«ىسكەر ايماق» جوباسى شاعىن كاسىپكەرلىك سالاسىن قولدايتىن باستى قۇجات بولعالى تۇر. ۇلتتىق ەكونوميكا مينيسترلىگىنىڭ حابارلاۋىنشا, قاۋلى جوباسىندا كاسىپكەرلەرگە قارجىلاي كومەك نەسيەلەرىن بەرۋدەن باستاپ, ينفراقۇرىلىمدى دامىتۋ, بيزنەس وكىلدەرىن وقىتۋ, ولاردىڭ جوبالارىن قولداۋعا دەيىنگى بارلىق ءىس-شارا قامتىلعان.
قۇجاتتا شاعىن بيزنەس سۋبەكتىلەرىنە قارجىلاي كومەك پايىزدىق مولشەرلەمەنىڭ ءبىر بولىگىن سۋبسيديالاۋ جانە قارىزدارعا كەپىلدىك بەرۋ ارقىلى بەرىلەتىنى ايتىلعان. بۇل شارالار قارىز قاراجاتتارىنىڭ قۇنىن تومەندەتۋگە, نەسيە رەسۋرستارىنا جەڭىل قول جەتكىزۋگە مۇمكىندىك بەرمەك.
باعدارلاما ىسكە قوسىلسا, شاعىن كاسىپ يەلەرى ينفراقۇرىلىم ماسەلەسىن دە وڭاي شەشىپ, قاجەتتى ءۇي-جايلارى مەن جەر ۋچاسكەلەرىن الۋ جاعىنان مەملەكەتتىڭ قولداۋىنا ارقا سۇيەي الادى. «جەرگىلىكتى اتقارۋشى ورگاندار مەن «اتامەكەن» ۇكپ وڭىرلىك ماماندانۋدى ەسكەرە وتىرىپ, قىزمەت تۇرلەرىن ايقىندايدى, كاسىپكەرلەردىڭ وتىنىمدەرىن قارايدى ءارى بەكىتەدى, ناتيجەلەرگە مونيتورينگ جۇرگىزە وتىرىپ, ينفراقۇرىلىمدىق قولداۋ كورسەتەدى», دەلىنگەن مينيسترلىكتىڭ بىزگە بەرگەن اقپاراتىندا.
جوبادا كاسىپكەرلىكتى دامىتۋ ماقساتىندا ورتاق جاۋاپكەرشىلىككە تارتىلاتىن وڭىرلەرگە باسىمدىق بەرىلەدى. ول ءۇشىن جەرگىلىكتى اتقارۋشى ورگاندار وزدەرىنىڭ الەۋمەتتىك-ەكونوميكالىق الەۋەتىن, وزەكتى قاجەتتىلىكتەردى ەسكەرە وتىرىپ, كەرەكتى تاۋارلاردىڭ تىزبەسىن جاساۋعا ءتيىس.
باعدارلامادا وڭىرلىك ەكونوميكانىڭ ەرەكشەلىگىن ەسكەرەتىن كرەديتتىك ليميتتەردىڭ ەكى دەڭگەيلى جۇيەسى دە قاراستىرىلعان.
ءبىرىنشى دەڭگەي وڭىرلىك ماماندانۋعا سايكەس كەلەتىن, حالىقتىڭ ءومىر ءسۇرۋ ساپاسىن ارتتىرۋعا باعىتتالعان جوبالاردى قامتيدى, ياعني اۋىل شارۋاشىلىعى ونىمدەرىن قايتا وڭدەۋ, ازىق-ت ۇلىك شاعىن وندىرىستەرى, ناۋبايحانالار, اعاش وڭدەۋ جانە اۋىل, اۋدان ورتالىقتارىنداعى قولونەر جوبالارىنا ەرەكشە كوڭىل ءبولىنىپ, بۇل سالالارعا سۋبسيديالار بيۋدجەتىنىڭ 70%-نا دەيىن بولىنەدى.
ەكىنشى دەڭگەي تۇراقتى وندىرىستىك بازانى قالىپتاستىرۋعا, جۇمىسپەن قامتۋدى كەڭەيتۋگە, وڭىرلەردە ۇزاقمەرزىمدى ەكونوميكالىق تيىمدىلىكتى قۇرۋعا ارنالعان. بۇل دەڭگەيدەگى جوبالارعا تاماق ءوندىرىسى, جيھاز تسەحتارى جانە قۇرىلىس ماتەريالدارىن ءوندىرۋ جاتادى, وعان سۋبسيديالار بيۋدجەتىنىڭ 30%-نا دەيىن ءبولۋ كوزدەلگەن.
«اباي, ۇلىتاۋ, جەتىسۋ, سولتۇستىك قازاقستان, قىزىلوردا وبلىستارىنداعى ونەركاسىپتىك جوبالارعا ەرەكشە نازار اۋدارىلدى. باعدارلاما بارلىق اۋىلدىق ايماقتى قامتيدى, ونداعى شاعىن جانە ورتا بيزنەس جوبالارىن قولدايدى», دەيدى مينيسترلىك وكىلدەرى.
باعدارلامانى ازىرلەۋشىلەر «ىسكەر ايماق» بۇكىل ەلدەگى شاعىن بيزنەستى دامىتۋدىڭ جاڭا بىرىڭعاي ءتاسىلى بولاتىنىنا سەنىمدى. جوبادا اسىرەسە, اۋىلدىق جەردەگى شاعىن كاسىپ يەلەرىن قولداۋعا باسىمدىق بەرىلەدى. مينيسترلىكتىڭ حابارلاۋىنشا, باعدارلامانى قابىلداۋ – اۋىلدىق ەلدى مەكەندەر مەن شاعىن قالالارداعى بيزنەستى اۋقىمدى دامىتۋدىڭ ماڭىزدى قادامى.
«ىسكەر ايماق» ىسكە كىرىسسە, بىلعارى, ءسۇت, قولونەر مەن باسقا دا باسىم سالالاردىڭ دامۋىنا نازار اۋدارىلىپ, شيكىزاتتى جەرگىلىكتى ءوندىرۋ ءارى قايتا وڭدەۋدى ىنتالاندىرۋعا مۇمكىندىك بەرىلەدى.
