فوتو: وتباسى بانك
نۇرلان اقشانوۆتىڭ ايتۋىنشا, «كورپوراتيۆتىك» باعدارلاماسى اياسىندا تاراپتار 200 ملن تەڭگەدەن قارجى بولەدى. بۇل قاراجات ۋنيۆەرسيتەت قىزمەتكەرلەرىنە جەڭىلدەتىلگەن قارىزدار ۇسىنۋعا باعىتتالادى.
- باعدارلامانىڭ شارتى بويىنشا باستاپقى جارنا – 10 پايىز. 5 پايىزبەن (جتسم 5,2%–5,3%) 20 ميلليون تەڭگەگە دەيىن نەسيە بەرىلەدى. باعدارلاماعا باسپاناسى جوق, جاس, پەرسپەكتيۆتى وقىتۋشىلار قاتىسادى. ەسەنوۆ ۋنيۆەرتيتەتى باعدارلاماعا وتە قاتتى قىزىعۋشىلىق تانىتتى. سونىڭ ناتيجەسىندە بۇگىن «كورپوراتيۆتىك» ءونىمدى جۇزەگە اسىرۋ تۋرالى كەلىسىمگە قول قويىپ وتىرمىز. باعدارلاما كەلەسى جىلى دا جالعاسادى دەگەن ويدامىن, – دەدى ن.اقشانوۆ.
ۋنيۆەرسيتەت باسشىلىعى باسپاناسى جوق قىزمەتكەرلەردىڭ الەۋمەتتىك جاعدايىن كوتەرىپ, وقۋ ورنىنا جاس مامانداردى جۇمىسقا شاقىرۋدى كوزدەيدى.
- ءبىزدىڭ وقىتۋشىلار مەن زەرتتەۋشىلەر ءۇشىن ماڭعىستاۋدا قولجەتىمدى تۇرعىن ءۇي الۋعا مۇمكىندىك بەرەتىن ماڭىزدى كەلىسىمگە قول قويدىق. ۋنيۆەرسيتەت پەن بانك 200 ميلليون تەڭگەدەن بولەدى. جالپى سوماسى 400 ميلليون تەڭگە كولەمىندەگى قاراجات ارىپتەستەرىمىزدىڭ باسپانالى بولۋىنا جول اشادى. بۇل ايماقتاعى تەحنيكالىق جانە ينجەنەرلىك ماماندىقتاردى دامىتۋدى ءوز موينىنا العان ۋنيۆەرسيتەت ءۇشىن عانا ەمەس, بۇكىل ءوڭىردىڭ كادرلىق الەۋەتى ءۇشىن ماڭىزدى قادام, – دەدى شاحماردان ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىنىڭ رەكتورى بەرىك احمەتوۆ.
«وتباسى بانك» «كورپوراتيۆتىك» باعدارلاماسىن بىرنەشە جىلدان بەرى جۇزەگە اسىرىپ كەلەدى. بۇل – ءوز قىزمەتكەرلەرىنىڭ قولجەتىمدى شارتتارمەن باسپانا الۋىنا جاعداي جاساعىسى كەلەتىن كومپانيالارعا ارنالعان ارنايى باعدارلاما. بانك قازاقستان بويىنشا ونداعان كاسىپورىنمەن سەرىكتەستىك ورناتىپ, زاۋىتتار مەن ونەركاسىپ ورىندارىنىڭ, ءارتۇرلى كومپانيالاردىڭ قىزمەتكەرلەرىنە جاڭا باسپانا الۋعا كومەكتەسكەن.
- باعدارلاما 2019 جىلى وسى ماڭعىستاۋ وبلىسىندا باستالدى. مۇناي كومپانياسىنىڭ 99 جۇمىسشىسى باسپانالى بولدى. ودان كەيىن, نازارباەۆ زياتكەرلىك مەكتەبى دە وسى باعدارلامامەن قىزمەتكەرلەرىن باسپانامەن قامتىدى. ەندى مىنە, ەسەنوۆ ۋنيۆەرسيتەتىنىڭ باسشىلىعى ءوزىنىڭ جاس وقىتۋشىلارىنا قولداۋ كورسەتىپ جاتىر. جۇمىسقا ەندى عانا كىرىسكەن جاستاردىڭ باسپانا ماسەلەسىن شەشۋ وتە ماڭىزدى. ءبىزدىڭ «وتباسى بانك» تە قولداۋ كورسەتىپ, قاراجات ءبولىپ وتىر, – دەدى «وتباسى بانك» ماڭعىستاۋ وبلىستىق فيليالىنىڭ ديرەكتورى مەدەت ابۋعاليەۆ.
باعدارلاماعا قاتىسۋشىلار ءتىزىمىن ۋنيۆەرسيتەت قالىپتاستىرادى. ايتا كەتەيىك, «وتباسى بانك» اكىمدىكتەرمەن بىرلەسكەن جوبالار اياسىندا 14 مىڭنان استام ادامعا نەسيە بەرگەن. ال, «كورپوراتيۆتىك» باعدارلاماسى جانە جالعا بەرىپ-جيناقتاۋ مەحانيزمى ارقىلى 519 قىزمەتكەر باسپانالى بولدى.
