فوتو: ءماجىلىس
دەپۋتاتتىڭ ايتۋىنشا, قازاقستاندا ازاماتتاردى تاسىمالداۋ قىزمەتى سالاسىندا 500 مىڭنان استام تاكسي جۇرگىزۋشىسى ەڭبەك ەتەدى. الايدا بۇل كورسەتكىش ءالى كۇنگە دەيىن رەسمي تۇردە ناقتىلانباعان. پلاتفورمالىق سەرۆيستەردىڭ ەشقايسىسى تاكسي جۇرگىزۋشىلەرىنىڭ ناقتى سانى تۋرالى تولىق دەرەك ۇسىنا الماي وتىر.
«بۇل – قازىرگى تسيفرلىق قوعام جاعدايىندا اقىلعا قونىمسىز جاعداي. اسىرەسە مەملەكەت باسشىسى تسيفرلاندىرۋعا ناقتى مىندەتتەر قويىپ وتىرعان كەزەڭدە بۇل ماسەلە اسا وزەكتى.
اگرەگاتورلار ارقىلى پلاتفورمالىق جۇمىسپەن قامتۋ بۇگىندە حالىقتىڭ كۇندەلىكتى ءومىرىنىڭ اجىراماس بولىگىنە اينالدى. ولار جىل سايىن 150 ميلليوننان استام ساپاردى جۇزەگە اسىرادى. بۇل – ادامداردىڭ ءومىرى مەن دەنساۋلىعى. ءبىز ولاردى زاڭنامالىق دەڭگەيدە قورعاۋعا مىندەتتىمىز», دەدى ە.بەيسەنباەۆ.
ماجىلىسمەننىڭ سوزىنشە, ءارتۇرلى دەرەكتەر بويىنشا كولەمى 500 ملرد تەڭگەگە دەيىن جەتەتىن بۇل نارىقتاعى قۇقىقتىق جانە زاڭنامالىق «ويىن ەرەجەلەرىمەن» ەڭ الدىمەن سالالىق مينيسترلىك پەن اگرەگاتورلاردىڭ وزدەرى اينالىسۋى ءتيىس. قولدانىستاعى زاڭنامادا ءالى كۇنگە دەيىن اگرەگاتورلاردىڭ (Yandex, InDriver, Aparu جانە باسقالار) نەگىزگى پروتسەستەرىن كورسەتپەيتىن سوۆەتتىك كەزەڭنىڭ ۇعىمدارى قولدانىلىپ كەلەدى.
«ناتيجەسىندە ولاردىڭ قىزمەتى ءىس جۇزىندە «سۇر ايماقتا» قالىپ وتىر.
جاۋاپكەرشىلىك, قاۋىپسىزدىك ستاندارتتارى, الگوريتمدەردىڭ اشىقتىعى, ساقتاندىرۋ, جولاۋشىلار مەن جۇرگىزۋشىلەردىڭ قۇقىقتارىن قورعاۋ ماسەلەلەرى قۇقىقتىق الاڭنان تىس قالعان.«تاكسي جۇرگىزۋشىسى» ۇعىمىنىڭ ءوزى ناقتى ايقىندالماعان. جۇرگىزۋشى, تاكسوپارك جانە اگرەگاتور اراسىنداعى جاۋاپكەرشىلىك, قۇقىقتار مەن مىندەتتەر بولىنبەگەن, بۇل تاكسيستەردىڭ الەۋمەتتىك قورعالماۋىنا الىپ كەلىپ وتىر», دەدى ول.
ەلنۇر سابىرجان ۇلىنىڭ پىكىرىنشە, تاكسي جۇرگىزۋشىلەرىنىڭ كۇندەلىكتى مەديتسينالىق تەكسەرۋدەن ءوتۋ تالابى فورمالدى سيپاتقا يە بولىپ, ءىس جۇزىندە ورىندالىپ جاتقان جوق. سونىمەن قوسا, ساپارلار ساقتاندىرىلمايتىندىقتان, جولاۋشىلار مەن جۇرگىزۋشىلەردىڭ قاۋىپسىزدىگى ماسەلەسى دە تۇسىنىكسىز كۇيدە قالىپ وتىر. سونداي-اق, تاكسيستەر ۇسىناتىن مالىمەتتەردىڭ – جۇرگىزۋشى كۋالىگىنىڭ, كولىكتىڭ تەحنيكالىق تەكسەرۋدەن وتكەنى تۋرالى جانە تەحنيكالىق پاسپورتتارىنىڭ دۇرىستىعى تەكسەرىلمەيدى.
«ناتيجەسىندە تاپسىرىستاردى جۇرگىزۋشى كۋالىگى جوق ادامداردىڭ, ءتىپتى ەڭ قاۋىپتىسى – وڭ ءرۋلدى كولىكتەرمەن جوعارى جىلدامدىقپەن قالاارالىق جولداردا جۇرەتىندەردىڭ ورىنداۋىنا جول بەرىلىپ وتىر.
كەيبىر اگرەگاتورلار ساپاردىڭ ناقتى قۇنى تۋرالى اقپارات بەرمەيدى, قولما-قول اقشاسىز تولەم جاساۋ مۇمكىندىگى جوق.
تەحنولوگيالىق مۇمكىندىكتەر بولا تۇرا, اگرەگاتورلار كولىكتىڭ جىلدامدىعىن, قوزعالىسىن, مارشرۋتتان اۋىتقۋىن باقىلامايدى. بۇل دا جولاۋشىلاردىڭ قاۋىپسىزدىگىنە قاتەر توندىرەدى», دەدى ە.سابىرجان ۇلى.
دەپۋتات سونداي-اق كەيبىر سەرۆيستەردىڭ قوسىمشالارىندا جەدەل قىزمەتتەردى شاقىرۋ جۇيەسى مەن كليەنتپەن تاۋلىك بويى بايلانىس ورناتۋ مۇمكىندىگى قاراستىرىلماعانىن ايتتى.
«وسىلايشا, تاكسي قىزمەتىن كۇندەلىكتى پايدالاناتىن ميلليونداعان ازامات الەۋەتتى قاۋىپ-قاتەرگە ۇشىراپ وتىر, ال جۇرگىزۋشىلەر الەۋمەتتىك تۇرعىدا قورعالماعان كۇيدە قالىپ وتىر», دەدى ول.
وسى ماسەلەلەرگە بايلانىستى ە.بەيسەنباەۆ مىناداي شەشىمدەر قابىلداۋدى قاجەت دەپ سانايتىنىن ايتتى.
«بىرىنشىدەن, قايتالانۋدى بولدىرماۋ ءۇشىن اقپاراتتىق-ديسپەتچەرلىك قىزمەت پەن تسيفرلىق سەرۆيستەردىڭ فۋنكتسيالارىن ناقتى اجىراتۋ.
ەكىنشىدەن, «تاكسي جۇرگىزۋشىسى» ۇعىمىن زاڭنامالىق تۇرعىدا بەكىتىپ, ونىڭ مارتەبەسىن, قۇقىقتارى مەن مىندەتتەرىن ايقىنداۋ. تاكسي جۇرگىزۋشىلەرىن تاپسىرىستى ءۇشىنشى تۇلعالارعا بەرمەي, جەكە ءوزى ورىنداۋعا مىندەتتەۋ, سونداي-اق ەڭ تومەنگى سانيتارلىق تالاپتاردى ساقتاۋ.
ۇشىنشىدەن, فورمالدى كۇندەلىكتى تەكسەرۋلەردىڭ ورنىنا مىندەتتى تۇراقتى مەديتسينالىق تەكسەرۋ ەنگىزۋ جانە مەديتسينالىق باقىلاۋدى دەنساۋلىق ساقتاۋ مينيسترلىگىنىڭ اقپاراتتىق جۇيەلەرىمەن ينتەگراتسيالاۋ ارقىلى اۆتوماتتاندىرۋ.
تورتىنشىدەن, ءاربىر ساپار بويىنشا جولاۋشىلار مەن جۇرگىزۋشىلەردىڭ ءومىرى مەن دەنساۋلىعىن ساقتاندىرۋدى اگرەگاتورلارعا مىندەتتەۋ.
بەسىنشىدەن, جولاۋشىلاردى ساپاردىڭ ناقتى قۇنى تۋرالى حاباردار ەتۋ, جىلدامدىقتى, قوزعالىستى, مارشرۋتتان اۋىتقۋدى باقىلاۋ, جۇرگىزۋشى مەن كولىك دەرەكتەرىنىڭ مەملەكەتتىك دەرەكقورلار ارقىلى سايكەستىگىن تەكسەرۋ», دەدى دەپۋتات.
ەلنۇر بەيسەنباەۆ دەپۋتاتتىق ساۋالىنىڭ سوڭىندا, «AMANAT» پارتياسى فراكتسياسىنىڭ دەپۋتاتتارى ءتيىستى زاڭنامالىق وزگەرىستەردى ازىرلەۋگە جان-جاقتى قولداۋ كورسەتۋگە دايىن ەكەنىن جەتكىزدى.
