قازاقستان تانكيستەرى ۇزدىكتەر ۇشتىگىندە

الابينو پوليگونىندا «تانك بياتلونى» ەكيپاجدارى جەكە سايىستارىنىڭ قورىتىندىسى شىعارىلدى, سونداي-اق, جارىستىڭ جارتىلاي فينالىندا باسەكەنى جالعاستىراتىن سەگىز كوماندانىڭ اتى اتالدى, دەپ حابارلادى قورعانىس مينيسترلىگىنىڭ ءباسپاسوز قىزمەتى. سونىمەن, جەكە جانە جالپى كوماندالىق ەسەپتە ۇزدىكتەر ۇشتىگىندە قازاقستان, رەسەي جانە قىتاي تانكيستەرى, ال ءۇندىستان مەن ارمەنيا ءتورتىنشى جانە بەسىنشى ورىندا. سەگىزدىكتى سەربيا, قىرعىزستان جانە تاجىكستان جابادى. كۋۆەيت, موڭعوليا, ۆەنەسۋەلا, انگولا مەن نيكاراگۋا «تانك بياتلونىنان» شىعىپ قالدى. «قازاقستان كومانداسىنىڭ شەبەرلىگى اناعۇرلىم شىڭدالعان. ناتيجەلەر وتە جاقسى. وتكەن جىلمەن سالىستىرعاندا باسەكەلەستىك كۇشەيگەن. ويىندار وتە ءساتتى وتۋدە. بۇل ماشينالار مەن ەكيپاجداردىڭ سايىسى عانا ەمەس, بۇل ەلدەر اراسىنداعى دوستاستىق», – دەپ رف قك قۇرلىق اسكەرلەرىنىڭ باس قولباسشىسى گەنەرال-پولكوۆنيك ولەگ ساليۋكوۆ ويىن ءبىلدىردى. جەكە جارىستىڭ باسىنان باس­تاپ «تانك بياتلونىنداعى» نەگىزگى باسەكە قازاقستان مەن رەسەي اراسىندا ورىستەتىلدى. ەكى ەلدىڭ ەكيپاجدارى تەڭبە-تەڭ كەلە جاتتى. كوماندالاردى بىرنەشە ۇپاي عانا ءبولىپ تۇردى. ەندى تانكيستەرىمىزگە سوڭعى «ەستافەتا» كەزەڭىندە ءساتتى ونەر كورسەتىپ, شەشۋشى كەزەڭگە سىتىلىپ شىعۋ قاجەت. وندا مىقتى كوماندالاردىڭ ىشىنەن «تانك بياتلونى-2015» جارىسىنىڭ ءبىر جەڭىمپازى انىقتالادى. «ەگەمەن-اقپارات».