مالىمەتكە سايكەس, ينفەكتسيالىق ستاتسيونارلار مەن العاشقى مەديتسينالىق-سانيتاريالىق كومەك ۇيىمدارى قىزمەتكەرلەرىنىڭ ەڭبەكاقىسى جىل سايىن ءوسىپ وتىرعانىنا قاراماستان, جەدەل جاردەم قىزمەتى ماماندارى اراسىندا جالاقىنىڭ تومەندىگى مەن ەڭبەك جاعدايىنىڭ كۇردەلىلىگىنە قاتىستى الەۋمەتتىك رەزونانس ساقتالىپ وتىر. اتالعان ماسەلە ماڭعىستاۋ وبلىسىنداعى جاڭاوزەن قالاسىندا جانە قاراعاندى وبلىسىنىڭ تەمىرتاۋ قالاسىندا بايقالادى.
وسىعان بايلانىستى دەنساۋلىق ساقتاۋ مينيسترلىگى جالاقىنى ارتتىرۋعا باعىتتالعان بىرقاتار ۇسىنىس ازىرلەدى. اتاپ ايتقاندا, 2026 جىلعى 1 قاڭتاردان باستاپ ەرەكشە ەڭبەك جاعدايلارى ءۇشىن ۇستەماقى ەنگىزۋ ارقىلى اتالعان قىزمەتتەردە جۇمىس ىستەيتىن 37 مىڭعا جۋىق قىزمەتكەردىڭ ەڭبەكاقىسىن كوبەيتۋ كوزدەلىپ وتىر. بۇل ماقساتقا جىل سايىن شامامەن 32,4 ملرد تەڭگە كولەمىندە قوسىمشا قارجى قاجەت بولادى.
قابىلدانىپ جاتقان شارالاردىڭ ناتيجەسىندە اۋىلدىق جەرلەردەگى دارىگەرلەر تاپشىلىعى دا 16 پايىزعا قىسقارعان. سونىمەن قاتار, 2025 جىل العاشقى مەديتسينالىق-سانيتاريالىق كومەك ماماندارىنىڭ بىلىكتىلىگىن ارتتىرۋ جىلى بولىپ جاريالاندى.
بۇل شەشىم بازالىق مەديتسينالىق كومەكتىڭ ساپاسىن ارتتىرۋدى كوزدەيدى. ويتكەنى العاشقى مەديتسينالىق-سانيتاريالىق كومەك بۇكىل دەنساۋلىق ساقتاۋ جۇيەسىنىڭ ىرگەتاسى سانالادى.
قازىرگى ۋاقىتتا دارىگەرلەر مەن مەيىرگەرلەردى جاپپاي وقىتۋ جۇمىستارى جۇرگىزىلىپ, جاڭا ءبىلىم بەرۋ باعدارلامالارى مەن زاماناۋي پراكتيكالىق وقىتۋ ادىستەرى ەنگىزىلىپ جاتىر.
سونىمەن قاتار مەديتسينالىق قىزمەتكەرلەردى قورعاۋ ماقساتىندا كاسىبي جاۋاپكەرشىلىكتى ساقتاندىرۋ ينستيتۋتى ەنگىزىلدى. بۇدان بولەك, مەديتسينا قىزمەتكەرلەرىنە شابۋىل جاساعانى ءۇشىن قىلمىستىق كودەكسكە جەكە باپ ەنگىزۋ ماسەلەسى بويىنشا زاڭنامانى جەتىلدىرۋ جۇمىستارى قولعا الىنعان.
