ءىس-شارانىڭ ماقساتى – اباي مۇراسىن جاس بۋىن ساناسىنا تەرەڭ ءسىڭىرۋ, رۋحاني ساباقتاستىقتى نىعايتۋ.
فورۋمنىڭ شىمىلدىعى اقىننىڭ ءومىرى مەن شىعارماشىلىق جولىن ارقاۋ ەتكەن «جاس اباي» ادەبي قويىلىمىمەن اشىلدى. اشىلۋ سالتاناتىنا ابايدىڭ «جيدەباي-ءبورىلى» مەملەكەتتىك مۋزەي-قورىعى ديرەكتورىنىڭ عىلىمي جۇمىستار جونىندەگى ورىنباسارى مەيرامگۇل قايرامباەۆا, «اباي» جۋرنالىنىڭ رەداكتورى رايحان شاراپيەۆا, اباي اتىنداعى عىلىمي-امبەباپ كىتاپحاناسىنىڭ سيرەك قور ءبولىمىنىڭ باسشىسى جانىلگۇل مانجيباەۆا, مەكتەپ ديرەكتورى ەربول قاينارباەۆ, قالا مەكتەپتەرىنىڭ ۇستازدارى مەن وقۋشىلارى قاتىستى. سونىمەن قاتار باكۋ قالاسىنان ونلاين فورماتتا قوسىلعان ازەربايجاندىق ۇستازدار ايتەن باگيەۆا, حانىم فاتاليەۆا, جاۆاحير مامەدوۆا اباي شىعارماشىلىعىنىڭ تۇركى الەمىندەگى رۋحاني ورنى جونىندە وي ءبولىستى.
فورۋم اياسىندا ابايدىڭ «جيدەباي-ءبورىلى» مەملەكەتتىك مۋزەي-قورىعىنىڭ جىلجىمالى كورمەسى ۇسىنىلىپ, قاتىسۋشىلار اقىن ومىرىنە قاتىستى قۇندى دەرەكتەرمەن تانىستى.
بۇدان كەيىن قالا مەكتەپتەرىنىڭ وقۋشىلارى قاتىسقان تانىمدىق جانە شىعارماشىلىق باعىتتاعى جۇمىستار ۇيىمداستىرىلدى. اباي مۇراسىن تالقىلاۋعا ارنالعان زياتكەرلىك-تانىمدىق كەزدەسۋلەر, ءتۇرلى فورماتتاعى جۇمىستار وقۋشىلاردىڭ وي-ءورىسىن كەڭەيتىپ, رۋحاني تانىمىن تەرەڭدەتۋگە باعىتتالدى. فورۋم مازمۇنىن بايىتقان «ابايدى وقى, تاڭىرقا» اتتى كىرىكتىرىلگەن شاڭىراق ساعاتى بارىسىندا اقىننىڭ ءومىرى مەن شىعارماشىلىعى تاربيەلىك ءارى تانىمدىق تۇرعىدا جۇيەلەنىپ, جاس ەرەكشەلىگىنە ساي ۇسىنىلدى.
اباي وبلىسى
