فوتو: اقوردا
«قازاقتا «جاقسىلىق جۇرگەن جەردە تاپشىلىق بولمايدى» دەگەن ءسوز بار. بيىلعى «پارىز» بايقاۋىنا قاتىسۋشىلار ءتۇرلى قايىرىمدىلىق شارالارعا 37 ميلليارد تەڭگەدەن استام قارجى سالعان. بۇل وتاندىق بيزنەستىڭ قوعام يگىلىگى ءۇشىن ايانباي ادال قىزمەت ەتۋگە دايىن ەكەندىگىن كورسەتەدى.
وسىندا وتىرعان ءار ازاماتتىڭ تۋعان ەلگە دەگەن ىقىلاس-پەيىلى جاس كاسىپكەرلەرگە ۇلگى-ونەگە بولارى ءسوزسىز.
سىزدەرگە تاعى دا شىنايى ريزاشىلىعىمدى بىلدىرەمىن! كاسىپتەرىڭىز العا باسا بەرسىن! بارشاڭىزعا اماندىق, تابىس تىلەيمىن», دەدى قاسىم-جومارت توقاەۆ.
سونداي-اق مەملەكەت باسشىسى «التىن ساپا» جانە «پارىز» بايقاۋلارىنا قاتىسقان كاسىپكەرلەردىڭ بارلىعىنا العىس ايتىپ, لاۋرەاتتاردى ماراپاتتادى.
شاعىن جانە ورتا بيزنەس سۋبەكتىلەرى اراسىندا «پارىز» سىيلىعى سولتۇستىك قازاقستان وبلىسىنىڭ «اق-نيەت-اگرو» جاۋاپكەرشىلىگى شەكتەۋلى سەرىكتەستىگىنە تابىستالدى. ال ءىرى بيزنەس وكىلدەرى ىشىنەن ۇلىتاۋ وبلىسىنداعى «قازاقمىس» كورپوراتسياسى لايىق دەپ تانىلدى.
«التىن ساپا» سىيلىعىنا «ۇزدىك يندۋستريالدىق جوبا» اتالىمى بويىنشا «Karlskrona LC AB» (شىمكەنت قالاسى), «ۇزدىك يننوۆاتسيالىق جوبا» اتالىمى بويىنشا «AG TECH» (استانا قالاسى) كومپانيالارى يە بولدى.
