فوتو: azattyq-ruhy.kz
ء«بىلىم بەرۋ سالاسىنا سوڭعى 3 جىلدا 812 ميلليارد 245 ميلليون تەڭگە, بيىل 346 ميلليارد 800 ميلليون تەڭگە ءبولىندى. وتكەن جىلى 13 ءبىلىم بەرۋ ۇيىمى جاڭادان اشىلدى. «كەلەشەك مەكتەپتەرى» ۇلتتىق جوباسى اياسىندا 54 ميلليارد 391 ميلليون تەڭگەگە 10 جاڭا مەكتەپ سالىنىپ, پايدالانۋعا بەرىلدى», دەدى ن.نالىباەۆ.
2023 جىلدان بەرى قىزىلوردا وبلىسىنداعى 9 مەكتەپتىڭ جانىنان قوسىمشا عيمارات بوي كوتەرگەن. بۇل ارقىلى ايماقتاعى ءۇش اۋىسىمدىق مەكتەپتەر ماسەلەسى تۇبەگەيلى شەشىمىن تاپقان. سونداي-اق «بىلىم بەرۋ ينفراقۇرىلىمىن قولداۋ قورى» ەسەبىنەن فيزيكا-ماتەماتيكا باعىتىنداعى ء«بىلىم-يننوۆاتسيا» ليتسەي-ينتەرناتى سالىنعان. اتالعان قوردىڭ دەمەۋشىلىگىمەن ارال اۋدانى مەرگەنساي اۋىلىندا جاقىن كۇندەرى 150 ورىندىق مەكتەپ پايدالانۋعا بەرىلەدى.
ارال اۋدانى توقاباي اۋىلىنداعى اپاتتىق جاعدايداعى مەكتەپتىڭ ماسەلەسى دە كاسىپكەر دەمەۋشىلىگىمەن شەشىمىن تاپقان. سوڭعى ءۇش جىلدا 15 مەكتەپ عيماراتىنا كۇردەلى جوندەۋ جۇرگىزىلگەن.
«قازگەرمۇناي» كومپانياسىنىڭ دەمەۋشىلىگىمەن قىزىلوردا قالاسىندا 350 ورىندىق وقۋشىلار سارايى, وبلىستىق بيۋدجەت قارجىسىنا جاڭاقورعان, شيەلى, جالاعاش اۋداندارىنان 200 ورىندىق وقۋشىلار ءۇيى مەن 50 ورىندىق ونەر مەكتەبى, بالالار مەن جاسوسپىرىمدەرگە ارنالعان «سىر جۇلدىزدارى» شىعارماشىلىق-يننوۆاتسيالىق اكادەمياسى, «ساۋتس ويل» كومپانياسىنىڭ دەمەۋشىلىگىمەن مۋزىكالىق كوللەدجدىڭ جاڭا عيماراتى سالىندى. بيىل «قازاقستان حالقىنا» قورى ارقىلى 500 ميلليون تەڭگەگە 2 مەكتەپ اۋىلدىق جەرلەردەگى رەسۋرستىق ورتالىقتار رەتىندە ينتەراكتيۆتى جانە زاماناۋي وقۋ كابينەتتەرىمەن قايتا جابدىقتالدى. بۇگىندە اتالعان قوردىڭ 2,5 ميلليارد تەڭگە قارجىسىنا وبلىستاعى – 58, ونىڭ ىشىندە 8 شاعىن جيناقتى مەكتەپتىڭ فيزيكا, حيميا, بيولوگيا پاندىك كابينەتتەرى قۇرال-جابدىقتارمەن قامتىلدى», دەدى قىزىلوردا وبلىسىنىڭ اكىمى.
ءوڭىر وقۋشىلارى ۇلتتىق بىرىڭعاي تەستىلەۋ ناتيجەسى بويىنشا دا ەكىنشى جىل قاتارىنان ۇزدىك بولىپ وتىر. ۇبت-عا قاتىسقان 9 352 وقۋشىنىڭ ورتاشا بالى 75,7 بولعان. تالاپكەرلەر جوعارى وقۋ ورىندارىنا بولىنگەن مەملەكەتتىك گرانتتى جەڭىپ الۋ بويىنشا دا رەسپۋبليكادا ءبىرىنشى ورىنعا شىققان.
«جاقىندا وتكەن اۋىل مەكتەپتەرى وقۋشىلارىنا ارنالعان رەسپۋبليكالىق پاندىك وليمپيادا قورىتىندىسىمەن قىزىلوردا وبلىسىنىڭ كومانداسى قوعامدىق-گۋمانيتارلىق باعىتتا 2-ءشى ورىن, جاراتىلىستانۋ-ماتەماتيكالىق باعىتتا 3-ءشى ورىندى يەلەندى. بوليۆيانىڭ سۋكرە قالاسىندا وتكەن 36-حالىقارالىق وليمپيادادا (International Olympiad in informatics-IOI) قازاقستان قۇراما كومانداسى اتىنان سايىسقا تۇسكەن قىزىلوردا قالاسىنداعى س.شاۋحامانوۆ اتىنداعى №9 ءبىلىم-يننوۆاتسيا ليتسەي-ينتەرناتىنىڭ 11-ءشى سىنىپ وقۋشىسى ماماداحۋنوۆ مانسۇر كۇمىس مەدال الدى. WORLDSKILLSKAZAKHSTAN X رەسپۋبليكالىق چەمپيوناتىندا قىزىلوردالىق جاستار 1 كۇمىس, 5 قولا مەدال جانە 5 ۇزدىك مامان مەدالونىنا يە بولدى», دەلىنگەن قىزىلوردا وبلىسى اكىمىنىڭ ءباسپاسوز قىزمەتى تاراتقان حابارلامادا.
وبلىس ۇستازدارى دا ءتۇرلى رەسپۋبليكالىق, حالىقارالىق ءبىلىم بايگەسىندە توپ جارىپ ءجۇر.
