قالا اكىمىنىڭ ورىنباسارى مەيىرجان مۇقاسوۆتىڭ پىكىرىنشە, ءماسليحات سەسسياسىندا كەيبىر كوشەلەر مەن وتكەلدەرگە ەرلىكپەن قازا تاپقان ەرلەردىڭ ەسىمىن بەرۋ تۋرالى شەشىم قابىلدانعان.
ء«ار وڭىردە ەرلىگى ۇمىتىلماس ەرەن ۇلدار كەزدەسەدى. وسىنداي ەسىمدەرى ەل ەسىندە ساقتالۋى ءتيىس ءبىرتۋار پەرزەنتتەرىمىزدى جاس ۇرپاق ءبىلۋى قاجەت. ماسەلەن, «سامال» شاعىن اۋدانىنداعى №2 وتكەل اتىراۋ وبلىسىنىڭ قۇرمەتتى ازاماتى, مايدانگەر ورىنعالي قاراساەۆتىڭ اتىمەن اتالعان كوشەگە اينالدى. ول قيىر شىعىستا 13-تەڭىز اتقىشتار بريگاداسىنىڭ تانك پولكىندە قىزمەت ەتكەن. قانقۇيلى سوعىستان كەيىن تۋعان جەرىنە تەك 1947 جىلى ورالدى. كەڭەس داۋىرىندە وبلىستىق دەڭگەيدە باسشىلىق قىزمەتتەر اتقارىپ, 20 جىلدان استام ۋاقىت وبلىستىق ارداگەرلەر كەڭەسىن باسقاردى.
ال لۋگوۆايا كوشەسىنە حالىق قاھارمانى حيۋاز دوسپانوۆانىڭ ەسىمى بەرىلدى. ۇزىندىعى شامامەن ءبىر شاقىرىمعا جۋىق كوشە «اۆانگارد» تۇرعىن الابىنىڭ 2 جانە 4-شاعىن اۋدانىنىڭ اراسىمەن ءوتىپ, «مەرەي» بازارىنان وتباسىلىق ساياباق پەن جەڭىس ساياباعىنا قاراي سوزىلىپ جاتىر. بۇعان دەيىن حيۋاز دوسپانوۆانىڭ ەسىمى «سمپ-163» شاعىن اۋدانىنداعى كوشەلەردىڭ بىرىنە بەرىلگەن بولاتىن. ەندى بۇل كوشە «ناركەسكەن» دەپ اتالدى», دەپ حابارلادى مەيىرجان مۇقاسوۆ.
اكىم ورىنباسارىنىڭ دەرەگىنە سۇيەنسەك, №14 جانە 15-وتكەلگە قىزمەتتىك مىندەتىن اتقارۋ كەزىندە قازا تاپقان ەكى پوليتسيا قىزمەتكەرىنىڭ ەسىمى بەرىلگەن. ەندى بۇل وتكەلدەر اتاۋى بار كوشەگە اينالدى.
«ماسەلەن, شالقار اقىمعاليەۆ جول-پاترۋلدىك پوليتسيا باتالونىندا قىزمەت اتقارعان. 2019 جىلى جايىق وزەنىنە باتىپ بارا جاتقان قىزدى قۇتقارۋ كەزىندە قازا تاپتى. ال, كىشى سەرجانت نۇربەرگەن وتەمىسوۆ كەزەكشىلىك كەزىندە قۋدالاۋدان قاشىپ بارا جاتقان قۇقىق بۇزۋشىنىڭ كولىگىن توقتاتپاق بولعان. سول كەزدە اۆتوكولىك قاعىپ كەتىپ, العان جاراقاتتارىنىڭ سالدارىنان كوز جۇمدى», دەپ ءمالىم ەتتى مەيىرجان مۇقاسوۆ.
