فوتو: pixabay
سەناتور اينۇر ارعىنبەكوۆا مەديتسينا قىزمەتكەرلەرىنە جانە جەدەل جاردەم كولىگىنىڭ جۇرگىزۋشىلەرىنە كۇش قولدانامىن دەپ قورقىتقاندارعا 200-دەن 500 اەك-كە دەيىن (ياعني 790 مىڭنان 1,9 ملن تەڭگەگە دەيىن) ايىپپۇل قاراستىرىلعانىن ايتتى.
سونىمەن قاتار, وسىنداي ارەكەتتەر ءۇشىن:
-
ايىپپۇل مولشەرىنە تەڭ قوعامدىق نەمەسە تۇزەۋ جۇمىستارى;
-
300 ساعاتقا دەيىن قوعامدىق جۇمىستار;
-
جاعدايدىڭ اۋىرلىعىنا قاراي 2 جىلدان 3 جىلعا دەيىن بوستاندىعىن شەكتەۋ نەمەسە ايىرۋ جازاسى قولدانىلۋى مۇمكىن.
«ەگەر دارىگەردىڭ ءومىرى مەن دەنساۋلىعىنا قاۋىپتى ەمەس كۇش قولدانۋ بولسا, 500-دەن 1000 اەك-كە دەيىن (شامامەن 1,9 ملن تەڭگەدەن 4 ملن تەڭگەگە دەيىن) ايىپپۇل سالىنادى. سونداي-اق تۇزەۋ جۇمىستارى, 600 ساعاتقا دەيىن قوعامدىق جۇمىستار, نە بولماسا 2–3 جىلعا دەيىن باس بوستاندىعىن شەكتەۋ نەمەسە ايىرۋ جازاسى كوزدەلگەن. ال ەگەر بۇل ارەكەت اۋىرلاتاتىن ءمان-جايلارمەن جاسالسا, جازا 3 جىلدان 7 جىلعا دەيىن باس بوستاندىعىنان ايىرۋدى قامتيدى. ءومىرى مەن دەنساۋلىعىنا قاۋىپتى كۇش قولدانعان جاعدايدا جازا 5 جىلدان 10 جىلعا دەيىن, ال ودان دا اۋىر قىلمىس جاساعاندار 12 جىلعا دەيىن باس بوستاندىعىنان ايىرىلۋى مۇمكىن», دەپ ءتۇسىندىردى سەناتور.
دەنساۋلىق ساقتاۋ ۆيتسە-ءمينيسترى تيمۋر سۇلتانعازيەۆ 2019 جىلدان بەرى مەديتسينا قىزمەتكەرلەرىنە 280 شابۋىل جاسالعانىن ايتتى.
«وكىنىشكە قاراي, بۇل كورسەتكىش جىل سايىن ءوسىپ كەلەدى. مىسالى, 2019–2020 جىلدارى جىلىنا 5-10 شابۋىل عانا بولسا, سوڭعى 2-3 جىلدا بۇل سان 70-كە دەيىن, ءتىپتى ودان دا كوپ. بيىل دا ءتۇرلى وقيعالار تىركەلدى: 25 دارىگەرگە شابۋىل جاسالدى, ولاردىڭ ەكەۋى – رەزيدەنتتەر. ورتا مەديتسينالىق پەرسونالعا 33 شابۋىل, ال جەدەل جاردەم جۇرگىزۋشىلەرىنە 9 شابۋىل جاسالعان», دەدى ول.
ەسكە سالايىق, قىركۇيەك ايىندا جامبىل وبلىسىندا فەلدشەرگە وق اتقان ازامات جازالانعان ەدى. سونداي-اق 2025 جىلعى 17 شىلدەدە دارىگەرگە شابۋىل جاساعان كۇدىكتى قاماۋعا الىندى.
