جىل باسىنان بەرى قىسقامەرزىمدى ەكونوميكالىق ينديكاتور 118,6%-دى قۇرادى. ينۆەستيتسيالار 2,1 ترلن تەڭگەگە جەتتى, ءوسىم 23,6%, ونىڭ ىشىندە 66%-ى – جەكە ينۆەستيتسيالار. شاعىن جانە ورتا بيزنەس قالا ەكونوميكاسىنىڭ نەگىزى بولىپ قالا بەرەدى, سونىمەن قاتار جالپى ايماقتىق ءونىمنىڭ 72%-ىن, جۇمىس ورىندارىنىڭ 70%-ىن قامتاماسىز ەتەدى. 73 مىڭنان استام تۇراقتى جۇمىس ورنى قۇرىلدى. جۇمىسسىزدىق دەڭگەيى 4,3%-دى قۇرادى, بۇل رەسپۋبليكالىق كورسەتكىشتەن 0,3%-عا تومەن. 3,9 ملن شارشى مەتر تۇرعىن ءۇي سالىندى, بۇل بۇكىل ەل كولەمىندە تاپسىرىلعان تۇرعىن ءۇي قورىنىڭ تورتتەن ءبىرى.
«حالىق سانىنىڭ جىل سايىنعى ءوسىمى جەرگىلىكتى اتقارۋشى بيلىككە ۇلكەن جاۋاپكەرشىلىك جۇكتەپ وتىر. قاراشا ايىندا حالىق سانى 1,6 ملن ادامنان استى. ورتا ەسەپپەن ەلوردا تۇرعىندارى جىل سايىن شامامەن 7%-عا نەمەسە 100 مىڭ ادامعا ارتادى. ىشكى كوشى-قون ەسەبىنەن ەلورداعا كۇنىنە 200 مىڭنان استام ادام كەلەدى. سونداي-اق 100 مىڭعا جۋىق تىركەلمەگەن ازامات بار. تۇرعىندار سانىنىڭ ارتۋى ينفراقۇرىلىمنىڭ دا جان-جاقتى دامۋىن تالاپ ەتەدى. وزدەرىڭىز بىلەتىندەي, ەكى جىل بۇرىن قالا سۋ مەن جىلۋ قۋاتىنىڭ جەتىسپەۋشىلىگىنە تاپ بولدى», دەگەن قالا باسشىسى بۇل باعىتتا اتقارىلىپ جاتقان جۇمىستاردىڭ رەتىن ءمالىم ەتتى.
ايتالىق, №3 سورعى-سۇزگى ستانساسى مەن استانا سۋقويماسىنان ەكىنشى سۋ قۇبىرى جەلىسىنىڭ اياقتالۋىنىڭ ارقاسىندا قوسىمشا تاۋلىگىنە 60 مىڭ تەكشە مەتر اۋىزسۋ قامتاماسىز ەتىلدى. جالپى العاندا, قالانىڭ سۋ تۇتىنۋ كولەمى تاۋلىگىنە 350 مىڭ تەكشە مەتردى قۇرايدى. بيىل ءتورتىنشى سورعى-سۇزگى ستانساسىنىڭ قۇرىلىسى باستالدى, ول قالانى الداعى ونداعان جىل بويى تۇراقتى سۋمەن جابدىقتاۋدى قامتاماسىز ەتەدى.
ء«بىرىنشى كارىز-تازارتۋ ستانساسىنىڭ دا قۋاتى ارتىپ كەلەدى. يندۋستريالىق پارك, كوكتال, ءوندىرىس تۇرعىن الاپتارىندا جەرگىلىكتى كارىز-تازارتۋ قۇرىلعىلارى جوبالارىن جۇزەگە اسىرىپ جاتىرمىز. بۇل جوبالاردى 2027–2029 جىلدار ارالىعىندا اياقتاپ, سۋ بۇرۋ ماسەلەسىن تولىقتاي شەشەمىز», دەدى ج.قاسىمبەك.
جاڭا جىلۋ كوزدەرىن ەنگىزۋ جىلۋ جۇيەسىنىڭ قۋاتىن 34%-عا ارتتىردى. جىلىتۋ ماۋسىمى شتاتتىق رەجىمدە, قالىپتى ءوتىپ جاتىر. جىلۋ قۋاتتارىن ساقتاپ قالۋ ماقساتىندا جاڭا «تەلمان» گاز جىلىتۋ ستانساسىنىڭ قۇرىلىسى جۇرگىزىلەدى. سونداي-اق ەكىنشى جىلۋ ەلەكتر ورتالىعىن كەڭەيتۋگە دايىندىق, ءۇشىنشى جىلۋ ورتالىعىنىڭ كەلەسى كەزەگىن جوسپارلاۋ باستالدى.
مەملەكەت باسشىسىنىڭ تاپسىرماسىنا سايكەس ەلوردانى گازداندىرۋ اياقتالىپ كەلەدى. قالانىڭ 95%-ى قامتىلىپ, گاز 14 تۇرعىن الاپقا جەتكىزىلدى. كەلەسى جىلى 100%-عا جەتەدى.
«تازا قازاقستان» جالپىۇلتتىق اكتسياسىن جۇزەگە اسىرۋ جۇيەلى جالعاسىپ جاتىر. جىل بويى 328 زاڭسىز قوقىس ءۇيىندىسى جويىلىپ, 120 مىڭ توننادان استام قالدىقتار شىعارىلدى. كەلەسى جىلدىڭ ەكىنشى توقسانىندا شەتەلدىك ينۆەستورلارمەن بىرلەسىپ, تاۋلىگىنە 2 250 تونناعا دەيىن قوقىس جاعاتىن زاۋىت سالۋعا كىرىسەمىز, كاسىپورىن ەلەكتر ەنەرگياسىن دا وندىرەدى. زاۋىت 2028 جىلى ىسكە قوسىلادى», دەپ اتاپ ءوتتى قالا اكىمى.
استاناداعى كۇلبىلتەلى ماسەلەنىڭ ءبىرى – كولىك جۇيەسى, قالا جولدارىنداعى كەپتەلىس, كۇندەلىكتى جولاۋشىلار تاسىمالى. ەلوردادا 437 مىڭ اۆتوكولىك تىركەلگەن. وعان قوسىمشا كۇنىنە 90 مىڭنان استام ترانزيتتىك كولىك قۇرالى كىرەدى. ماسەلەنى شەشۋ ماقساتىندا جول-كولىك ينفراقۇرىلىمىن جاقسارتۋ جونىندەگى ناقتىلى جول كارتاسى ازىرلەنگەن. قازىردە جولاۋشىلار كولىگىندەگى جۇرگىنشىلەر سانى – 43%. اكىمدىك بۇل كورسەتكىشتى 65%-عا دەيىن كوتەرۋدى جوسپارلاپ وتىر. بيىل 422 اۆتوبۋس ساتىپ الىندى, اۆتوپارك 1 749 بىرلىككە دەيىن ءوستى.
قالىڭ بۇقارانىڭ ايرىقشا نازارىنداعى لرت جۇمىسى تەستىلىك رەجىمدە جۇمىس ىستەپ جاتىر. جىل اياعىنا دەيىن بارلىق ۆاگون جەتكىزىلەدى. ستانسالاردىڭ ءىشىن ارلەۋ جۇمىسى اياقتالىپ كەلەدى. ەكى ايدىڭ ىشىندە دايىندىق تولىق تياناقتالادى. كەلەر جىلى لرت جولاۋشىلار تاسىمالداي باستايدى.
بيىل 14 كم جاڭا جول سالىندى, 60 كم جول جوندەۋدەن ءوتتى. قالانىڭ ينتەللەكتۋالدى كولىك جۇيەسى بەلسەندى دامىپ كەلەدى. باعدارشامداردىڭ 40%-ى اۆتوماتتى رەجىمدە جۇمىس ىستەيدى. 2026 جىلى بۇل كورسەتكىش 82%-عا جەتەدى.
جۇكتەمەسى جوعارى مەكتەپتەر ماسەلەسى كەزەڭ-كەزەڭىمەن شەشىلىپ كەلەدى. بيىل 9 مەكتەپ پايدالانۋعا بەرىلدى. 2026 جىلعا جالپى قۋاتتىلىعى 16 مىڭ وقۋشى ورنىنا ەسەپتەلگەن تاعى 12 مەكتەپتىڭ قۇرىلىسى جوسپارلانعان. مەملەكەت-جەكەمەنشىك ارىپتەستىگى تەتىگى اياسىندا جاڭا بالاباقشالار اشىلىپ جاتىر.
مەديتسينالىق ينفراقۇرىلىم تاپشىلىعى ءالى دە ساقتالىپ وتىر. بۇل ماسەلەنى شەشۋ ماقساتىندا ەسىل, نۇرا اۋداندارىندا ەكى ەمحانا, الماتى اۋدانىندا پەريناتالدىق ورتالىق, جاڭا كوپسالالى قالالىق اۋرۋحانا, ەسىل اۋدانىندا بالالارعا ارنالعان تراۆماتولوگيالىق پۋنكتتىڭ قۇرىلىسى باستالادى. قالالىق №2 اۋرۋحانانىڭ قابىلداۋ-دياگنوستيكالىق كەشەنىنىڭ قۇرىلىسى اياقتالۋعا جاقىن. سونداي-اق سارىارقا اۋدانىندا پەريناتالدىق ورتالىق سالۋ جوباسى جۇزەگە اسىرىلىپ جاتىر.
سپورتتىق نىساندار جەلىسى قارقىندى دامىپ كەلەدى. ورتالىق ساياباقتا ينكليۋزيۆتى سپورت ورتالىعى مەن شاڭعى بازاسى اشىلماقشى. «قازاقستان» سپورت سارايى مەن ق.مۇڭايتپاسوۆ اتىنداعى ستاديوندى قايتا جاڭعىرتۋ جۇمىسى جالعاسىپ جاتىر, ولاردىڭ اياقتالۋى كەلەسى جىلعا جوسپارلانعان.
«جۇمىسىمىزدىڭ ەڭ ماڭىزدى باعىتتارىنىڭ ءبىرى – قالالىق ورتانى اباتتاندىرۋ, كوگالداندىرۋ. وسى ماقساتتا مىناداي باعدارلامالىق قۇجاتتار ازىرلەندى: ەلوردانىڭ برەندبۋگى, كوگالداندىرۋ جارعىسى, «باقشالى قالا», «جاڭا كەلبەت», «جايلى اۋلا», «رەنوۆاتسيا». ولار قالالىق كەڭىستىكتى دامىتۋدىڭ بارلىق باعىتىنا قاتىستى ءبىرتۇتاس تاسىلدەردى ايقىندايدى», دەپ اتاپ ءوتتى ج.قاسىمبەك.
جەكەمەنشىك ينۆەستورلار تارتۋ ارقىلى قاناتقاقتى جوبا اياسىندا ەسكى تۇرعىن ءۇي قورىن قايتا جاڭعىرتۋ جۇمىسى باستالدى. بۇل الداعى جىلدارى, اسىرەسە, ەسكى ۇيلەرى بار اۋدانداردى جاڭارتۋعا مۇمكىندىك بەرەدى. مىسالى, بايقوڭىر اۋدانىندا ينۆەستورلارعا رەنوۆاتسياعا ارنالعان 21 جەر ۋچاسكەسى بولىنگەن. كەلەسى جىلى وسى جەردە اسان قايعى كوشەسىن سالۋ جوسپارلانىپ وتىر. بيىل 170 قوعامدىق كەڭىستىك اباتتاندىرىلدى, 1,1 ملن-نان استام جاسىل جەلەك وتىرعىزىلدى. جۇمىس قالانى كوگالداندىرۋ تۇجىرىمداماسىنا سايكەس جۇرگىزىلدى.
ء«بىز جەكەلەگەن اباتتاندىرۋدان كوشىپ, «فاسادتان فاسادقا» قاعيداتىمەن كوشەلەر كەڭىستىگىن كەشەندى قالىپتاستىرۋعا باعىت ۇستانىپ وتىرمىز. مۇندا جاياۋ جۇرگىنشىلەر, ۆەلوسيپەدشىلەر, كولىك قوزعالىسى, جارىقتاندىرۋ, ناۆيگاتسيا, كوگالداندىرۋ ەسكەرىلەدى», دەدى قالا اكىمى.
سونىمەن قاتار ينكليۋزيۆتى ورتانى دامىتۋعا باسىمدىق بەرىلىپ, بارلىعىنا قولجەتىمدى, تەڭ جاعدايلار جاسالىپ جاتىر. بيىل اشىلعان «Greenline گۇلزارى» جوباسىنىڭ ءبىرىنشى كەزەڭى وسى ءتاسىلدىڭ ۇلگىسى بولدى. جولدىڭ ورنىنا جاڭبىر باقتارى مەن جاساندى توعاندارى بار جاياۋ جۇرگىنشىلەر ايماعى قۇرىلدى. سپورتتىق جاعالاۋ مەن اتاتۇرىك جاعالاۋىن اباتتاندىرۋ اياقتالدى. اقبۇلاق ارناسى ارقىلى جاياۋ جۇرگىنشىلەر كوپىرى سالىنىپ جاتىر. بەيبىتشىلىك پەن كەلىسىم پاركى, اقوردا الدىنداعى الاڭ, سىعاناق كوشەسى, ماڭگىلىك ەل داڭعىلى جوبالارى كۇندەلىكتى پايدالانۋعا ىڭعايلى كەڭىستىكتەرگە باعىتتالعان.
«جىلدى قورىتىندىلاي كەلە, الدا ءالى دە اۋقىمدى ىستەر اتقارۋ كەرەكتىگىن تەرەڭ تۇسىنەمىز. 2026 جىلى قالانىڭ ەكونوميكالىق ءوسىمىن قامتاماسىز ەتۋ, ەلوردانىڭ كولىك جۇيەسىن كۇشەيتۋ, الەۋمەتتىك ينفراقۇرىلىمدى دامىتۋ مىندەتى تۇر», دەپ تۇيىندەدى بايانداماسىن قالا اكىمى.
ءباسپاسوز ءماسليحاتىنىڭ سوڭىندا باس قالانىڭ باسشىسى بۇقارالىق اقپارات قۇرالدارى وكىلدەرىنىڭ سان سالالى سۇراعىنا مۇقيات جاۋاپ بەردى.
