بۇل شارا پالميرا قالاسىندا امەريكالىق اسكەري قىزمەتكەرلەرگە جاسالعان شابۋىلعا جاۋاپ رەتىندە قولعا الىنعان. بۇل تۋرالى اقش قورعانىس ءمينيسترى پيت حەگسەت مالىمدەدى.
اقش قورعانىس ءمينيسترىنىڭ ايتۋىنشا, امەريكالىق اسكەريلەر سيريادا «ياسترەبينىي ۋدار» («Hawk Strike») دەپ اتالعان وپەراتسيانى باستادى.
— بۇگىن اقش اسكەرى سيريا اۋماعىندا يگيل سودىرلارىن, ولاردىڭ ينفراقۇرىلىمى مەن قارۋ-جاراق قويمالارىن جويۋ ماقساتىندا وپەراتسيا جۇرگىزۋدى باستادى. بۇل 13 جەلتوقساندا سيريانىڭ پالميرا قالاسىندا امەريكالىق اسكەرگە جاسالعان شابۋىلعا جاۋاپ بولىپ وتىر, — دەپ جازدى پيت حەگسەت X الەۋمەتتىك جەلىسىندەگى پاراقشاسىندا.
ونىڭ سوزىنشە, بۇل ارەكەت سوعىستىڭ باستالۋى ەمەس, شابۋىلعا بەرىلگەن قاتاڭ جاۋاپ.
— بۇل — سوعىس جاريالاۋ ەمەس, بۇل — كەك. پرەزيدەنت دونالد ترامپ باسشىلىعىنداعى اقش ءوز ازاماتتارىن قورعاۋدا ەشقاشان كىدىرمەيدى. ەگەر الەمنىڭ كەز كەلگەن نۇكتەسىندە امەريكالىقتارعا شابۋىل جاسالسا, ءبىز كىنالىلەردى تاۋىپ, ولاردى اياۋسىز جويامىز. بۇگىن ءبىز جاۋلارىمىزدى انىقتاپ, كوزىن جويدىق. جانە بۇل ارەكەت جالعاسا بەرەدى, — دەدى پەنتاگون باسشىسى.
The New York Times باسىلىمىنىڭ جازۋىنشا, اقش سيرياداعى اۋە سوققىلارىن جۇما كۇنى, 19 جەلتوقساندا باستاعان. وپەراتسياعا جويعىش ۇشاقتار, تىكۇشاقتار مەن ارتيللەريالىق بولىمشەلەر تارتىلعان. امەريكالىق شەنەۋنىكتىڭ ايتۋىنشا, «جاپپاي شابۋىل» بىرنەشە ساعاتقا سوزىلىپ, سەنبى كۇنى تاڭەرتەڭگە دەيىن جالعاسادى.
بۇعان دەيىن اقش پرەزيدەنتى دونالد ترامپ پالميراداعى شابۋىل ءۇشىن جاۋاپتى يگيل قاتاڭ جاۋاپ الاتىنىن مالىمدەگەن بولاتىن. ونىڭ ايتۋىنشا, سيريا بيلىگى اقش-تىڭ بۇل ارەكەتتەرىن تولىق قولداپ وتىر.
