فوتو: اۆتوردان
تاكتيكالىق-ساپتىق ساباقتار بارىسىندا جەكە قۇرام بەلگىلەنگەن ۋاقىتتا جيىن ورنىنا كەلىپ, قويىلعان تاپسىرمالاردى ورىندادى. اسكەري داعدىلارىن شىڭداعان ساربازداردىڭ دايىندىق ارەكەتتەرى باقىلاۋ توبى تاراپىنان باعالاندى. جەكە قۇرام بولىمگە تولىق جينالعاننان كەيىن بولىمشەلەر مارش جاساپ, بەلگىلەنگەن اۋماقتاردا وقۋ-جاتتىعۋ وتكىزدى. مۇنداي اسكەري جاتتىعۋ ساربازداردىڭ ۇيىمشىلدىعىن, بەرىلگەن تاپسىرمانى مۇلتىكسىز ورىنداۋشىلىعىن, جەدەلدىك پەن ۇيلەسىمدىلىكتى بايقاۋ ءۇشىن كەرەك.
مەرزىمدى اسكەري قىزمەت اتقارىپ جۇرگەن قاتارداعى جاۋىنگەر بەرديار قۋاتوۆ دايىندىق ساباقتارى جايىندا بىلاي دەيدى:
«مەن بيىل كوكتەمدە اقتوبە وبلىسىنان شاقىرىلدىم. التى ايدىڭ ىشىندە اسكەري ءىستىڭ قىر-سىرىن مەڭگەردىم دەسەم بولادى. اپتا باسىندا تەكسەرۋ دابىلى ويناپ, ءبارىمىز ورە تۇرەگەلدىك. روتالىق كولوننالاردى قۇرۋ ايماعىنا بارىپ, بىرنەشە جاۋىنگەرلىك نورماتيۆتەردى ورىندادىق. سونىڭ ىشىندە مەن ءۇشىن ەستە قالعانى – مەديتسينالىق دايىندىق. ءبىز جارالانعان جاۋىنگەرلەرگە العاشقى كومەك كورسەتتىك. ءىس جۇزىندە ەۆاكۋاتسيالاۋ تاسىلدەرىن ۇيرەندىك. بۇل ءبىلىم تەك ارميادا عانا ەمەس, كەيىنگى ومىردە دە قاجەت قوي. اسكەردە مەن ساربازدىڭ كەز كەلگەن جاعدايعا دايىن بولۋ كەرەك ەكەنىن ءتۇسىندىم. العاشقى كومەك ەدەل-جەدەل كورسەتىلسە, ءبىر ادامنىڭ ءومىرىن قۇتقارىپ قالعانىڭ. جاۋىنگەرلىك تارتىپكە ۇيرەتكەن وسىنداي اسكەري بولىمدە قىزمەت ەتىپ جاتقانىم مەن ءۇشىن ۇلكەن ماقتانىش», دەدى ول.
تەكسەرۋ بارىسىندا كومانديرلەر دالالىق جاعدايدا تاكتيكالىق شەشىمدەر قابىلداپ, جەكە قۇرامعا ناقتى تاپسىرمالار جۇكتەدى. سونداي-اق قارۋدى دۇرىس قولدانىپ, كوزدەپ اتۋ باسقا دا جاۋىنگەرلىك دايارلىق اسكەري باسشىلىق تاراپىنان ەرەكشە نازارعا الىندى. ءسوزسىز مۇنداي وقۋ-جاتتىعۋلار اسكەري قىزمەتشىلەردىڭ كاسىبي دەڭگەيىن ارتتىرادى, سونىمەن قاتار بريگادا بولىمشەلەرىنىڭ تۇراقتى جاۋىنگەرلىك دايىندىقتا بولۋىن قامتاماسىز ەتەدى دەدى اسكەري سالا جەتەكشىلەرى.
شىمكەنت
