«قازگيدرومەت» رمك فيليالىنىڭ مالىمەتىنە سايكەس, 14 جەلتوقساندا باتىس قازاقستان وبلىسى اۋماعىندا اۋا رايى جاعدايى قولايسىز بولىپ تۇر. وڭىردە كوكتايعاق, بۇرقاسىن, قاتتى قار, تۇمان بايقالادى, سونداي-اق وبلىستىڭ باتىسى مەن سولتۇستىگىندە كەي جەردە جاڭبىركەي جەردە قار جاۋىپ, بوران بولىپ تۇر. جەلدىڭ ەكپىنى سەكۋندىنا 15-20 مەترگە, كەي جەرلەردە ءتىپتى 23-28 مەترگە جەتكەن. وسىعان بايلانىستى اۆتوجولداردا كوكتايعاق پايدا بولىپ, بۇرقاسىن سالدارىنان جولداردىڭ جەكەلەگەن ۋچاسكەلەرى جابىلدى. مىسالى, 13-ىنەن 14-ىنە قاراعان تۇندە وبلىستاعى ونەگە-بيسەن-سايقىن, جىمپيتى-قاراتوبە, تەرەكتى-اقساي باعىتىنداعى جولدار جابىلدى. ال بۇگىن, 14 جەلتوقساندا قولايسىز اۋا رايىنا بايلانىستى رەسپۋبليكالىق ماڭىزى بار ورال-اتىراۋ تاس جولى مەن ۇلكەن شاعان-پەرەمەتنىي تاس جولىندا كولىك قوزعالىسى توقتاتىلدى.
سونداي-اق ساعات 11:30-داعى جاعداي بويىنشا قولايسىز اۋا رايىنا بايلانىستى وبلىستا بىرقاتار رەسپۋبليكالىق ماڭىزى بار اۆتوجول ۋچاسكەلەرىندە, اتاپ ايتساق قازتالوۆ-جانىبەك, ونەگە-سايقىن, ورال-رف شەكاراسى, بقو-اتىراۋ وبلىسى شەكاراسى جانە چاپاي-قازتالوۆ باعىتىندا بارلىق كولىك ءتۇرى ءۇشىن قوزعالىسقا ۋاقىتشا شەكتەۋ ەنگىزىلدى.
بۇعان قوسا اۋا رايىنىڭ كۇرت ناشارلاۋىنا بايلانىستى وبلىستىڭ بىرقاتار اۋدانىندا ەلەكتر ەنەرگياسى ءوشىپ قالعان. ءتىپتى ورال قالاسىنىڭ كەيبىر اۋدانىندا دا بۇگىن تاڭ اتقالى جارىق جوق. وبلىس اكىمىنىڭ ءباسپاسوز قىزمەتى قازىرگى ۋاقىتتا ەنەرگەتيكا سالاسىنىڭ قىزمەتتەرى كۇشەيتىلگەن رەجىمدە جۇمىس ىستەپ جاتقانىن, ەلەكتر جەلىلەرىن بارىنشا تەزىرەك قالپىنا كەلتىرىلەتىنىن حابارلادى.
باتىس قازاقستان وبلىسىنىڭ اكىمى ناريمان تورەعاليەۆ ەنەرگەتيكا سالاسىنا جاۋاپتى ورگانداردىڭ قاتىسۋىمەن جينالىس وتكىزىپ, احۋالدى جەكە باقىلاۋىنا العان. وبلىس اكىمى وڭىرلىك ەلەكتر جەلىلەرى ۇيىمدارىنا, توتەنشە جاعدايلار قىزمەتتەرىنە جانە جەرگىلىكتى اتقارۋشى ورگاندارعا ەلەكترمەن جابدىقتاۋدى قالپىنا كەلتىرۋ جۇمىستارىن جەدەلدەتۋ جونىندە ناقتى تاپسىرمالار بەرىپتى.
باتىس قازاقستان وبلىسى
