الدىمەن پرەمەر-مينيستر «قازاقستاندىق شەتەلدىك ينۆەستورلار كەڭەسى» قاۋىمداستىعىنىڭ باسقارما توراعاسى ەرلان دوسىمبەكوۆپەن جۇزدەستى. بۇل كەزدەسۋدە شەتەلدىك ينۆەستورلارمەن قارىم-قاتىناس قالاي ءجۇرىپ جاتقانى, ولارمەن اشىق ءارى سەنىمدى ديالوگتى قالاي كۇشەيتۋگە بولاتىنى ءسوز بولدى. نەگىزگى نازار ەل ءۇشىن ماڭىزدى ينفراقۇرىلىمدىق جوبالارعا اۋدارىلدى. ياعني جول, ءوندىرىس, ۇلكەن نىساندار سياقتى ۇزاق ۋاقىتقا جۇمىس ىستەيتىن جوبالاردى ىسكە اسىرۋ ماسەلەسى تالقىلاندى. سونىمەن قاتار الدا وتەتىن شەتەلدىك ينۆەستورلار كەڭەسىنىڭ 38-جالپى وتىرىسىنا دايىندىق بارىسى دا نازاردان تىس قالعان جوق.
كەلەسى كەزدەسۋ «Alstom Kazakhstan» كومپانياسىنىڭ باسشىلىعىمەن ءوتتى. پرەمەر-مينيستر جەروم بويەمەن تەمىرجول ماشيناسىن جاساۋ سالاسىنىڭ بولاشاعىن تالقىلادى. اڭگىمە نەگىزىنەن «ەلەكتروۆوز قۇراستىرۋ زاۋىتىنىڭ» جۇمىسىنا ارنالدى. قازىر بۇل زاۋىتتا ءوندىرىستى جەرگىلىكتى جەردە جاساۋ ۇلەسى ايتارلىقتاي ارتقان. بۇرىن تەك 10% عانا ەلىمىزدە جاسالسا, قازىر بۇل كورسەتكىش 35%-عا جەتكەن. بۇل دەگەنىمىز, بولشەكتەر مەن جۇمىستاردىڭ كوبى ەل ىشىندە اتقارىلادى, ال بۇل ءوز كەزەگىندە جۇمىس ورنى مەن تاجىريبەنىڭ كوبەيۋىنە اسەر ەتەدى. سونىمەن بىرگە دايىن ءونىمدى شەتەلگە ەكسپورتتاۋ مۇمكىندىكتەرى دە تالقىلاندى.
ءۇشىنشى ماڭىزدى كەزدەسۋ فارماتسەۆتيكا سالاسىنا قاتىستى ءوتتى. پرەمەر-مينيستر «Polpharma Santo» كومپانياسىنىڭ باس ديرەكتورى ادام الەكسەيۋكپەن كەزدەستى. بۇل جەردە ءسوز «حيمفارم» اق بازاسىندا جۇزەگە اسىپ جاتقان ينۆەستيتسيالىق جوبا تۋرالى بولدى. كومپانيا ەلدە ءدارى جاساۋعا قاجەتتى نەگىزگى شيكىزات سانالاتىن بەلسەندى فارماتسەۆتيكالىق ينگرەديەنتتەردىڭ 80-نەن استام ءتۇرىن شىعارۋدى جوسپارلاپ وتىر. مۇنىڭ ءمانى – ۇلكەن. ياعني ەل ءدارى-دارمەكتى سىرتتان عانا الماي, ءوز ىشىندە كوبىرەك وندىرە باستايدى.
«Polpharma Group» كومپانياسى ەل ەكونوميكاسىنا 130 ملن دوللاردان استام ينۆەستيتسيا سالعان. سونىڭ ناتيجەسىندە, 800-دەن استام ادام تۇراقتى جۇمىسپەن قامتىلعان. كومپانيانىڭ پورتفەلىندە ءارتۇرلى اۋرۋلاردى ەمدەۋگە ارنالعان 12 فارماتسەۆتيكالىق توپقا كىرەتىن 280-نەن استام بالاما ءدارى بار.
ولجاس بەكتەنوۆ سالالىق مينيسترلىكتەر مەن جاۋاپتى ۇيىمدارعا ينۆەستورلار كوتەرگەن ماسەلەلەر مەن ۇسىنىستاردى مۇقيات قاراپ, پىسىقتاۋدى تاپسىردى. ايتىلعان ءسوز جەردە قالماي, ناقتى جۇمىسقا اينالۋى كەرەك دەگەن تالاپ قويىلدى. جالپى, بۇل كەزدەسۋلەردىڭ ءمانى ءبىر. ۇكىمەت ينۆەستورلاردى تىڭداپ وتىر, ءوندىرىستى دامىتۋعا مۇددەلى جانە شەتەلدىك كومپانيالارمەن ارىپتەستىكتى ناقتى ىسپەن نىعايتۋدى كوزدەيدى.
