فوتو: اشىق دەرەككوز
پارتيانىڭ ءباسپاسوز قىزمەتى مالىمدەگەندەي, بۇل باستامانى پارتيا توراعاسى ازاماتحان ءامىرتاي ۇسىنعان.
بۇل شەشىم پارتيانىڭ ازاماتتىق ۇستانىمىن بىلدىرەتىن قادام, ءارى ولجاس سۇلەيمەنوۆتىڭ جاھاندىق بەيبىتشىلىكتى نىعايتۋعا جانە يادرولىق قاۋىپسىزدىكتى قامتاماسىز ەتۋگە قوسقان زور ۇلەسىنىڭ مويىندالۋى رەتىندە باعالانىپ وتىر. ونىڭ «نەۆادا-سەمەي» قوزعالىسى اياسىنداعى قىزمەتى سەمەي يادرولىق پوليگونىن جابۋدا شەشۋشى ءرول اتقارعان.
سونداي-اق و.سۇلەيمەنوۆتىڭ باستاماسىمەن الەمنىڭ بىرنەشە ەلىندە تاعى ءتورت ءىرى يادرولىق پوليگون (سونىڭ ىشىندە نەۆادا پوليگونى دا) جابىلعان.
«بايتاق» پارتياسى ولجاس سۇلەيمەنوۆتىڭ ەڭبەگىن الەمدىك دەڭگەيدە تانۋ – ەل الدىنداعى جانە حالىقارالىق قاۋىمداستىق الدىنداعى مىندەت دەپ سانايدى.
پارتيا وكىلدەرى نوبەل كوميتەتىنە ولجاس سۇلەيمەنوۆتىڭ كانديداتۋراسىن قاراستىرۋ جونىندە رەسمي ءوتىنىش جولداعان.
ايتا كەتەيىك, 2025 جىلى نوبەلدىڭ بەيبىتشىلىك سىيلىعىن ۆەنەسۋەلا ساياساتكەرى ماريا كورينا ماچادو يەلەندى. نوبەل كوميتەتىنىڭ سايتىندا كورسەتىلگەندەي, ول بۇل ماراپاتقا «ۆەنەسۋەلا حالقىنىڭ دەموكراتيالىق قۇقىقتارىن ىلگەرىلەتۋ جولىنداعى تىنىمسىز ەڭبەگى جانە ديكتاتۋرادان دەموكراتياعا ءادىل ءارى بەيبىت جولمەن ءوتۋدى قامتاماسىز ەتۋ ءۇشىن جۇرگىزگەن كۇرەسى» ءۇشىن لايىق دەپ تانىلعان.
