فوتو: جوعارى سوت
2021 جىلى تۋعان ە.-ءنىڭ اتا-اناسى بالا ءتىسىنىڭ اۋىرسىنۋىنا بايلانىستى جەكە ستوماتولوگيالىق كلينيكاعا جۇگىنگەن.تەكسەرۋ بارىسىندا 11 ءتىستىڭ زاقىمدانعانى انىقتالعان. جالپى ناركوزبەن ەمدەۋگە دايىندىق كەزىندە ەم الۋشىعا تەكسەرۋلەر (جالپى قان تالداۋى, كواگۋلوگرامما, جۇرەكتىڭ ۋدز) تاعايىندالعان.
قابىنۋ پروتسەستەرىنىڭ جانە تەرىس زەرتحانالىق كورسەتكىشتەردىڭ بولۋىنا قاراماستان, ج. جالپى سەداتسيا جاعدايىندا ۇزاق ۋاقىتقا سوزىلعان ستوماتولوگيالىق ەم جۇرگىزگەن. ەم بارىسىندا سەۆوفلۋران ماسكالىق رەجيمدە 4,5 ساعات بويى قولدانىلعان. ال ەمدەۋدى ستوماتولوگ ا. جۇرگىزگەن.
«انەستەزيولوگيالىق قامتاماسىز ەتۋ كەزىندە سايكەس كەلمەيتىن تىنىس الۋ كونتۋرى قولدانىلىپ, وكپەنى جاساندى جەلدەتۋ اپپاراتىمەن سينحرونداۋ بولماعان. بۇل وكپەنىڭ مينۋتتىق ۆەنتيلياتسياسىنىڭ تومەندەۋىنە, جەدەل گيپوكسياعا, ميدىڭ ىسىنۋىنە سوقتىرىپ, سالدارىنان ەم الۋشى كوز جۇمعان. سوتتالۋشىنىڭ كىناسى جابىرلەنۋشىلەر مەن كۋالەردىڭ ايعاقتارى, سوت-مەديتسينالىق ساراپتامالاردىڭ قورىتىندىلارى, سونداي-اق قىلمىستىق ءىستىڭ ماتەريالدارىمەن دالەلدەندى», دەلىنگەن استانا قالالىق سوتى تاراتقان حابارلامادا.
پروكۋرور سوتتالۋشىنى 4 جىل مەرزىمگە باس بوستاندىعىنان ايىرۋ جازاسىن, سونداي-اق 3 جىل مەرزىمگە مەديتسينالىق قىزمەت كورسەتۋگە بايلانىستى لاۋازىمداردى اتقارۋ قۇقىعىنان ايىرۋدى تاعايىنداۋدى, الايدا امنيستيا اكتىسىن قولدانۋ ارقىلى نەگىزگى جازانى وتەۋدەن بوساتۋدى سۇرادى. ال ايىپتالۋشى كىناسىن مويىنداماعان.
جازا تاعايىنداۋ كەزىندە سوت سوتتالۋشىنىڭ 2 كامەلەتكە تولماعان بالاسىنىڭ بارىن, جۇمىس ورنىنان بەرىلگەن وڭ مىنەزدەمەنى, بۇرىن سوتتى بولماعانىن جەڭىلدەتەتىن ءمان-جايلار رەتىندە ەسكەردى.
«جاسالعان قىلمىستىڭ قوعامدىق قاۋىپتىلىك سيپاتى مەن دارەجەسىن, جەڭىلدەتەتىن ءمان-جايلاردىڭ بولۋىن جانە اۋىرلاتاتىن ءمان-جايلاردىڭ جوقتىعىن, سونداي-اق جابىرلەنۋشىلەردىڭ پىكىرىن ەسكەرە وتىرىپ, سوت ج.-عا 2 جىل مەرزىمگە باس بوستاندىعىنان ايىرۋ جازاسىن, سونداي-اق 3 جىل مەرزىمگە مەديتسينالىق كومەك كورسەتۋ نەمەسە مەديتسينالىق قىزمەت كورسەتۋگە بايلانىستى لاۋازىمداردى اتقارۋ قۇقىعىنان ايىرۋ جازاسىن تاعايىندادى», دەلىنگەن استانا قالالىق سوتى تاراتقان حابارلامادا.
دەسە دە امنيستيا اكتىسىن قولدانۋ نەگىزىندە ج. تاعايىندالعان نەگىزگى جازانى وتەۋدەن بوساتىلدى.
ءىس بويىنشا جابىرلەنۋشى تاراپ ازاماتتىق تالاپ قويماعان. ۇكىم زاڭدى كۇشىنە ەنگەن جوق.
قازاقستانداعى 662 ستوماتولوگيالىق كلينيكاعا تەكسەرىس جۇرگىزىلەدى
