بيىل KEGOC كومپانياسىندا مەملەكەتتىك ءتىلدى دامىتۋ جانە اۋدارما جۇمىسىن ۇيىمداستىرۋ قاعيدالارى, سونداي-اق 2025– 2029 جىلدارعا ارنالعان ءىس-شارالار جوسپارى بەكىتىلدى. وسى قۇجاتتاردا مەملەكەتتىك ءتىلدى قولدانۋدىڭ ناقتى ءتارتىبى مەن جاۋاپكەرشىلىك بەلگىلەنىپ, ءاربىر بولىمشە مەن قىزمەتكەردىڭ قۇزىرەتى ايقىندالدى. سونىڭ ناتيجەسىندە كومپانيادا قۇجات اينالىمىنىڭ باسىم بولىگى قازاق تىلىندە. بۇگىندە اتقارۋشى ديرەكتسيادا قۇجاتتاردىڭ 95-98 پايىزى, ال وڭىرلىك فيليالداردا 99-100 پايىزى مەملەكەتتىك تىلدە راسىمدەلەدى. بۇل – KEGOC-ءتىڭ مەملەكەتتىك ءتىل ساياساتىنداعى ماڭىزدى كورسەتكىشى.
سونىمەن قاتار قىزمەتكەرلەردىڭ تىلدىك قۇزىرەتىن ارتتىرۋ – ەرەكشە نازاردا. اتقارۋشى ديرەكتسيا مەن فيليالداردى قوسا العاندا 2024–2025 جىلدارى جالپى 1006 قىزمەتكەر قازاق ءتىلىن وقىتۋ كۋرستارىنان ءوتتى, ال اعىلشىن ءتىلىن مەڭگەرۋ ماقساتىندا 317 مامان ارنايى ساباقتارعا قاتىستى. مەملەكەتتىك ءتىلدى مەڭگەرۋ دەڭگەيىن باعالاۋعا ارنالعان «قازتەست» جۇيەسى بويىنشا تەستىلەۋلەر جۇيەلى تۇردە وتكىزىلەدى. تەك بيىلدىڭ وزىندە 629 قىزمەتكەر سەرتيفيكاتتاۋ جانە دياگنوستيكالىق تەست تاپسىردى. بۇل KEGOC ۇجىمىنىڭ كاسىبي دامۋىمەن قاتار, تىلدىك بىلىكتىلىگىن دە ۇزدىكسىز جەتىلدىرەتىنىن كورسەتەدى.
سونداي-اق مەملەكەتتىك ءتىلدىڭ قولدانىلۋى تەك قۇجات اينالىمىمەن شەكتەلمەي, وندىرىستىك ورتادا دا وركەن جايىپ كەلەدى. ماسەلەن, كومپانيا بالانسىنداعى 83 قوسالقى ستانسانىڭ اتاۋى تولىقتاي قازاقشالاندى. بارلىق كورنەكى اقپاراتتار مەن نۇسقاعىش بەلگىلەر زاڭ تالاپتارىنا سايكەستەندىرىلدى. مۇنداي جۇمىس الداعى ۋاقىتتا دا جالعاسىن تابادى. بارلىق تەحنيكالىق جانە وندىرىستىك قۇجاتتاما مەملەكەتتىك تىلدە جۇرگىزىلەدى.
بۇدان بولەك, KEGOC ۇجىمى مادەني-اعارتۋشىلىق شارالارعا باسا دەن قويادى. سول ارقىلى مەملەكەتتىك ءتىل ساياساتىنا قولداۋ بىلدىرەتىنىن اتاپ وتكەن ابزال. بيىل ۇلى ويشىل, اقىن اباي قۇنانباي ۇلىنىڭ 180 جىلدىعىنا وراي كومپانيا كولەمىندە اۋقىمدى ءىس-شارالار ۇيىمداستىرىلدى. ءتۇرلى ەتنوس وكىلدەرى اراسىندا ديكتانت جازۋ, مەملەكەتتىك ءتىلدى جەتىك مەڭگەرگەن ماماندار اراسىندا ەسسە بايقاۋى, قىزمەتكەرلەردىڭ بالالارى اراسىندا ادەبي وقۋ سايىسى – سونىڭ ءبىر پاراسى. سونىمەن بىرگە «اباي – زامانا زاڭعارى» اتتى تەاترلاندىرىلعان قويىلىم ساحنالانىپ, جاس مامانداردىڭ ونەرى كورەرمەندەرگە ەرەكشە اسەر سىيلادى. بۇل شارا ۇجىمدىق رۋحتى كوتەرىپ قانا قويماي, كورپوراتيۆتىك قۇندىلىقتاردى نىعايتىپ, جاس بۋىن قىزمەتكەرلەردىڭ جان-جاقتى دامۋىنا سەرپىن بەردى.
جالپى, KEGOC-تا مەملەكەتتىك ءتىل ساياساتىن دامىتۋعا ارنالعان جۇمىستار ناقتى ناتيجەلى. قۇجات اينالىمىنىڭ قازاق تىلىندە تولىققاندى جۇزەگە اسۋى, مىڭنان استام قىزمەتكەردىڭ وقىتۋ كۋرستارىنان ءوتۋى, ابايدىڭ مەرەيتويىنا ارنالعان مادەني ءىس-شارالاردىڭ جوعارى دەڭگەيدە ۇيىمداستىرىلۋى – كومپانيانىڭ تەك ەنەرگەتيكادا عانا ەمەس, ءتىل ساياساتىن ىلگەرىلەتۋدە دە كوشباسشى ەكەنىن ايعاقتايدى.
مەملەكەتتىك ءتىل KEGOC ءۇشىن قاعاز جۇزىندەگى تالاپ قانا ەمەس, سونىمەن قاتار, كورپوراتيۆتىك مادەنيەتتىڭ وزەگىنە اينالىپ كەلەدى.
قىزعالداق ايتجانوۆا
