فوتو: كادر YouTube
مينيسترلىكتىڭ دەرەگىنشە, بۇگىندە ءمامس جۇيەسىنە 16,8 ملن ادام قاتىسادى. ونىڭ 12,3 ميلليونى – جەڭىلدەتىلگەن ساناتتاعى ازاماتتار, ولار ءۇشىن جارنالاردى مەملەكەت تولەيدى. ال شامامەن 3,6 ملن ادام ءالى كۇنگە دەيىن ساقتاندىرۋ جۇيەسىنەن تىس قالىپ وتىر.
كىمدەر ساقتاندىرىلماي ءجۇر؟
ساقتاندىرۋسىز قالعان ازاماتتار ەكى توپقا بولىنەدى.
ءبىرىنشى توپ – تابىسى جەتكىلىكتى بولسا دا, ءتۇرلى سەبەپتەرمەن ءمامس-كە قاتىسپاي وتىرعان شامامەن 2,5 ملن ادام.
ەكىنشى توپ – الەۋمەتتىك وسال ساناتتاعى 1,1 ملن ازامات. بۇل – جۇمىسسىز, تابىسى تومەن, سوڭعى ايلاردا زەينەتاقى جارناسىن تولەمەگەن ادامدار.
نە وزگەرەدى؟
جاڭا زاڭناماعا سايكەس, الەۋمەتتىك ءال-اۋقاتتىڭ داعدارىستىق جانە شۇعىل دەڭگەيىنە جاتاتىن ازاماتتار (جۇمىس ىستەمەيتىن, كەمىندە ءۇش اي بويى مىندەتتى زەينەتاقى جارنالارىن تولەمەگەن, وتباسىنىڭ نەگىزگى قاجەتتىلىكتەرىن وتەۋدە قيىندىق كورەتىن ازاماتتار) ءۇشىن ءمامس جارنالارىن جەرگىلىكتى اتقارۋشى ورگاندار تولەيتىن بولادى.
ماڭىزدىسى – جارنا ادام مەديتسينالىق كومەككە جۇگىنگەن ساتتە اۋدارىلادى. ياعني بۇرىن ساقتاندىرىلماعان بولسا دا, ازامات مەديتسينالىق قىزمەتتى بىردەن الا الادى.
وسىلايشا, 2026 جىلى شامامەن 1 ملن ادام ءمامس جۇيەسىنە قوسىمشا تۇردە قامتىلادى.
قانداي شارت بار؟
ءمامس شەڭبەرىندە قىزمەت الۋ ءۇشىن ازاماتتىڭ تۇرعىلىقتى جەرى بويىنشا ەمحاناعا تىركەلۋى مىندەتتى. ەمحاناعا تىركەلمەگەن جاعدايدا ساقتاندىرۋ مارتەبەسى بولسا دا, جۇيە قىزمەتتەرىن پايدالانۋ مۇمكىن ەمەس.
ساقتاندىرۋ مارتەبەسىن قالاي تەكسەرۋگە بولادى؟
ءمامس-تەگى مارتەبەنى:
الەۋمەتتىك مەديتسينالىق ساقتاندىرۋ قورىنىڭ رەسمي سايتىنان;
SaqtandyryBot Telegram-بوتى ارقىلى;
Damumed, Qoldau 24/7 قوسىمشالارىندا;
كەيبىر بانكتەردىڭ ءموبيلدى قوسىمشالارىنان تەكسەرۋگە بولادى.
تۇراقتى تولەۋشىلەرگە جەڭىلدىك
2026 جىلدان باستاپ كەمىندە 5 جىل قاتارىنان ءمامس جارناسىن تولەگەن ازاماتتار, تولەم ۋاقىتشا توقتاعان جاعدايدا دا 6 اي بويى ساقتاندىرىلعان مارتەبەسىن ساقتاي الادى.
مينيسترلىك بۇل وزگەرىستەر ءمامس جۇيەسىن اناعۇرلىم الەۋمەتتىك باعىتتالعان, ءارى حالىققا قولجەتىمدى ەتەتىنىن اتاپ ءوتتى. جاڭا تەتىك اسىرەسە جۇمىسسىز جانە تابىسى تومەن ازاماتتاردىڭ مەديتسينالىق كومەكسىز قالماۋىنا مۇمكىندىك بەرەدى.
مەملەكەت باسشىسى ءمامس تۋرالى زاڭعا شىلدە ايىندا قول قويعانى ءمالىم.
ءمامس جۇيەسىن جەتىلدىرۋ باعىتىندا ماڭىزدى زاڭ قابىلداندى.
