ۆەدومستۆونىڭ مالىمەتىنشە, 19 جەلتوقساندا پوليتسياعا الماتىدا قىز بالانىڭ جوعالىپ كەتكەنى تۋرالى حابار تۇسكەن. ونىڭ تۋىسى قىزدىڭ تاۋلى ايماققا سنوۋبورد تەبۋگە شىعىپ, كەيىن بايلانىسقا شىقپاي قالعانىن ايتقان.
وسىدان كەيىن دەرەۋ تجم-ءنىڭ اۋماقتىق بولىمشەلەرىنىڭ كۇشتەرى مەن قۇرالدارى جۇمىلدىرىلىپ, پوليتسيا قىزمەتكەرلەرى, تجم قۇتقارۋشىلارى جانە ەرىكتىلەر ىزدەستىرۋ جۇمىستارىنا تارتىلعان. وقيعا ورنىندا الماتى قالاسى مەن الماتى وبلىسى تجد قىزمەتكەرلەرىنىڭ باسشىلىعىمەن جەدەل شتاب قۇرىلعان.
20 جەلتوقسان كۇنى ساعات 13:04-تە ىزدەستىرۋ-قۇتقارۋ جۇمىستارى بارىسىندا بۋتاكوۆ سارقىراماسى اۋدانىندا, بۋكرەەۆ شىڭى ماڭىندا جوعالىپ كەتكەن ايەل ادامنىڭ ءمايىتى تابىلعان.
مارقۇمنىڭ دەنەسى بۋتاكوۆ شاتقالىنداعى باقىلاۋ-قۇتقارۋ بەكەتىنە دەيىن جەتكىزىلىپ, پوليتسيا قىزمەتكەرلەرىنە تاپسىرىلدى. سوت-مەديتسينالىق ساراپتاما تاعايىندالدى. قورىتىندى سايكەستەندىرۋ قاجەتتى ساراپتامالار اياقتالعاننان كەيىن جۇرگىزىلەدى.
ىزدەستىرۋ جۇمىستارىنا الماتى قالاسى مەن الماتى وبلىسىنىڭ تجد, قۇتقارۋ قىزمەتى, اپات مەديتسيناسى ورتالىعىنىڭ 73 قىزمەتكەرى جانە ەرىكتىلەر قاتىسقان. قىزدى ىزدەۋگە 10 تەحنيكا, 5 ۇشقىشسىز ۇشۋ اپپاراتى جانە 3 كينولوگيالىق ەسەپتوپ جۇمىلدىرىلدى.
