فوتو: اشىق دەرەككوز
سوتتىڭ ءباسپاسوز قىزمەتى ناقتىلاعانداي, باستامانى باعالاۋ بارىسىندا ۇسىنىلعان وزگەرىستەردىڭ كونستيتۋتسيامەن ۇيلەسىمدىلىگى, تۇزەتۋدىڭ كونستيتۋتسيالىق قۇرىلىم نەگىزدەرىنە ىقپالى جانە قىرعىزستاننىڭ حالىقارالىق مىندەتتەمەلەرىنە سايكەستىگى ەسكەرىلگەن.
كونستيتۋتسيالىق سوت نەگىزگى قۇقىقتاردىڭ جۇيەلى سيپاتىن ەسكە سالىپ, ولاردى السىرەتۋگە جول بەرىلمەيتىنىن اتاپ ءوتتى.
«كونستيتۋتسيا ادامنىڭ قۇقىقتارى مەن بوستاندىقتارىن ەڭ جوعارى قۇندىلىق رەتىندە بەكىتەدى, ال ولاردى قامتاماسىز ەتۋ كەپىلدىكتەرىنىڭ جۇيەسى كونستيتۋتسيالىق قۇرىلىمنىڭ نەگىزىن قۇرايدى جانە نەگىزگى زاڭعا ەنگىزىلەتىن وزگەرىستەردىڭ شەگىن ايقىندايدى. قۇقىقتار مەن بوستاندىقتار كەپىلدىكتەرىنىڭ دەڭگەيىن تومەندەتۋگە جول بەرمەۋگە ەرەكشە نازار اۋدارۋ قاجەت», دەلىنگەن رەسمي مالىمدەمەدە.
سوتتا سونىمەن قاتار ءولىم جازاسىنا تىيىم سالۋ جانە ءومىر ءسۇرۋ قۇقىعىنىڭ باسىمدىعى تەك قۇقىقتىق ەمەس, سونداي-اق قۇندى ماڭىزعا دا يە ەكەنى ايتىلدى. كونستيتۋتسيا ەلدىڭ قۇقىقتىق جۇيەسىنىڭ قۇرامداس بولىگى بولىپ سانالاتىن حالىقارالىق شارتتار بويىنشا مىندەتتەمەلەردى ساقتاۋدى تالاپ ەتەدى.
«ۆەنا كونۆەنتسياسىنا سايكەس, مەملەكەت حالىقارالىق شارتتى ورىنداماۋدى ءوزىنىڭ ىشكى قۇقىعىنىڭ نورمالارىمەن اقتاۋعا قۇقىلى ەمەس», دەپ ەسكە سالدى كونستيتۋتسيالىق سوت.
ۇلتتىق جانە حالىقارالىق-قۇقىقتىق ۋاجدەردىڭ جيىنتىعى نەگىزىندە قىرعىزستان كونستيتۋتسيالىق سوتى ءولىم جازاسىن كونستيتۋتسيالىق تۇزەتۋ ارقىلى قايتارۋ نەگىزگى زاڭعا قايشى جانە قۇقىقتىق تۇرعىدان مۇمكىن ەمەس ەكەنىن ايتتى.
وسىعان بايلانىستى زاڭ جوباسى رەفەرەندۋمعا شىعارىلمايدى, ال باستامانى ىسكە اسىرۋعا بايلانىستى بارلىق راسىمدەر كونستيتۋتسيالىق سوت شەشىمى كۇشىنە ەنگەن ساتتەن توقتاتىلادى.
ەسكە سالا كەتەيىك, بۇعان دەيىن قىرعىزستان پرەزيدەنتى سادىر جاپاروۆ ەلدە ءولىم جازاسىن ەنگىزۋدى تاپسىرعان بولاتىن. مۇنداي شەشىمگە ىستىقكولدە 17 جاستاعى قىزدىڭ قاتىگەزدىكپەن ءولتىرىلۋى سەبەپ بولعان. كەيىن سادىر جاپاروۆ قىرعىزستاندا ءولىم جازاسىن قايتارۋ ماسەلەسى رەفەرەندۋمعا شىعارىلۋى مۇمكىن ەكەنىن مالىمدەدى.
