قازاقستاندا زاڭسىز شىرشا كەسكەندەرگە قانداي جازا قاراستىرىلعان؟

ەگەر ءۇيىڭىزدى جاڭا جىلعا بەزەندىرۋ ماقساتىندا ءوسىپ تۇرعان شىرشانى كەسەتىن بولساڭىز, بۇل ارەكەت قازاقستان رەسپۋبليكاسىنىڭ اكىمشىلىك قۇقىقبۇزۋشىلىق تۋرالى كودەكسىندە جاۋاپكەرشىلىككە اكەلەتىنىن ۇمىتپاڭىز. مۇنداي ءىس تابيعي ورتاعا ەلەۋلى زالال كەلتىرۋ بولىپ سانالادى. كەسىلگەن اعاش نەعۇرلىم كوپ بولسا, جاۋاپكەرشىلىك تە سوعۇرلىم جوعارى.

«ورمان جانە بۇتا اعاشتارىن زاڭسىز كەسكەنى, جويعانى نەمەسە زاقىمداعانى ءۇشىن اكىمشىلىك كودەكستىڭ 381-1-بابى بويىنشا جاۋاپكەرشىلىك كوزدەلگەن. ەگەر تۇرعىن جاڭا جىل الدىندا ورماندا نەمەسە كوشەدە شىرشا كەسسە, وعان 15 اەك كولەمىندە ايىپپۇل سالىنادى. سونىمەن قاتار مىندەتتى تۇردە كەسىلگەن اعاش, قولدانىلعان قۇرالدار مەن كولىك تاركىلەنەدى جانە كەلتىرىلگەن زالال تولىق كولەمدە وتەلەدى», دەيدى پاۆلودار وبلىسىنىڭ ورمان شارۋاشىلىعى جانە جانۋارلار دۇنيەسى جونىندەگى اۋماقتىق ينسپەكتسياسىنىڭ باسشىسى يساتاي ابدرازاحوۆ.

ورمان قورىنا كىرمەيتىن اعاشتاردى زاڭسىز كەسكەن ءۇشىن:

• جەكە تۇلعالارعا – 50 اەك;

• لاۋازىمدى تۇلعالارعا, جەكە كاسىپكەرلەرگە جانە كوممەرتسيالىق ەمەس ۇيىمدارعا – 150 اەك;

• ورتا كاسىپكەرلىك سۋبەكتىلەرىنە – 200 اەك;

• ءىرى كاسىپكەرلىك سۋبەكتىلەرىنە – 500 اەك (كەسىلگەن اعاش, كولىك جانە قۇرالداردى تاركىلەۋمەن قاتار).

ورمان قورى قۇرامىنا كىرەتىن اعاشتاردى زاڭسىز كەسۋ ءۇشىن:

• جەكە تۇلعالارعا – 100 اەك;

• لاۋازىمدى تۇلعالارعا, جەكە كاسىپكەرلەرگە جانە كوممەرتسيالىق ەمەس ۇيىمدارعا – 300 اەك;

• ورتا كاسىپكەرلىك سۋبەكتىلەرىنە – 400 اەك;

• ءىرى كاسىپكەرلىك سۋبەكتىلەرىنە – 1 000 اەك (مىندەتتى تاركىلەۋمەن).

بۇل ارەكەتتەر ەرەكشە قورعالاتىن تابيعي اۋماقتاردا جاسالسا نەمەسە ءبىر جىل ىشىندە قايتالانسا:

• جەكە تۇلعالارعا – 150 اەك;

• لاۋازىمدى تۇلعالارعا, جەكە كاسىپكەرلەرگە جانە كوممەرتسيالىق ەمەس ۇيىمدارعا – 450 اەك;

• ورتا بيزنەسكە – 600 اەك;

• ءىرى بيزنەسكە – 1 500 اەك (مىندەتتى تاركىلەۋمەن جانە زالالدى تولىق وتەۋمەن قاتار).

زاڭسىز كەسۋدەن كەلتىرىلگەن زيان 50 اەك-تەن اسقان جاعدايدا قىلمىستىق ءىس قوزعالادى. مۇنداي كەزدە ايىپپۇلدان باسقا, تۇزەتۋ شارالارى, قوعامدىق جۇمىس, بوستاندىقتى شەكتەۋ نەمەسە ايىرۋ, سونداي-اق م ۇلىكتى تاركىلەۋ قاراستىرىلعان.

جاڭا جىل قارساڭىندا وڭىرگە رەسەيدەن جەتكىزىلەتىن تابيعي شىرشالار كوبەيەدى. ەكولوگيالىق ينسپەكتورلار پوليتسيامەن بىرگە ولاردىڭ زاڭدىلىعىن ۇنەمى تەكسەرەدى. تۇراقتى مونيتورينگ ناتيجەسىندە وتكەن جىلى جاڭا جىل الدىندا وڭىردە زاڭسىز اعاش كەسۋ فاكتىلەرى تىركەلمەگەن.