كومپانيانىڭ مالىمەتىنشە, 20 جەلتوقساندا Blue Origin 37-ءشى ۇشۋىن ءساتتى جۇزەگە اسىردى.
– NS-37 ميسسياسى بيىلعى توعىزىنشى ۇشۋىمىز بولدى جانە 2026 جىلدان باستاپ ءارى قاراي New Shepard ۇشۋلارىنىڭ سانىن ارتتىرۋعا نەگىز قالايدى. بۇل ەكيپاج بۇگىندە عارىشقا ۇشا الاتىن ادامداردىڭ اۋقىمى مەن الۋان تۇرلىلىگىن ايقىن كورسەتەدى: ينجەنەرلەر مەن عالىمداردان باستاپ, كاسىپكەرلەر, وقىتۋشىلار جانە الەمنىڭ تۇكپىر-تۇكپىرىنەن كەلگەن ينۆەستورلارعا دەيىن بار. ارقايسىسى ءوز كوزقاراسى مەن زەرتتەۋگە دەگەن قۇشتارلىعىن الا كەلەدى. ال ءميچيدىڭ ۇشۋىنىڭ ءمانى ايرىقشا – ول عارىشتىڭ بارشاعا قولجەتىمدى ەكەنىن دالەلدەيدى. ءبىز وعان وسى ارمانىن جۇزەگە اسىرۋعا كومەكتەسكەنىمىزدى ماقتان تۇتامىز, – دەدى New Shepard باعدارلاماسىنىڭ اعا ۆيتسە-پرەزيدەنتى فيل دجويس.
ايتا كەتەيىك, New Shepard اپپاراتىن جوبالاۋ كەزىندە مۇمكىندىگى شەكتەۋلى جانداردىڭ قاجەتتىلىكتەرى ەسكەرىلگەن. كەمە تولىقتاي اۆتونومدى جانە ۇشىرۋ الاڭىندا ليفتپەن جابدىقتالعان.
اەروعارىشتىق تەحنيكا مەن مەحاترونيكا سالاسىنىڭ ينجەنەرى, ەۋروپالىق عارىش اگەنتتىگىندە قىزمەت ەتەتىن ميحاەلا (ميچي) بەنتحاۋس كاسىبي جولىن عالامارالىق زەرتتەۋلەردى دامىتۋعا باعىتتالعان عىلىمي ىنتىماقتاستىققا ارناعان. 2018 جىلى ول تاۋ ۆەلوسيپەدىمەن سەرۋەندەۋ كەزىندە اپاتقا ۇشىراپ, سونىڭ سالدارىنان ج ۇلىن جاراقاتىن العان. سوعان قاراماستان, ايەل سپورتپەن اينالىسۋدى جالعاستىرىپ كەلەدى, ونىڭ ىشىندە ارباداعى تەننيسپەن دە شۇعىلدانادى.
ۇشۋ شتاتتىق رەجيمدە ءوتتى جانە 10 مينۋت 26 سەكۋندقا سوزىلدى. ەكيپاج وتىرعان كاپسۋلا جەر بەتىنەن 106 شاقىرىم, ال تەڭىز دەڭگەيىنەن 107 شاقىرىم بيىكتىككە دەيىن كوتەرىلدى.
