التىن قىز ماۋسىم بارىسىندا ويناعان 78 ماتچتا 516 قايتارىمسىز سوققى (ەيس) جاساپ, ەرەكشە كورسەتكىشكە قول جەتكىزدى. بۇل – ايەلدەر تۋرىندا سوڭعى توعىز جىل ىشىندە بىردە-ءبىر سپورتشى جەتە الماعان رەكوردتىق ناتيجە. ەكىنشى ورىنداعى تەننيسشى, چەح ليندا نوسكوۆانىڭ (№13) كورسەتكىشى – 66 ويىندا 373 ەيس, ايىرماشىلىق ايتارلىقتاي ەكەنى كوزگە ۇرىپ تۇر. ەلەنانىڭ بۇل جەتىستىگى گيننەسس رەكوردتار كىتابىنا ەنگىزىلگەنىن ايتا كەتكەن ءجون.
2025 جىل ە.رىباكينانىڭ سپورتتىق جولىنداعى ەڭ تابىستى ماۋسىمداردىڭ ءبىرى بولدى. ول ستراسبۋرگ (فرانتسيا), نينبو (قىتاي) قالالارىندا وتكەن WTA-500 تۋرنيرلەرىندە توپ جاردى. ەڭ باستىسى, ساۋد ارابيا استاناسى ەر-ريادتا وتكەن WTA-نىڭ قورىتىندى تۋرنيرىندە تۇڭعىش رەت جەڭىمپاز اتاندى.
باس جۇلدەگە جەتۋ جولىندا ەلىمىزدىڭ تەننيسشىسى الەمنىڭ جەتەكشى ويىنشىلارىن: توپتىق اينالىمدا – اماندا انيسيموۆانى (№4), يگا شۆەنتەكتى (№2), ەكاتەرينا الەكساندروۆانى (№10), جارتىلاي فينالدا دجەسسيكا پەگۋلانى (№5) بىرىنەن سوڭ ءبىرىن ەركىن ەڭسەردى. شەشۋشى ماتچتا الەمنىڭ ءبىرىنشى راكەتكاسى ارينا سوبولەنكونى جەڭىپ, ماۋسىمدى WTA رەيتينگىندە بەسىنشى ورىندا اياقتادى.
