سۋرەت: zakon.kz
ءوزى دە سانقىرلى ءھام تاعدىرلى ادام ەدى. عاجاپ عۇمىر كەشتى. كوپتەگەن قيىندىقتى, جاۋىڭا دا تىلەمەيتىن قيىندىقتاردى باستان وتكەردى. ول قيىندىقتىڭ ءبارىن حالىقتىڭ ماحابباتى ارقىلى جەڭدى. ءوزى كۇرەسكەر ادام. تاڭىردەن بەرىلگەن كول-كوسىر تالانت, سوعان قوسا بۇل ادامعا مىنەز بەرمەسە, رۋح بەرمەسە سىنىپ كەتۋى ابدەن مۇمكىن-ءدى. اسىرەسە تالانتتى ادامنىڭ جانى نازىك بولادى. وعان قوسا, بۇل كىسىگە الاپات مىنەز بەرگەن عوي. سونىڭ ارقاسىندا بارلىق قيىندىقتى جەڭدى. تىك ءجۇردى, تىك تۇردى.
ءوزى ايتاتىن تريلوگياسى: «قىز جىبەك», «اتاماننىڭ اقىرى», ء«ترانسسىبىر ەكسپرەسى» بار دا ءاسانالى ءاشىم ۇلىنىڭ اتى ەشقاشان وشپەيدى. بيىكتەي بەرەدى, جىل وتكەن سايىن ساعىناتىن بولامىز.
اس-اعاڭ عاجاپ كىتاپتار جازدى. «مەنىڭ جانرىم كۇندەلىك» دەگەن كىتابىنىڭ ءوزى ءۇش تومعا تولدى. تاياۋدا «اكتەرمىن مەن مىڭ ءولىپ, مىڭ تىرىلگەن» دەگەن كىتابى جارىق كوردى. ونىڭ سىرتىندا سول كىتاپتىڭ قالىڭدىعىنداي التى داپتەر قالدى. كوكىرەگى كومبە, قازىنا كىسى ەدى. وسىنشاما تەلەگەي تەڭىز, جانىڭا جاقىن ادام تۋرالى مۇندايدا تەرەڭ ءسوز ايتۋ قيىن, ارينە.
وتكەن عاسىردىڭ ورتا شەنى, وسى عاسىردىڭ باسىنان بەرى مۇنداي تانىمالدىلىققا يە بولعان تۇلعالار وتە سيرەك. اسەكەڭ سول ساناۋلى ساناتكەردىڭ ءبىرى دەمەسكە قويمايدى. قازاق ونەرىنىڭ قاراشاڭىراعى اكەم تەاترى اتالعان اۋەزوۆ تەاترى دەسەك, اسەكەڭ سونىڭ التىن عاسىرىن جاساعان تۇلعالاردىڭ ءبىرى.
قالتاي مۇحامەدجانوۆ ايتاتىن, ء«اسانالى – ۇلت رۋحانياتىنىڭ پاسپورتى», دەپ. شىن مانىندە سولاي ەدى. مەملەكەتتىڭ ماقتانىشى, ەلدىڭ بايلىعى ىسپەتتى تۇلعا. جانە سول بيىكتە قالدى, قالا دا بەرەدى. ول تۋرالى ءالى تالاي جازاتىن بولامىز.
ەكەۋمىزدىڭ شىعارماشىلىق بايلانىسىمىز تۋرالى جۇرتتىڭ ءبارى جاقسى بىلەدى. ماعان رۋحاني اكە بولدى. وسىنشالىقتى بيىگى ءبىزدى دە, ءوزىن دە, ءبارىمىزدى ءوسىردى.
رۋحىڭىز شات بولسىن, قادىرلى اعا!
قالي سارسەنباي,
جۋرناليست, قوعام قايراتكەرى
