلمەيتىن جاعداي رەتىندە قاراستىرىلادى.
پوليتسيا وكىلدەرىنىڭ ايتۋىنشا, قوعامنىڭ نەگىزى – ءوزارا سىيلاستىق, بىرلىك پەن كەلىسىم. بۇل قۇندىلىقتار وزگەرمەيتىن جانە ارقاشان ماڭىزدى قاعيدا بولىپ قالا بەرەدى.
الماتى قالاسىنىڭ پوليتسيا دەپارتامەنتى زاڭ شەڭبەرىندە ارەكەت ەتىپ, بارلىق ازاماتتاردىڭ تەڭدىگىن قامتاماسىز ەتەتىنىن اتاپ ءوتتى. قاقتىعىستاردى ۇيىمداستىرۋعا نەمەسە ارانداتۋعا قاتىسقان تۇلعالار قولدانىستاعى زاڭناماعا سايكەس جاۋاپكەرشىلىككە تارتىلاتىنى ەسكەرتىلدى.
