تەكسەرۋ ناتيجەسىندە اتالعان ازاماتشانىڭ شەتەلدىك ەسەپتە تۇرعان كولىك قۇرالدارىنا ساقتاندىرۋ پوليستەرىن زاڭسىز راسىمدەۋ قىزمەتىن كورسەتكەنى انىقتالدى. اتالعان پوليستەر ساقتاندىرۋ جاعدايى تۋىنداعان كەزدە زاڭدى كۇشى بولماعان.
سونىمەن قاتار كۇدىكتىنىڭ كولىك قۇرالىن باسقارۋ قۇقىعىن بەرەتىن وزگە دە قۇقىق بەلگىلەيتىن قۇجاتتاردى زاڭسىز دايىنداۋمەن اينالىسقانى بەلگىلى بولدى. كۇدىكتىنىڭ اۆتوكولىگىن ءتىنتۋ كەزىندە پوليتسيا قىزمەتكەرلەرى مەديتسينالىق انىقتامالاردى, جۇرگىزۋشى كۋالىگىن الۋ ءۇشىن وقۋ كۋرستارىنان وتكەنى تۋرالى كۋالىكتەردى, سونداي-اق نوتاريۋستىڭ ءمور تاڭباسى قويىلعان تولتىرىلماعان بلانكىلەردى تاركىلەدى. ۇستالۋىنا جول-كولىك وقيعاسىنان كەيىن جۇرگىزۋشىلەردىڭ ءبىرىنىڭ ساقتاندىرۋ كومپانياسىنا جۇگىنۋى سەبەپ بولعان.
تەكسەرۋ بارىسىندا جۇرگىزۋشىنىڭ بۇعان دەيىن كۇدىكتى ايەلدەن ءۇش اي مەرزىمگە ساقتاندىرۋ ءپوليسىن راسىمدەگەنى, الايدا ساقتاندىرۋ تولەمىن الۋ كەزىندە قۇجاتتىڭ جالعان ەكەنى انىقتالعان.
اتالعان دەرەك بويىنشا جالعان قۇجاتتاردى جاساۋ جانە وتكىزۋ بەلگىلەرىمەن سوتقا دەيىنگى تەرگەپ-تەكسەرۋ باستالدى. قازىرگى ۋاقىتتا وقيعانىڭ بارلىق ءمان-جايىن جانە ىقتيمال سىبايلاستاردى انىقتاۋعا باعىتتالعان قاجەتتى تەرگەۋ ارەكەتتەرى جۇرگىزىلۋدە.
