بۇل جوبا قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ «عىلىم ورداسى» رمك باستاماسىمەن جانە قازاقستان رەسپۋبليكاسىنىڭ ىستانبۇل قالاسىنداعى باس كونسۋلدىعىنىڭ قولداۋىمەن العاش رەت جۇزەگە اسىرىلدى.
ەكىجاقتى باستاما اياسىندا قازاقستاندىق تاراپ كىتاپحانا قورىنا 250 دانا كىتاپتى سىيعا تارتتى. جاڭا بۇرىشتا قازاق ادەبيەتى, تاريحى, مادەنيەتى مەن عىلىمىنا ارنالعان باسىلىمدار قويىلدى. اتالعان ەڭبەكتەر «عىلىم ورداسى» رمك ورتالىق عىلىمي كىتاپحاناسى, ش. ش. ءۋاليحانوۆ اتىنداعى تاريح جانە ەتنولوگيا ينستيتۋتى, سونداي-اق م. و. اۋەزوۆ اتىنداعى ادەبيەت جانە ونەر ينستيتۋتى تاراپىنان ۇسىنىلدى.
ايتا كەتۋ كەرەك, ورتالىق عىلىمي كىتاپحانا – بۇگىندە قازاقستانداعى ەڭ ءىرى عىلىمي كىتاپحانالاردىڭ ءبىرى, ونىڭ قورى شامامەن 6 ميلليون ساقتاۋ بىرلىگىن قۇرايدى. رامي كىتاپحاناسىندا «قازاقستاننىڭ عىلىمي-ادەبي بۇرىشىنىڭ» اشىلۋى – قازاق عىلىمى مەن ادەبيەتىن الەمدىك كەڭىستىكتە كەڭىنەن تانىتۋعا, سونداي-اق قازاقستان مەن تۇركيا اراسىنداعى رۋحاني بايلانىستاردى نىعايتۋعا باعىتتالعان ماڭىزدى مادەني باستاما.
