اۆتوسالاداعى ءبىر جۇمىس ورنى وزگە سالالاردا دا سۇرانىس تۋدىرادى. ساراپشىلاردىڭ باعالاۋىنشا, ءبىر جۇمىس ورنى لوگيستيكا, قىزمەت كورسەتۋ, جەتكىزۋ باعىتتارىندا تاعى 7-8 ادامدى جۇمىسپەن قامتۋعا جول اشادى. وسىلايشا اۆتونارىق جۇمىسپەن قامتۋدىڭ ماڭىزدى كوزىنە اينالىپ كەلەدى.
2025 جىلدىڭ ءۇشىنشى توقسانىنىڭ سوڭىندا اۆتوسالادا ەڭبەك ەتەتىندەر سانى 9 مىڭعا جۋىقتادى. ءبىر جىلدا ءوسىم 40 پايىزدان استى. ماشينا جاساۋ سالاسىنداعى جۇمىسشىلاردىڭ ىشىندە اۆتوسالانىڭ ۇلەسى سوڭعى ون جىلدا ايتارلىقتاي ارتقان. بيىل قوستاناي وبلىسى مەن الماتىدا ەكى جاڭا زاۋىت ىسكە قوسىلىپ, بەس مىڭنان استام ادام جۇمىسقا ورنالاستى.
جۇمىسشىلاردىڭ ەداۋىر بولىگى قوستاناي وبلىسىنا تيەسىلى. مۇندا ورنالاسقان ءىرى زاۋىتتار ءوڭىر ەكونوميكاسىنىڭ تىرەگىنە اينالىپ وتىر. الماتىدا دا اۆتوسالاداعى جۇمىسشىلار سانى ءبىر جارىم ەسەگە ءوستى. وزگە وڭىرلەردە دە بۇل باعىتتا ءوسىم بار.
سالانىڭ قارقىندى دامۋى كادر دايارلاۋ ماسەلەسىن العا شىعاردى. قازىر اۆتوسالادا مەكتەپتەن باستاپ كوللەدج, جوعارى وقۋ ورنى جانە ءوندىرىستى بايلانىستىراتىن جۇيە قالىپتاسىپ كەلەدى. كورپوراتيۆتىك وقۋ ورتالىقتارى, دۋالدى وقىتۋ, وقۋ ورىندارىمەن تىكەلەي ارىپتەستىك وسى قاجەتتىلىكتەن تۋىندادى.
جالپى العاندا, اۆتوموبيل ونەركاسىبى ءوندىرىستى عانا ەمەس, ەڭبەك نارىعىن دا كەڭەيتىپ وتىر. جۇمىسشى ماماندىقتارىنا سۇرانىستىڭ ارتۋى الەۋمەتتىك تۇراقتىلىققا جانە ەل ەكونوميكاسىنىڭ ۇزاق مەرزىمدى دامۋىنا ىقپال ەتەتىن فاكتورعا اينالىپ كەلەدى.
