ونىڭ ىشىندە دارحان دالا توسىندە اقىق ءدان ايالاعان ديقان ەڭبەگى ەرەسەن. بيىل اقمولالىق ديقاندار 7 ميلليون 600 مىڭ توننا رەكوردتىق استىق جينادى. ايتا قالارلىق تابىس. وسى تاريحي جەتىستىككە وراي وبلىس ورتالىعىنداعى «دوستار» مادەنيەت سارايىندا وتكەن «جاسا, ديقان, ەرلەرىم!» تاقىرىبىنداعى وبلىستىق ايتىسقا 12 اقىن قاتىستى. ساحنا تورىندە كۇندى تۇنگە, ءتۇندى كۇنگە ۇلاستىرىپ جان اياماي ەڭبەك ەتكەن ديقانداردىڭ ماڭداي تەرى, ەڭبەكتەگى ەرلىگى, ەل ىرىزدىعىن مولايتۋ جولىنداعى ىرگەلى ءىسى جىر وزەگىنە اينالدى. بۇل شارانى ۇيىمداستىرۋشى «امانات» پارتياسىنىڭ وبلىستىق فيليالى, وبلىستىق اقىندار وداعى. ءبىر ايتا كەتەرلىگى, ءسوز سايىسىنا ەلگە تانىلىپ قالعان ءتىس قاققان اقىندارمەن قاتار, ونەر ولكەسىنە ەندى عانا قادام باسقان جاس تالاپكەرلەر دە قاتىستى. ۇتىمدى پىكىر, ۇتقىر سوزىمەن كوپشىلىك كوڭىلىن باۋراعان كەي تۇستاردا جاس اقىنداردىڭ دا سۋىرىپ سالار ۇشقىرلىعى, ءسوز ونەرىن قاپىسىز مەڭگەرگەن تابيعي تالانتى اڭعارىلىپ تۇردى. جالاڭ تەڭەۋ, جالپىلاما ءسوز ەمەس, ەڭبەك اتتى قۇدىرەتتىڭ حالقىمىزدىڭ عاسىرلار بويى جالعاسىپ كەلە جاتقان اسىل قاسيەتى ەكەندىگى ءسوز استارىنا سالماق سالىنىپ ايتىلدى. جەتەلى تىڭدارمان قاۋىمنىڭ جان-دۇنيەسىن باۋرايتىن جاقسى ءسوز ەلدىڭ ىرىسى مەن ىرىزدىعىن, بەرەكەسى مەن بىرلىگىن ارتتىرىپ, جاسامپاز ىستەر توڭىرەگىندە توپتاستىرۋعا باعىتتالدى. ءازىل-قالجىڭ دا ايتىلدى.
قازىلار القاسى ساحنا تورىنە كوتەرىلگەن 12 اقىننىڭ ىشىنەن تورتەۋىن ىرىكتەپ الىپ, رەسپۋبليكالىق ايتىسقا جولداما بەردى. بارلىق قاتىسۋشىلارعا العىس حاتتار مەن اقشالاي سەرتيفيكاتتار تابىس ەتىلدى. ءسوز دوداسىنىڭ سوڭىندا قازىلار القاسىنىڭ توراعاسى ەرمەك نۇعىمانوۆ ايتىستى قورىتىندىلاپ, پايىمدى پىكىرىن بىلدىرسە, «امانات» پارتياسى اقمولا وبلىستىق فيليالىنىڭ توراعاسى بەرگەن بەسپالينوۆ بارلىق اقىندارعا العىس لەبىزىن جەتكىزدى.
