وبلىس اكىمى بەرىك ءۋالي كەزدەسۋ الدىندا وقۋشىلاردىڭ جوبالارى مەن جەتىستىكتەرى ۇسىنىلعان كورمەنى تاماشالادى. كورمەدە «روبوتەحنيكا» باعىتىندا كوللەدجدەر مەن مەكتەپتەردىڭ ۇزدىك عىلىمي جوبالارى, سونداي-اق ح حالىقارالىق اسكەري-پاتريوتتىق «ايبىن» جاستار جيىنىنىڭ جۇلدەگەرلەرى, دارىندى بالالارعا ارنالعان ش.ءۋاليحانوۆ اتىنداعى «جاس ۇلان» ارنايى ەرلەر مەكتەپ-ليتسەيى وقۋشىلارىنىڭ جەتىستىكتەرى ۇسىنىلدى.
ەركىن فورماتتا وتكەن كەزدەسۋدە اباي وبلىسىنىڭ دارىندى وقۋشىلارى جەتىستىكتەرى مەن الداعى ماقساتتارى تۋرالى ايتىپ, ويلارى مەن ۇسىنىستارىن ورتاعا سالدى. ايماق باسشىسى ءسوز سويلەگەن ءاربىر قاتىسۋشىنى مۇقيات تىڭداپ, ۇسىنىستارعا جاۋاپ بەردى.
«بۇگىن مەن سەندەرگە الدىڭعى بۋىننىڭ شىن پەيىلىن ايتقىم كەلەدى: سەندەر – ءبىزدىڭ ءوڭىردىڭ ەڭ ۇلكەن ءۇمىتى, ەڭ ۇلكەن سەنىمىسىڭدەر. ءبىز سەندەرمەن ماقتانامىز. بۇل زالدا تالانتىمەن دە, ەڭبەگىمەن دە بيىككە كوتەرىلگەن جاس كوشباسشىلار وتىر. مەملەكەت باسشىسى قاسىم-جومارت توقاەۆ: «ەلىمىزدە جۇزەگە اسىرىلىپ جاتقان ءاربىر باستاما, ەڭ الدىمەن, سىزدەرگە ارنالادى. قازىرگى رەفورمالاردىڭ يگىلىگىن كورەتىن دە, ەلدىك ىستەردى جالعاستىراتىن دا – سىزدەر» دەگەن ەدى. سەندەر وليمپيادالاردا, جوبالاردا, جارىستاردا جەڭىسكە جەتىپ قانا قويماي, جاڭا يدەيالارعا جول اشىپ, ۇلكەن جاۋاپكەرشىلىكتى ارقالاپ جۇرسىڭدەر. ءبىز بۇگىن رەسمي جيىنعا ەمەس, شىنايى اڭگىمەلەسۋ ءۇشىن جينالدىق. ويلارىڭ, سۇراقتارىڭ, ۇسىنىستارىڭ – ءبىز ءۇشىن ماڭىزدى. ويتكەنى تالانتتى جاستارعا ءوز الەۋەتىن تۋعان جەرىندە جۇزەگە اسىرۋعا جاعداي جاساۋ – بارلىعىمىزدىڭ ورتاق مىندەتىمىز. وسى ورايدا بيىلعى وقۋ جىلىنىڭ سوڭىندا حالىقارالىق وليمپيادانىڭ جۇلدەگەرلەرىنە, ياعني 18 وقۋشىعا وبلىس اكىمىنىڭ اتىنان قوماقتى سوماداعى ستيپەنديا تاعايىندالاتىنىن دا قۋانىشپەن حابارلاعىم كەلەدى. بۇل بىلىمگە قۇشتار, تالاپتى جاستارعا ۇلكەن موتيۆاتسيا بولارى ءسوزسىز», دەدى ايماق باسشىسى.
جيىنعا قاتىسقان وقۋشىلارعا وبلىس اكىمىنىڭ اتىنان اقشالاي سەرتيفيكاتتار تابىستالدى. ماسەلەن, 2025 جىلى اباي وبلىسىنىڭ وقۋشىلارى حالىقارالىق جانە رەسپۋبليكالىق وليمپيادالار مەن بايقاۋلاردا 277 مەدال جەڭىپ العان ەدى. ولاردىڭ قاتارىندا حالىقارالىق ماتەماتيكا جانە ينفورماتيكا پاندەرىنەن ءال-حارەزمي وليمپياداسى, جاسوسپىرىمدەر اراسىنداعى حالىقارالىق جاراتىلىستانۋ-عىلىمي وليمپياداسى (IJSO), ماتەماتيكا, ينفورماتيكا, فيزيكا جانە حيميا پاندەرى بويىنشا «تۋيماادا» حالىقارالىق وليمپياداسى, ءو.جولداسبەكوۆ اتىنداعى ماتەماتيكا جانە مەحانيكا بويىنشا زەرتتەۋ جوبالارىنىڭ حالىقارالىق كونكۋرسى, سونداي-اق حالىقارالىق اسكەري-پاتريوتتىق «ايبىن» جاستار جيىنى بار.
