مۇنايلى اۋدانىندا وتكەن «Zero Waste Aktau» تۇرمىستىق قاتتى قالدىقتاردى جيناۋ, شىعارۋعا ارنالعان جاڭا ارنايى تەحنيكالارىنىڭ تانىستىرىلىمىنا ماڭعىستاۋ وبلىسىنىڭ اكىمى نۇرداۋلەت قيلىباي قاتىستى.
وبلىس اكىمى ءباسپاسوز قىزمەتىنىڭ حابارلاۋىنشا, تانىستىرىلىمدا 2025 جىلى ساتىپ الىنعان «Dongfeng» ماركالى 25 قوقىس تاسىمالداۋ اۆتوكولىگى, كولەمى 1,1 تەكشە مەتر بولاتىن 2100 دانا ەۋرو-ستاندارتتاعى كونتەينەر ۇسىنىلدى. تۇرمىستىق قاتتى قالدىقتاردى جيناۋ, نىعىزداۋ, تاسىمالداۋعا ارنالعان سوڭعى ۇلگىدەگى اۆتوكولىكتەر جوعارى جۇك كوتەرە الاتىن, ۇنەمدى, قالاداعى قارقىندى جۇمىسقا بەيىم. تىعىز جابىلاتىن قاقپاعى بار كونتەينەرلەر قالدىقتاردى جيناۋ ۇدەرىسىن وڭتايلاندىرىپ, جاعىمسىز ءيىستىڭ تارالۋىنا جول بەرمەيدى. قازىردە 400-گە جۋىق كونتەينەر ورناتىلعان, جىل سوڭىنا دەيىن 2100 كونتەينەردى تولىق ورناتۋ جوسپارلانىپ وتىر. بۇل جاڭا تەحنيكالاردىڭ تاعى ءبىر ەرەكشەلىگى – ەلىمىزدە قۇراستىرىلعان, قالدىقتاردى باسقارۋ جۇيەسىنىڭ تيىمدىلىگىن ارتتىرۋعا, ەكولوگيالىق قاۋىپسىزدىكتى قامتاماسىز ەتۋگە باعىتتالعان «جاسىل دامۋ» ۇلتتىق جوباسى اياسىنداعى ينۆەستيتسيالىق جوبا شەڭبەرىندە ساتىپ الىنعان.
جاڭا تەحنيكالاردىڭ تانىستىرىلىمى اياسىندا اقتاۋ قالاسىنىڭ اكىمدىگى مەن «Zero Waste Aktau» اراسىندا قالدىقتاردى جيناۋ, شىعارۋ قىزمەتىن جاڭعىرتۋعا باعىتتالعان كەلىسىمشارت جاسالعانى ايتىلدى. كەلىسىم اياسىندا قالا اۋماعى زاماناۋي ەۋرو-ستاندارتقا ساي كونتەينەرلەرمەن, ارنايى تەحنيكالارمەن كەزەڭ-كەزەڭىمەن جابدىقتالىپ جاتىر.
تازالىققا قاتىستى شارا «تازا ماڭعىستاۋ» 45 كۇندىك الەۋمەتتىك-ەكولوگيالىق چەللەندجىنىڭ سالتاناتتى جابىلۋ راسىمىمەن جالعاستى. ءوڭىر تۇرعىندارىنىڭ ەكولوگيالىق مادەنيەتىن ارتتىرۋعا, قورشاعان ورتانى قورعاۋعا باعىتتالعان چەللەندجدىڭ جابىلۋى شاراسى بارىسىندا ايماق باسشىسى ن.قيلىباي ەكولوگيالىق جاۋاپكەرشىلىكتىڭ ماڭىزدىلىعىنا توقتالىپ, تۇرعىنداردىڭ بەلسەندىلىگىن ەرەكشە اتاپ ءوتتى.
«تازا ماڭعىستاۋ» – بۇل ءبىر رەتتىك اكتسيا ەمەس, ەكولوگيالىق مادەنيەتتى قالىپتاستىراتىن قوعامدىق قوزعالىس. تابيعاتتى قورعاۋ ءار ادامنىڭ كۇندەلىكتى ءومىر سالتىنا اينالۋعا ءتيىس. كىشكەنتاي قادامدار ارقىلى ۇلكەن وزگەرىستەرگە قول جەتكىزۋگە بولادى», دەدى ول.
وبلىستا ەكولوگيالىق اكتسياعا جىل باسىنان بەرى 130 مىڭنان استام ادام قاتىستى. 31 757 ءتۇپ اعاش وتىرعىزىلدى. 39 مىڭ توننادان استام قوقىس ارناۋلى ورىندارعا شىعارىلىپ, قورشاعان ورتانى اباتتاندىرۋ جۇمىستارى جۇيەلى تۇردە جۇرگىزىلىپ كەلەدى.
وڭىردە 45 كۇن بويى ءوڭىر تۇرعىندارى, جاستار, ەرىكتىلەر مەن ەڭبەك ۇجىمدارى تازالىق جۇمىستارىنا بەلسەندى اتسالىسىپ, اعاش وتىرعىزۋ, قوقىس جيناۋ, قالدىقتاردى سۇرىپتاۋ, سۋ مەن ەلەكتر قۋاتىن ۇنەمدەۋ باعىتىندا ناقتى ىستەر اتقاردى. چەللەندجگە وبلىستا 77 كوماندا قاتىستى. الەۋمەتتىك جەلىلەردە 2 600-دەن استام ەكولوگيالىق اقپارات جاريالاندى. جوباعا تىكەلەي 500-دەن استام ادام تارتىلىپ, قوسىمشا 2 مىڭعا جۋىق تۇرعىن ەكولوگيالىق اكتسيالارعا ۇلەس قوستى.
جابىلۋ سالتاناتىندا «تازا ماڭعىستاۋ» 45 كۇندىك ەكوچەللەندجىنىڭ جەكە, ۇجىمدىق ساناتتارداعى جەڭىمپازدارى, سونداي-اق «ۇزدىك اۋلا – 2025», «ۇزدىك تۇرعىن ءۇي كەشەنىنىڭ اۋلاسى», «ۇزدىك بيزنەس-اۋماق», «ۇزدىك كىرەبەرىس», «ۇزدىك اۋلا سىپىرۋشى» بايقاۋلارىنىڭ جەڭىمپازدارى ماراپاتتالدى.
تازالىق – جەكەنىڭ ەمەس, كوپتىڭ جاۋاپكەرشىلىگى, سونداي-اق ءبىر كۇننىڭ ەمەس تىرشىلىكتىڭ تىنىسى. تازالىقتى جۇرگىزۋ دە, ساقتاۋ دا كوپكە ورتاق مىندەت.
ماڭعىستاۋ وبلىسى
