جۋرناليستەر ايماق باسشىسىنان اتالعان اۆتوۆوكزالعا بايلانىستى جاعدايدى سۇرادى. بۇعان دەيىن جەرگىلىكتى جالعا الۋشىلار اكىمدىك ۆوكزال ورنالاسقان جەر تەلىمىن تارتىپ العىسى كەلەدى دەپ مالىمدەپ, سول سەبەپتى نىساندا ءجيى تەكسەرىس جۇرگىزىلىپ, كاسىپكەرلەردىڭ جۇمىسىنا كەدەرگى كەلتىرىلىپ جاتقانىن ايتقان.
الايدا وبلىس اكىمى بۇل اقپاراتتى جوققا شىعاردى.
– وكىنىشكە قاراي, تالاپ قويىلا سالىسىمەن «بىرەۋ تارتىپ الماقشى» دەگەن اڭگىمە شىعادى. ءتىپتى «اكىم وزىنە العىسى كەلەدى» دەپ تە ايتادى. اكىمگە ول اۆتوۆوكزال نە ءۇشىن كەرەك؟ ول ەشكىمگە قاجەت ەمەس. ءبىز ادال جۇمىس ىستەپ, زاڭدى ساقتايتىن كاسىپكەرلەرگە ەشقاشان كەدەرگى كەلتىرمەيمىز, كەرىسىنشە قولدايمىز. ال ەگەر بىرەۋ ءتارتىپ بۇزىپ, قالانىڭ سىرتقى كەلبەتىن بۇلدىرسە, تالاپ قويۋ – ءبىزدىڭ مىندەتىمىز, – دەدى نۇرلىبەك نالىباەۆ.
اكىمنىڭ ايتۋىنشا, ەگەر جالعا الۋشىلار سانيتارلىق جانە وزگە دە تالاپتاردى تولىق ساقتاسا, ولاردىڭ جۇمىسىنا ەشكىم بوگەت جاسامايدى, ال تەكسەرىستەر زاڭ اياسىندا جۇرگىزىلەدى. اكىمدىك اۋماق پەن عيماراتتىڭ ءتيىستى جاعدايدا بولۋىن تالاپ ەتۋگە مىندەتتى ەكەنىن دە اتاپ ءوتتى.
– بۇل اۆتوۆوكزال وتە ەسكى. ءبىز يەلەرىنە بىرنەشە رەت كۇردەلى جوندەۋ جۇرگىزىپ, جاڭا عيمارات سالۋدى ۇسىندىق. اۆتوۆوكزال ادامدارعا شىنىمەن قاجەت. بىراق اشىعىن ايتقاندا, ەشقانداي جاعداي جاسالماعان, بۇل ۇيات. بىرنەشە رەت ەسكەرتۋ جاسادىق, الايدا كاسىپكەرلەر قۇلاق اسپادى. باسقا كاسىپكەرلەرگە جاڭا اۆتوۆوكزال سالۋدى ۇسىندىق, بىراق قولداۋ بولمادى, – دەدى ايماق باسشىسى.
ونىڭ ايتۋىنشا, وسى سەبەپتى وبلىستىق بيۋدجەتتەن 975 ملن تەڭگە ءبولىنىپ, قىزىلوردادا جاڭا اۆتوۆوكزال سالىنعان. قازىرگى تاڭدا ول تولىققاندى جۇمىس ىستەپ تۇر.
– ەگەر جولاۋشى رەتىندە ەكى اۆتوۆوكزالعا دا بارىپ, سالىستىرىپ كورسەڭىز, ەسكىسىنىڭ نەگە تولىق جۇمىس ىستەمەيتىنىن جانە ادامداردىڭ نەلىكتەن جاڭاسىن تاڭدايتىنىن تۇسىنەسىز, – دەپ تۇيىندەدى نۇرلىبەك نالىباەۆ.
