فوتو: ازەرتادج
توكيودان سولتۇستىك-باتىسقا قاراي 220 شاقىرىم جەردە ورنالاسقان «كاسيۆادزاكي-كاريۆا» ستانتسياسى 2011 جىلعى جويقىن جەر سىلكىنىسى مەن تسۋناميدەن كەيىن توقتاتىلعان 54 رەاكتوردىڭ ءبىرى بولاتىن. قازىرگى ۋاقىتتا جاپونيا قازبا وتىنىنىڭ يمپورتىنا تاۋەلدىلىكتى ازايتۋ ءۇشىن قولدانىستاعى 33 ەنەرگوبلوكتىڭ 14-ءىن قايتا ىسكە قوستى.
NHK تەلەارناسىنىڭ حابارلاۋىنشا, ستانتسياداعى جەتى رەاكتوردىڭ بىرىنشىسىنە 2026 جىلدىڭ 20 قاڭتارىندا وتىن جۇكتەۋ جوسپارلانعان. اەس-ءتىڭ جالپى قۋاتتىلىعى 8,2 گۆت-تى قۇرايدى, بۇل بىرنەشە ميلليون ءۇيدى ەلەكتر ەنەرگياسىمەن قامتاماسىز ەتۋگە جەتكىلىكتى. جوسپار بويىنشا, كەلەسى جىلى قۋاتتىلىعى 1,36 گۆت بولاتىن ءبىر ەنەرگوبلوك, ال 2030 جىلعا قاراي ءدال سونداي تاعى ءبىر بلوك ىسكە قوسىلادى.
جاپونيانىڭ پرەمەر-ءمينيسترى ساناە تاكايچي ەنەرگەتيكالىق قاۋىپسىزدىكتى نىعايتۋ جانە يمپورتتىق وتىن باعاسىنىڭ وسۋىنە توسقاۋىل قويۋ ءۇشىن اتوم ستانتسيالارىن قولداۋدى جالعاستىرىپ وتىر. وتكەن جىلى ەل سۇيىتىلعان تابيعي گاز بەن كومىر يمپورتىنا 10,7 تريلليون يەن (68 ملرد دوللار) جۇمساعان.
جاپونيا جاساندى ينتەللەكت پەن دەرەكتەر ورتالىقتارىنىڭ دامۋىنا بايلانىستى الداعى ونجىلدىقتا ەنەرگياعا دەگەن سۇرانىس ارتادى دەپ بولجاپ وتىر. وسى قاجەتتىلىكتى وتەۋ ءۇشىن ەل باسشىلىعى 2040 جىلعا قاراي ەنەرگيا بالانسىنداعى اتوم ەنەرگەتيكاسىنىڭ ۇلەسىن 20%-عا دەيىن ەكى ەسەلەۋدى ماقسات ەتكەن.
