توتەنشە جاعداي وكىلدەرى ءبىزدى ادام ءومىرى الاڭداتادى دەيدى. سەبەبى استانادا سۋ ايدىندارىندا جۇقا مۇزعا شىعىپ, ءوز ءومىرىن قاتەرگە تىگەتىندەر كوپ ەكەن. سوندىقتان ەلوردالىق توتەنشە جاعدايلار دەپارتامەنتىنىڭ قىزمەتكەرلەرى كۇن سايىن رەيدكە شىعىپ, مۇز ۇستىندەگى قاۋىپسىزدىك تالاپتارىن تۇرعىندارعا ءتۇسىندىرىپ ءجۇر ەكەن. ولار 1 جەلتوقساننان باستاپ ءتۇسىندىرۋ جۇمىستارىن جۇرگىزىپ ءجۇر ەكەن.
– ەسىل وزەنىنىڭ بويىندا مۇز ۇستىنە شىعىپ, بالىق اۋلايتىن ازاماتتارمەن تۇراقتى پروفيلاكتيكالىق رەيدتەر جۇرگىزىلىپ كەلەدى. رەيد بارىسىندا مۇزدىڭ ناقتى قالىڭدىعى ولشەنىپ, قاۋىپ توندىرەتىن اۋماقتار ارنايى بەلگىلەنەدى. بالىقشى قۇتقارۋ جابدىقتارىمەن جابدىقتالۋى كەرەك. ول قۇتقارۋ جەلەتى, ارقانىن الا شىعۋى كەرەك. ازامات قاۋىپسىزدىك ەرەجەلەرىن بۇزعان جاعدايدا ءبىزدىڭ توتەنشە جاعداي دەپارتامەنتىمەن اكىمشىلىك قۇقىق بۇزۋشىلىق كودەكسىنىڭ 412 بابىنا سايكەس, اكىمشىلىك جاۋاپكەرشىلىككە تارتىلادى, – دەدى دەپارتامەنت باسشىسىنىڭ ورىنباسارى دانيار تاجىباەۆ.
قۇتقارۋشىلار كۇن سايىن تاڭعى 08:00-دەن كەشكى 20:00-گە دەيىن ەسىل وزەنىن ارالايدى. اتالعان جۇمىسقا تاجىريبەلى ماماندار دا تارتىلعان. سولاردىڭ ءبىرى سەيىلبەك ناقىپوۆ. ول توتەنشە جاعدايدار دەپارتامەنتىندە 20 جىلدان استام ۋاقىت قىزمەت ەتىپ كەلەدى.
– مۇزدىڭ ۇستىمەن كونكيمەن جۇرگەندەي قوزعالۋ كەرەك. تىكەلەي, جاياۋ ادام سياقتى ەمەس, سىرعاناپ قيمىلداعان دۇرىس. سوندا مۇز استىنا ءتۇسىپ كەتۋ قاۋپى ازايادى. ال ەگەر ادام مۇز استىنا ءتۇسىپ كەتسە, ەڭبەكتەپ قاتتى مۇز جاتقان جاققا قاراي شىعۋى كەرەك. ايتپەسە قايتادان وپىرىلىپ كەتۋى مۇمكىن, – دەدى باس قۇتقارۋشى ناقىپوۆ.
مامانداردىڭ ايتۋىنشا, تۇرعىنداردىڭ جاياۋ ءجۇرۋى ءۇشىن مۇزدىڭ قالىڭدىعى كەمىندە 10 سانتيمەتردەن كوپ بولۋى قاجەت. ال بالىق اۋلاۋ كەزىندە تالاپ ودان دا قاتاڭ. مۇزدىڭ قالىڭدىعى كەمىندە 25 سانتيمەتر بولۋى شارت. مۇنداي تەكسەرىستەردىڭ باستى ماقساتى – قىس مەزگىلىندە قايعىلى جاعدايلاردىڭ الدىن الۋ. قۇتقارۋشىلار تۇرعىندارعا جۇقا مۇزعا شىقپاۋعا, قاۋىپسىزدىك تالاپتارىن قاتاڭ ساقتاۋعا جانە توتەنشە جاعدايدا 112 نومىرىنە حابارلاسۋعا شاقىردى.
