فوتو: ەڭبەك جانە حالىقتى الەۋمەتتىك قورعاۋ مينيسترلىگى
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, 2025 جىلدىڭ باسىنان بەرى 553,7 مىڭ ازامات ونلاين-وقۋدى اياقتاپ, سەرتيفيكات يەلەنگەن. قازىر پلاتفورمادا 1 ميلليوننان استام ادام تىركەلگەن بولسا, ونىڭ 710,3 مىڭى بيىل قوسىلعان.
ايتا كەتەيىك, پلاتفورما ىسكە قوسىلعالى بەرى جالپى 960 مىڭ ادام كاسىبي ءبىلىم العان.
«وقۋدى اياقتاعان 53,5 مىڭ جۇمىسسىز ازاماتتىڭ شامامەن 16,5 مىڭعا جۋىعى نەگىزىنەن تۇركىستان وبلىسى (3,5 مىڭ ادام), قىزىلوردا جانە قوستاناي وبلىستارى (تيىسىنشە 2,5 جانە 2,8 مىڭ ادام), الماتى ق. (2,3 مىڭ ادام), الماتى وبلىسى (2,2 مىڭ ادام) جاستارى (16-35 جاس ارالىعى) بولدى», دەلىنگەن حابارلامادا.
پلاتفورمادا اۆتورلار 1 000-نان استام كۋرس ازىرلەگەن, ونىڭ 375-ءى تەگىن ۇسىنىلادى. سونىمەن قاتار Courstore, Fluent Education جانە ياندەكس قازاقستاننىڭ كۋرستارىنا دا قوسىلۋعا مۇمكىندىك بار. وقۋ ۇزاقتىعى 6 ساعاتتان 72 ساعاتقا دەيىن.
قىركۇيەك ايىندا ەڭ سۇرانىسقا يە باعىتتار:
- IT جانە تەلەكوممۋنيكاتسيالار;
- اسپاز-كونديتەر;
- ەلەكتروندىق ەڭبەك بيرجاسىن پايدالانۋ;
- پەرسونالدى باسقارۋ;
- ءپىشۋ جانە تىگۋ.
جۇمىسشى ماماندىقتار جىلىنا وراي بيىل مامىر ايىندا مەكتەپ تۇلەكتەرى مەن كوللەدج ستۋدەنتتەرىنە ارنالعان ارنايى كۋرستار – «سەنىڭ مانساپتىق باستاماڭ» جانە ونىڭ ورىس تىلىندەگى بالاماسى ۇسىنىلدى. بۇل باعدارلامالار ماماندىق تاڭداۋعا كومەكتەسىپ, جۇمىس ىزدەۋ, ءوزىن تانىستىرۋ, ءارى ەلەكتروندىق ەڭبەك بيرجاسىنىڭ مۇمكىندىكتەرىن ءتيىمدى قولدانۋ داعدىلارىن ۇيرەتەدى.
