بيىل مامىر ايىنىڭ باسىندا Sovico Group قازاقستانداعى اۋەجايلاردىڭ ءبىرىن ساتىپ الۋ نەمەسە باسقارۋ مۇمكىندىگىن قاراستىرىپ جاتقانى حابارلانعان بولاتىن. كەيىن سىرتقى ىستەر ۆيتسە-ءمينيسترى اڭگىمە قىزىلوردا وبلىسىنداعى اۋەجايدى باسقارۋ جونىندە بولعانىن ناقتىلاعان. ماۋسىم ايىندا شەتەلدىك كومپانيا ءوز جوسپارىن كەيىنگە قالدىرعانى بەلگىلى بولدى.
اكىمنىڭ ايتۋىنشا, تاراپتار كەلىسىمگە كەلە الماعان.
– ءبىز Sovico Group كومپانياسىمەن كەلىسسوزدەر جۇرگىزدىك, الايدا ولاردىڭ ۇسىنىستارى ءبىزدى قاناعاتتاندىرمادى. ءبىز ءوز شارتتارىمىزدى ايتتىق, ولار ءوز تالاپتارىن ۇسىندى. ينۆەستورلار قوسىمشا سۋبسيديالاۋدى سۇرادى, بىراق بۇل ەكونوميكالىق تۇرعىدان ءتيىمسىز بولعاندىقتان, ءبىز كەلىسكەن جوقپىز. قازىرگى ۋاقىتتا وزگە دە الەۋەتتى ينۆەستورلار قاراستىرىلىپ جاتىر. دەگەنمەن كەز كەلگەن جوبا ەڭ الدىمەن مەملەكەت ءۇشىن ءتيىمدى بولۋى كەرەك. قارىزى جوق, تۇراقتى جۇمىس ىستەپ تۇرعان اۋەجايدى سۋبسيديالاۋ شارتتارىمەن باسقا كومپانياعا بەرە المايمىز. بۇل جۇمىس جالعاسادى, – دەدى ايماق باسشىسى.
ونىڭ سوزىنشە, قازىر اۋەجاي ءوزىن-ءوزى اقتاپ وتىر, الايدا تابىس كولەمى ازىرگە جوعارى ەمەس. سەبەبى رەيستەر سانى تىكەلەي سۇرانىسقا بايلانىستى. قازىرگى تاڭدا اۋە ايلاعى اپتاسىنا شامامەن 29 ۇشىپ-قونۋ رەيسىنە قىزمەت كورسەتەدى.
