شاحمات – بالانىڭ كورنەكى-بەينەلى ويلاۋىن دامىتىپ, شەشىم قابىلداۋ, تالداۋ جانە تاباندىلىق داعدىلارىن قالىپتاستىراتىن ينتەللەكتۋالدى ويىن. سوندىقتان مەكتەپتە بۇل باعىتقا قىزىعۋشىلىق ارتىپ وتىر. قازىرگى تاڭدا 1–4 سىنىپتان 150 وقۋشى, 5–7 سىنىپتان 45 وقۋشى تۇراقتى تۇردە ۇيىرمەگە قاتىسادى.
مەكتەپ ديرەكتورى ايگۇل ابايقىزى بۇل باستامانىڭ ماڭىزىن اتاپ ءوتتى:
«شاحمات – جاي عانا ويىن ەمەس, بالانىڭ مي قابىلەتىن شىڭدايتىن كۇشتى قۇرال. ۇيىرمەگە قاتىسىپ جۇرگەن بالالاردىڭ ساباققا ىنتاسى ارتىپ, ويلاۋ جىلدامدىعى, زەيىنى جاقسارعانىن بايقاپ وتىرمىز. اتا-انالاردىڭ دا قىزىعۋشىلىعى جوعارى. ولار بالاسىنىڭ بوس ۋاقىتىن ءتيىمدى وتكىزىپ, وزىنە سەنىمدى بولعانىن قالايدى. ءبىز ءۇشىن ءار بالانىڭ جان-جاقتى دامۋى ماڭىزدى», دەيدى مەكتەپ ديرەكتورى.
وقۋشىلاردىڭ شاحماتقا دەگەن سۇيىسپەنشىلىگىن ارتتىرۋ ماقساتىندا جاقىندا مەكتەپكە حالىقارالىق گروسسمەيستەر نۇرلان بولات ۇلى ىبراەۆ كەلىپ, جاس شاحماتشىلارعا شەبەرلىك ساباعىن وتكىزدى. بالالار مەن اتا-انالار ءۇشىن بۇل ۇلكەن موتيۆاتسيا بولدى.
ايتا كەتەيىك, ەلىمىزدە 42 مەكتەپتە شاحمات ءپان رەتىندە وقىتىلادى, ال 1500-گە جۋىق ءبىلىم ورداسىندا ۇيىرمەلەر جۇمىس ىستەيدى. 2027 جىلعا دەيىنگى كەشەندى جوسپار اياسىندا تۇركىستان وبلىسىنداعى شاحمات ۇيىرمەلەرىنىڭ سانى ودان ءارى ارتادى دەپ جوسپارلانعان.
